ގދ.ނަޑެއްލާގައި ކުރީޒަމާނުގައި ގެދޮރު އަލިކަލޭގެފާނު ނަމަކަށްކިޔާ ފަންޑިތަވެރިއެއް އުޅުނެވެ. މިކަލޭގެފާނު ހަދާ ފަންޑިތައިގެ މޮޅުކަމުން މީނާ ޖިންނިއެއްވެސް ގެންގުޅެއެވެ. އެދުވަސްވަރު ނަޑެއްލާގައި އާދަޔާޚިލާފަށް ގިނައިން މީހުން މަރުވާން ފަށައިފިއެވެ. މިކަމާއި ކަންބޮޑުވެގެން އެރަށުމީހުން އަލިކަލޭގެފާނު ގާތުގައި މިވާހަކަ ދައްކަން ފެށުމުން އަލިކަލޭގެފާނު ޢަމަލުކުރިގޮތަކީ މިކަން ދިމާވާން މެދުވެރިވާގޮތެއް ބެލުމަށް ޖިންނިއަށް އެންގިއެވެ. ޖިންނި ބެލުމަށްފަހު ޚަބަރުދިން ގޮތުގައި މިކަމަކީ ކަޅެހިގިއްލާގެ މައިފުރޭތަ ކިޔާ ފުރޭތައެއް ކުރާކަމެކެވެ.
ކަޅެހިގިއްލާއަކީ ކުރިން ވަރަށްގިނަ މީހުން އުޅުނު ރަށެކެވެ. މިފުރޭތައިގެ ނުބައިކަމުން އެރަށުން މީހުން މަރުވަމުންގޮސް ރަށް ފަޅުވީއެވެ. އޭގެފަހުން މިފުރޭތަ މިހާރު ނަޑެއްލާއާއި ދިމާކޮށްގެން އުޅެނީއެވެ. ގެދޮރުކަލޭގެފާނު އޭނާގެ ޖިންނިއަށް އެންގީ ކަޅެހިގިއްލާގެ މައިފުރޭތައިގެ އުދަގޫ ނަޑެއްލާ މީހުނަށް ނުފޯރާނެ ގޮތެއް ހެދުމަށެވެ. މިގޮތަށް އަމުރު ކުރުމުން މިޖިންނި މިކަން ކުރަން ދިޔައެވެ. އެރޭ ދިޔަވަރު ހިކުމުން ފަރުމަތީގައި ޖަހާފައިހުރި ތިލޯޓެއްގެ ކައިރީގައި މިޖިންނި ހުއްޓެވެ. ދަންވަރު ފުރޭތައަރައިގެން އައިސް ތިލޯއްޓާއި ހަމަވުމުން ޖިންނި އެފުރޭތައިގެ ގައިގާ ބައްދައިފިއެވެ. ޖިންނިއާއި ފުރޭތަ ވެއްޓިގެން ފަރުމަތީގައި އޮޅުލަން ފަށައިފިއެވެ. އެތާގެ ފަޅުމަތީގައި އެރަށު މީހުން މާލޫދުހަރުގެ އަޅަން ތޮށަލިވިއަން މޫދު އަޅާފައިވާ ފަންތައް ހިފަހައްޓަން ޖަހާފައި ހުރި ކަޑަތަކެއް ހުއްޓެވެ.
ޖިންނި މިކަޑަތަކުގެ މައްޗަށް ފުރޭތަ ވައްޓާ ހިފެހެއްޓިއެވެ. މިހިސާބަށް ދިއުމުން ޖިންނި ކުރެން ފުރޭތަ އަހައިފިއެވެ. "މަށަށް ކީއްކުރަންހޭ ކަލޭ ތިއުޅެނީ" ޖަވާބުގައި ޖިންނި ބުންޏެވެ. "ކަލޭ މިރަށުގެ މީހުނަށް އުދަގޫކުރާތީ މިއުޅެނީ ގެދޮރުކަލޭގެފާނު އަންގަވައިގެން ކަލޭ މަރާލާށެވެ." ދެންފުރޭތަ ވަރަށް ބިރުގެންފައި ދުވަހަކުވެސް ނަޑެއްލާއަށް ނާރާނެ ކަމަށް ވަޢުދުވިއެވެ. ޖިންނި މިކަން ޤަބޫލުކޮށް ފުރޭތަ ދޫކޮށްލައިފިއެވެ. އޭގެފަހުން ދުވަހަކުވެސް އެފުރޭތަ ނަޑެއްލާ އަކަށް ނާރައެވެ. ފުރޭތަ ނަޑެއްލާއަށް ނޭރިއަސް ނަޑެއްލާއިން މީހުން މަރުވާ ދުވަސްވަރެއްގައި ވިއްޔާ ގޮނާނިގިއްޔާއި ކަޅަހިގިއްޔާ ދެރަށް ދޭތެރެއިން ރޭގަނޑު އައްޔެއް ފެނެއެވެ. މިކަން އެގިގެން ޖިންނި އެކަލޭގެފާނަށް މިކަން އެންގިއެވެ. އަލިކަލޭގެފާނު އައިރުޅިން ގޭދޮށުވަޅުގައި ވަށްކޮށް ހަދާފައިހުރި ގަލެއްގެމަތީގައި ޖިންނި ބޭންދިއެވެ. މިއީ އެދުރުރު ޖިންނިއެއްކަމަށް ބުނެއެވެ.
ކުޑަދުވަސް ކޮޅެއްފަހުން ނަޑެއްލާ ދޮންރައިވެރިޔާ ނަޑެއްލާއިން ފުރައިގެން ގައްދުއަށް ދިޔަދަތުރުގައި ވިއްސާރަވެގެން މަގުއްދޫގައި މަޑުކުރިއެވެ. އެރަށަށް ދިޔައިރު އެރަށުމީހުން ރަށުން ފައިބާ ރަށުން މީހުން ހުސްވަނީއެވެ. ނަޑެއްލާ ދޮންރައިވެރިޔާ އަވަހަށް އެރަށުން ފުރަން އުޅެނިކޮށް އަތިރިމަތީގައި ހުރި އަންހެން ކުއްޖަކު ދޮންރާވެރިޔާގާތު އޭނާގެންގޮސްދޭން ބުނުމުން ދޮންރައިވެރިޔާ އެކުއްޖާ ގޮވައިގެން ފުރައިފިއެވެ. މިދަތުރު ނިންމާ ރަށަށްދަމުން ދޮންރާވެރިޔާ ދިޔައީ މިކުއްޖާ ގޮވައިގެން އޭނާގެ ރަށަށެވެ. މިކުއްޖާ ހުންނަނީ ދޮންރާވެރިޔާގެ ގޭގައެވެ. މިކުއްޖާއަށް އެރަށު މީހުން ކިޔާއުޅެނީ މަގުއްދޫ ކުއްޖާއެވެ.
ދޮންރާވެރިޔާ ރާއަރާފައި ގެންނަ ހުރިހާ ރާތަކެއް ކައްކަނީ މިކުއްޖާ އާއި ޙަވާލު ކޮށްގެންނެވެ. ނަމަވެސް ރާ ކެއްކުމުގެ ކަންކަން ރަގަޅަކަށް ކުރިއަށްނުގެންދެވުނެވެ. ކޮންމެ ރެއަކު ރާ ތަރާފަތް ހޫނުވުމުން އޭގައި ހުންނަ އަކިރިތައް ހެލެން ފަށާއިރަށް މަގުއްދޫ ކުއްޖާ ބަދިގެއިން ނުކުމެގެންދެއެވެ. މިހެންވާކަން ދޮންރާވެރިޔާ އަންހެނުން ފާތުމައަށް އެގިގެން އެއްރޭ ރާ ކަޢްކަން އުދިގަޑީގައި ފާތުމާ ބަދިގެއަށް ދިޔައެވެ. ބަދިގެ ތެރޭގައި ހުއްޓާ ތަރާފަތަށް ހޫނުވެ އަކިރިތައް ހެލެން ފެށިވަގުތު މަގުއްދޫ ކުއްޖާ ނުކުންނަން ދިމާކުރުމުން ރުޅިއައިސްގެން ރާ ދަނޑިގަޑުން އެކުއްޖާގެ ބޮލުގައި ތަޅައިގެންފިއެވެ. އެކުއްޖާ ނިކުމެގެން ދުވެފިލީއެވެ. އެދުވަހަށްފަހު އެރަށުގެ އެކަކަށްވެސް މަގުއްދޫ ކުއްޖާ ނުފެނެއެވެ. އޭގެ ފަހުން ރޭގަނޑުވުމުން ރަށުތެރެއިން ކުޑަކުދިން ރޯއަޑު އިވެން ފެށިއެވެ. ގެތަކުގެ ބިތު ބުޑުން ޓައްކަޑާ އަޑުވެސް އިވެއެވެ. އަދި ކުޑަކުދިންގައިގައި ކަސް އެޅުންފަދަ ކަންތައްވެސް ގިނަވިއެވެ.
ނޯޓް: މިއީ ނ.ތ.ހަސަންދީދީ ލިޔުއްވި "ކުރީގެ ހުވަދު އަތޮޅު" ގައި މަގުއްދޫ ކުއްޖާގެ ވާހަކަ ލިޔުއްވި ގޮތުގެ ނަކަލައެކެވެ. މި ލިޔުމުގައި ބަސްތައް އަތުރާފައިހުރި ގޮތް މާނަ ނުއޮޅޭގޮތަށް ކޮންމެވެސް ވަރަކަށް މިހާރު ބޭނުންކުރާ ގޮތަށް ބަދަލު ކުރެވިފައިވާނެއެވެ.
