އަހަރެމެންގެ ތެރޭގައި ފެތުރިފައިވާ ކުށްތަކުގެ ތެރޭގައި އެ ކުށްތަކަކަށް އަރައިގަތުމުން، ދީނުން ބޭރުވާ ފަދަ ކުށްތައް ވެއެވެ. އޭގެ ތެރެއިން އެއްކަމަކީ ސިޙުރެވެ. ސިޙުރުގެ ސަބަބުން އާއިލާތައް ރޫޅި، ދެމަފިރިންގެ ޒަވާޖީ ހަޔާތް ބަރުބާދުވެއެވެ. ރަހުމަތްތެރިންގެ މެދުގައި ރުޅިވެރިކަމާއި އަދާވާތްތެރިކަން އުފެދެއެވެ. ދަރިވަރުންގެ ތަޢުލީމަށް ހުރަސްއެޅެއެވެ. ސިއްހަތު ސަލާމަތުން ހުރި މީހާ ބަލިވެ، ހިތާމަޔާއި ވޭން ތަހައްމަލު ކުރަން ޖެހެއެވެ. އެފަދަ އަމަލެއް ކުރާ މީހެއްގެ ގާތަށް ގޮސް، އޭނާގެ ބަސް ތެދުކޮށް، އޭނާގެ ކިބައިން އެހީތެރިކަން ހޯދައިފި މީހާ ކީރިތި ރަސޫލާ ﷺ ގެ މައްޗަށް ބާވައިލެއްވި ތަކެއްޗަށް ކާފިރުވެއްޖެއެވެ. މި ނުބައި ފާސިދު އަމަލު މިއަދު ވަނީ މުޅި މުޖުތަމަޢަށް އާންމުވެފައެވެ.
މި ސުންފާ އަމަލުގެ ސަބަބުން ބަރުބާދުވެގެން ދަނީ ކިތައް ޒުވާނުންގެ ހަޔާތް ހެއްޔެވެ؟ ވިއްސިވިހާލި ވެގެން ދަނީ ކިތައް ޒުވާނުންގެ އުއްމީދުތައް ހެއްޔެވެ؟ ބަލިވެ ދުނިޔެ ދޫކުރަމުންދަނީ ކިތައް އަޚުންނާއި އުޚުތުން ހެއްޔެވެ؟ އަދާވާތްތެރިކަމާއި ނަފުރަތު އުފެދި މުޅި އުމުރަށް ވަކިވެ ދަނީ ކިތައް އާއިލާ ހެއްޔެވެ؟ މުޖުތަމަޢުގެ އަމާންކަން ގެއްލި ދުނިޔޭން މޮޔަވަނީ ކިތައް މީހުން ހެއްޔެވެ؟ މިކަންކަން މި ހިނގަނީ ބޮޑުފާފައެއް ކަމުގައިވާ ސިހުރުގެ ސަބަބުންނެވެ.
ސިހުރަކީ ހަގީގަތެކެވެ. އޭގެ އެއްބާވަތަކީ އެކަންކުރާ މީހުންގެ ކުޅަދާނަކަމުން، މީސްތަކުންގެ ލޯމައްޗަށް އޮޅުވާލާ އޮޅުވާލުމެކެވެ. ސިހުރު އަނެއް ބާވަތަކީ، ކެހިވެރިކަމުގެ ދައްކާލުމެއް ނޫނެވެ. އެއީ މީހުންގެ ހިތްތަކަށާއި، ހަށިގަނޑަށް އޭގެ އަސަރު ފޯރާ ބާވަތެކެވެ. މި ބާވަތުގެ ސިހުރު ހެދުމަށް މީހުންގެ އިސްތަށްޓާއި، ނިޔަފައްޗާއި، ފުނަލުގެ ދަތާއި، ފޭރާން ނުވަތަ ފައިވާން ފަދަ ތަކެތި ބޭނުންކުރެއެވެ. މީގެތެރޭގައި މީހުން މޮޔަކޮށްލާ ސިހުރާއި، ބަލިކޮށްލާ ސިހުރާއި، މަރާލާ ސިހުރާއި، ދެމަފިރިން ރުޅިކުރުވައި އަދި ދުރުކުރުވާ ސިހުރު ހިމެނެއެވެ.
ސިހުރަކީ ހަގީގަތެއްކަން ކީރިތި ޤުރުއާނުގެ ސަރީހަ ނައްޞުން ސާބިތުވެއެވެ. ސިހުރަކީ ކާފިރުވާފަދަ ބޮޑު ފާފައެކެވެ. އެއީ ދުނިޔޭގެ ގެއްލުމާއި ހަލާކަށް މަގުފަހިވާ އަމަލެކެވެ. ތިޔަބައިމީހުން ސިހުރުހާހުރައާ ދުރުހެލިވާށެވެ. އަދި މުސީބާތްތަކުން މިންޖުވުމަށާއި ބޭނުންވާ ކަންކަމުގައި އިޚްލާސްތެރިކަމާއެކު މާތް ﷲ ގެ ޙަޟްރަތުގައި ދުޢާ ދަންނަވާށެވެ. އެކަލާނގެއީ އަޅުތަކުންގެ ދުޢާ އިޖާބަކުރައްވާ ރަސްކަލާނގެއެވެ.
ސިޙުރާއި ނޭދެވޭ ކަންކަމުން ރައްކާތެރިވުމަށް ކުރެވިދާނެ އެންމެ މުހިންމު ކަމަކީ ފަރްޟު ފަސް ނަމާދަށް ރައްކާތެރިވުމެވެ. ދެވަނަކަމަކީ ޝައިތާނާގެ ކިބައިން ރައްކާތެރިވުމަށް މާތް ﷲ ގެ ޙަޟްރަތުގައި ދުޢާ ދެންނެވުމެވެ.
މައުލޫމާތު: ހުކުރު ޚުޠުބާ
