އިސްލާމް ދީނަކީ ހުރިހާ ތަނަކަށާއި ހުރިހާ ޒަމާނަކަށް ކަމުދާ ގޮތުގައި ﷲ ސުބުހާނަހޫ ވަތަޢާލާގެ އަޅުންނަށްޓަކައި ފުރިހަމަކުރައްވައި ރުހިވޮޑިގެންފައިވާ ދިރިއުޅުމުގެ ނިޒާމެވެ. މި ނިޒާމުގައި އެންމެ އިސްކަމެއް ދެވިފައިވާ އެއްކަމަކީ، އަމަން އަމާންކަމެވެ.
ﷲ ސުބުހާނަހޫ ވަތަޢާލާ ދެއްވާފައިވާ ނިޢުމަތްތަކުގެ ތެރެއިން އަމަން އަމާންކަމާއި، ހަމަޖެހުމާ ނުލައި ޙަޔާތުގެ އެއްވެސް އުފަލެއް އިހުސާސެއް ނުކުރެވޭނެއެވެ. އެއީ ކެއިން ބުއިމަށްވުރެވެސް މުހިއްމު ކަމެކެވެ.
މުޖުތަމައުގެ އަމަން އަމާންކަމާއި ހަމަޖެހުމަކީ މާތްވެގެންވާ އިސްލާމްދީނުގައި، ވަރަށް ބޮޑު އިސްކަމެއް ދެއްވާފައިވާ ކަމެކެވެ. އެހެންކަމުން އެކި ނަންނަމުގައި ޖަމާޢަތްތައް ހަދައި، ވައްކަންކުރުމާއި، މީހުންގެ މުދާ ފޭރުމާއި، މީހުންނަށް އަނިޔާކުރުމާއި، އެކި ގޮތްގޮތުން އިންޒާރުދީ ބިރުދެއްކުމަކީ، މުޖުތަމަޢުގެ އަމަން އަމާންކަން ގެއްލޭ ކަންކަމެވެ. މިފަދަ ކަންކަމަކީ އެކަންކަމަށް ބޮޑެތި ޢުޤޫބާތްތައް ކަނޑައެޅިފައިވާ ކުށްތަކެވެ.
މާތް ނަބިއްޔާ ﷺ ޙަދީޘް ކުރައްވާފައިވެއެވެ. މާނައީ: " އެއް މުސްލިމަކު އަނެއް މުސްލިމަކަށް ބިރުދެއްކުމަކީ ހުއްދަވެގެންވާ ކަމެއް ނޫނެވެ". އަދި އެހެން ޙަދީޘެއްގައި ކީރިތި ރަސޫލާ ﷺ ބަޔާންކޮށްދެއްވާފައިވާ ގޮތުގައި މުއުމިނާގެ ލެއަކީ ﷲ ގެ ޙަޟްރަތުގައި އަގު ބޮޑު އެއްޗެކެވެ.
އިސްލާމް ދީނަކީ އަމަން އަމާންކަމާއި ސުލްހަވެރިކަމުގެ ދީނެވެ. އަހަރެމެން ތަބާވާންޖެހެނީ އިލާހީ މަންހަޖަށެވެ. މި މަންހަޖުގައި ވަނީ އަހަރެމެން އެކަތިގަނޑަކަށްވެ، އަމާންކަމާއި ހަމަޖެހުމަށް އިސްކަންދިނުމަށް ގޮވާލައްވާފައެވެ. މި މަތިވެރި މަންހަޖާ އަހަރެމެން ދުރު ކުރުމަށް، ދީނުގެ ޢަދުއްވުން ކުރަމުންދާ ހަނގުރާމައިން ސަލާމަތްވެ ރައްކާތެރިވާށެވެ. ދީނުގެ ޢަދުއްވުން ބޭނުންވަނީ އަހަރެމެން މުސްލިމުން ބައިބައިކޮށް އަހަރެމެންގެ ސަފުތައް ރޫޅާލާށެވެ.
ޤައުމާއި މުޖުތަމަޢުގެ އަމަން އަމާންކަމާއި ހަމަޖެހުން ދެމެހެއްޓުމަކީ ޤައުމުގެ ކޮންމެ މުވާޠިނެއްގެ ޒިންމާއެކެވެ. ޚިޔާލު ތަފާތުވުމުގެ ސަބަބުން އުފެދިފައިވާ ނުތަނަވަސްކަން ދޫކޮށް އަޚުވަންތަކަމާއި އެކުވެރިކަން އާލާކޮށް ސުލްހަވެރިކަން އިސްކުރުމެވެ. އަމަން އަމާންކަމާއި ހަމަޖެހުމަކީ އަހަރެމެންގެ މެދުގައި އޮންނަ ލޯތްބާއި އެކުވެރިކަމާއި، އަޅާލުމުގެ ނަތީޖާއެވެ.
މުޖުތަމައުގެ އަމަން އަމާންކަމާއި ހަމަޖެހުން ދެމެހެއްޓުމަށް ކުރަންވީ އަނެއްކަމަކީ ހެޔޮކަންތައް ގިނަކޮށް ނުބައިކަންތަކާއި ދުރުހެލިވުމެވެ. ފަހެ ފާފަތަކަށް އަރައިގަތުމަކީ ނުބައިކަން ފެތުރި އަމަން އަމާންކަމާއި ހަމަޖެހުން ނެތިދާ ކަމެކެވެ. އެހެނީ ހެޔޮ ޢަމަލު ކުރުމަކީ ދެދުނިޔޭގެ ބާއްޖަވެރިކަމާއި ހަމަޖެހުން ލިބޭނެ ކަމެކެވެ.
ހަމަޖެހުމާއި އަމަން އަމާން ތަނެއްގެ ގޮތުގައި އޮންނާނީ އެ ތަނެއްގައި ދިރިއުޅޭ މީހުންގެ ތެރެއިން އިޖްތިމާޢީ ބަލިތައް ފުހެވިގެންނެވެ. ދުލުގެ އާފާތްތަކުން އެ މީހުން ސަލާމަތް ވެގެންނެވެ. ފުރައްސާރަ ކުރުމާއި، ނެތިމޮށުމާއި، ދެބައޮޑުވުމާއި، މަލާމާތްކުރުން ފަދަ ހުތުރު ޢަމަލުތަކާ ދުރުހެލިވެގެންނެވެ. އިސްލާމް ދީން އައިސްފައިވަނީ މިފަދަ އާފާތްތަކުން މީސްތަކުން ސަލާމަތް ކުރުމަށެވެ.
މައުލޫމާތު: ހުކުރުޚުތުބާ
