ޤައުމުގެ ދަރީންނަށް ރަނގަޅު ތަރުބިއްޔަތު ލިބެމުން ނުދާކަމަށް ބުނެ، މައިންބަފައިންނާއި މުރައްބީން މިއަދު ޝަކުވާ ކުރެއެވެ. ތަރުބިއްޔަތު ކުރުމުގެ އެންމެ ރަނގަޅު ވަސީލަތަކީ ނަމޫނާއެވެ. ބަހުގެ އަސަރަށްވުރެ ކަމުގެ އަސަރު ބޮޑުވާނެތީއެވެ.
ދަރިފުޅަށް ތެދުބުނުމަށް ނަސޭހަތްތެރިވާ މަޔަކު، އެކުއްޖާގެ ބައްޕައަށް ދޮގުހަދާތަން ފެންނަނަމަ ވާނީ ކިހިނެއް ހެއްޔެވެ؟ ބައްޕަ އޭނާގެ ދަރިފުޅު ގާތުގައި ދޮގު ނަހަދާށޭ ބުނަމުންދާއިރު، ބައްޕަ ހޯދަން މީހަކު އައި ހިނދު، ބައްޕަ ގެއަކު ނޫޅެޔޭ ބުނާށޭ ދަރިފުޅު ގާތުގައި ބުނާ ބައްޕަގެ ފަރާތުން ލިބޭނެ ހެޔޮ ނަމޫނާއެއް އޮންނާނެ ހެއްޔެވެ؟
މާތް ނަބިއްޔާ ވަނީ ޚާދިމުންނާއި އެހީތެރިންނާއި މުވައްޒަފުންނާއެކު މުއާމަލާތު ކުރާއިރު ތަބާވާން ޖެހޭ އަޚްލާޤީ މިންގަނޑެއް ހާމަކޮށް ދެއްވާފައެވެ. ރަނގަޅު ނަމޫނާ ފެނުމަކީ އަނެކުންނަށް އޭގެ ހެޔޮ އަސަރު ކުރާ ކަމެކެވެ. މުޖުތަމައަށް ހެޔޮ ބަދަލެއް ގެނެވޭނީ ހެޔޮ ނަމޫނާއިންނެވެ. ނަމޫނާ ލިބޭނީ ބަހާއި އަމަލު އެއްގޮތް ކުރެވިގެންނެވެ.
އިސްލާމް ދީނަކީ ނަމޫނާގެ ދީނެވެ. ނަމޫނާއަކީ ވަރަށް ނުފޫޒު ގަދަ އެއްޗެކެވެ. އިސްލާމް ދީން މި ބިމުގެ ކަންކޮޅުތަކުގައި ފެތުރުނީ މުސްލިމުން ދެއްކި ރިވެތި ނަމޫނާގެ ސަބަބުންނެވެ. ރަނގަޅު ނަމޫނާތަކެއް ލިބޭނީ، އަހަރެމެންގެ ދަރީން ރަނގަޅަށް ތަރުބިއްޔަތު ކޮށްގެންނެވެ.
ޒުވާނުންނާ މިއަދު ކުރިމަތިވެފައިވާ މައްސަލަތަކުގެ ތެރޭގައި އަހަރެމެންގެ ކިބައިން އެކުދީންނަށް ހެޔޮ ނަމޫނާ ނުފެނުން ވެއެވެ. ޤައުމު މިއަދު ގޮވަނީ ވިސްނުން ތޫނު، ވާޖިބު އަދާކުރާ، ޢިލްމުވެރި ޤާބިލު މުއުމިނު ޒުވާނުންނަށެވެ. ޤައުމު ބޭނުންވަނީ އަހަރެމެންގެ އުއްމީދުތައް ހަގީގަތަކަށް ހަދައިދޭނެ އިޚްލާސްތެރި ޒުވާނުންނެވެ. ކަންނެތްކަމާ ދުރު މަސައްކަތްތެރި ޒުވާނުންނަށެވެ.
" މިފަދަ ޒުވާނުންގެ ޖީލެއް އުފެއްދޭނީ އެދުރުންނާއި، މައިންބަފައިންނާއި، މުޅި މުޖުތަމަޢު ޒުވާނުން ބިނާކުރުމަށް މަސައްކަތް ކޮށްގެން. ޒުވާނުންނަށް ތަޢުލީމާއި ތަމްރީނުދީ، ޤައުމަށް ބޭނުންވާނެ ދަރިންތަކަކަށް އެމީހުން ހަދައިގެން. އެމީހުންނަށް ފުރުސަތުތައް ފަހިކޮށްދީގެން. އޯގާވެރިކަމާއެކު އެމީހުންގެ ކުށްތައް ރަނގަޅުކޮށްދީ އެމީހުންނަށް ހެޔޮ ނަމޫނާ ދައްކައިދީގެން".
ޒުވާނުންގެ ހިތްތަކުގައި އިންދަންވީ އިސްލާމީ ރިވެތި އަޚްލާޤާއި އަދަބުތަކެވެ. އެމީހުންނަށް ދަސްކޮށްދޭންވީ އިސްލާމީ ރިވެތި އަގުތަކާއި ރަހަތަކެވެ. މަޑުމައިތިރިކަމާއި، ލޯތްބާއި ކުލުނާ އެކުގައެވެ.
ޒުވާނުންނޭވެ. ވިސްނާނުލާ އެއްވެސް ނަމޫނާއެއް ނަކަލު ނުކުރާށެވެ. ތިބާ އިޚްތިޔާރުކުރާ ނަމޫނާއިން ކަނޑައެޅިގެންދާނީ ހަމައެކަނި މިދުނިޔޭގެ އަމާޒުތަކެއް ނޫނެވެ. އާޚިރަތް ލިބުމާއި ނުލިބުން އޮތީވެސް ތިބާ އިޚްތިޔާރު ކުރާ ނަމޫނާގެ މަތީގައެވެ.
ދަރީންނަކީ މާތް ﷲ އަހަރެމެންނާ ހަވާލު ކުރައްވާފައިވާ އަމާނާތެކެވެ. އެމީހުންނަށް ލިބިގެންވާ ރިވެތި ނަމޫނާއަކަށް އަހަރެމެން ވާން ޖެހޭނެއެވެ. ވެރީންނާއި މައިންބަފައިންނާއި މުދައްރިސުންނާއި މުރައްބީން ހެޔޮ ނަމޫނާއަކަށް ވެއްޖެނަމަ ޤައުމުގެ ކުރިމަގު އުޖާލާވާނެއެވެ. ދުނިޔެއާއި އާޚިރަތް ބާއްޖަވެރި ވާނެއެވެ. ގޭތެރެއިން ދަރީންނަށް ހެޔޮ ނަމޫނާ ނުދައްކައިފިނަމަ އެމީހުން ވާނީ ހަލާކު ކުރަނިވި ހަތިޔާރަކަށެވެ. މުދައްރިސުންގެ ކިބައިން ހެޔޮ ނަމޫނާ ނުފެންނަނަމަ އެ ކުދިންނަށް ލިބޭނީ ފާސިދު ތަރުބިއްޔަތެކެވެ.
މައުލޫމާތު ހުކުރު ޚުތުބާ
