ފާއިޒު ހުރީ ހިތް އަވަސްވެފައެވެ. ކުއްލިއަކަށް އެކަހަލަ ވާހަކައެއް އަޑުއިވުނީމައެވެ. އަދި ޝަރީފާ ވަޒީފާއިން ވަކިވާން އުޅޭތީ އެކަމާއި ވަރަށް ދެރަވިއެވެ. ފާއިޒު ބޭނުންވީ އަބަދުވެސް ޝަރީފާ ވަޒީފާގައި ބަހައްޓާށެވެ.
"ވަޒީފާއިން ވަކިނުވެ ކައިވެނީގެ ކަންތައް ހަމަޖެހެންދެން ޗުއްޓީގައި ހުންނަންވީނު" ފާއިޒު ބުނެލިއެވެ.
"ނޫން. ޝުކުރިއްޔާ. ދެން ބޭނުންވަނީ ގޭގައި މަޑުކޮއްލަން ފިރިމީހާގެ ޚިދުމަތުގައި. އޭނަވެސް ބޭނުންވަނީ އެގޮތް" ޝަރީފާ ވަރަށް ތަފްސީލްކޮށް ފާއިޒަށް ކިޔައިދިނެވެ.
ޝަރީފާ ފާއިޒަށް އިބްރާހިމްފުޅުގެ ވާހަކަ ކިޔައިދިނެވެ. އަދި ދުވަހަކުވެސް ފާއިޒު ކޮއްލަދިން ކަންތަކުގެ މަތިން ހަނދާން ނުނެތޭނެކަމަށް ބުންޏެވެ. އަދި ޝީމާއަށް ރަނގަޅަށް ކަންތައް ކޮއްދޭންވެސް އެދުނެވެ. އެވާހަކަ ދައްކަމުން ދިޔައިރު ޝަރީފާގެ ލޮލުން ކަރުނަ އޮހެމުންދިޔައީ ފާއިޒުގެ އާއިލާ އާއި ދުރަށް ދާންޖެހޭތީއެވެ. މިއީ ކޮންމެ އިންސާނަކުވެސް ދެކޭނެ ދުވަހެކެވެ. ކޮންމެ މީހަކުވެސް އެމީހެއްގެ ދިރިއުޅުން ކުރިއަށް ގެންދަންވީ ގޮތް ކުރަހަމުންދާނެވެ. އެއްދުވަހަށް ވުރެ އަނެއް ދުވަސް ރަނގަޅުވޭތޯއެވެ. އެންމެފަހުން ފާއިޒު ބޭނުންވީ ޝަރީފާ އެދުނުގޮތަށް ދީލާލާށެވެ. އަދި އެމީހުންނަށް ހެޔޮދުޢާ ކޮއްފައި އެނބުރި ދާން ހިނގައިގަތެވެ. ފާއިޒު ގޮސް ގޭތެރެއަށް ވަންނަންދެން ޝަރީފާ ހުއްޓުން އަރައިފައި ހުއްޓެވެ. ފާއިޒު ގޮސް ލޯމަތިން ގެއްލުމާއިއެކު ޝަރީފާވެސް އެނބުރި ގެއަށް އަންނަން ހިނގައިގަތެވެ. ޝަރީފާ ގެއަށް އަންނަން ހިނގަމުން ދިޔައިރުވެސް ލޮލުން ކަރުނަ ފައިބަމުން ދިޔައެވެ.
ދުވަސްތަކަކަށްފަހު އިބްރާހިމްފުޅާއި ޝަރީފާގެ ކައިވެނީގެ ކަންތައް ހަމަޖެހެނީއެވެ. އިބްރާހިމްފުޅު ބޭނުންވީ ކޮންމެވެސް ވަރެއްގެ ހަފްލާއެއް ބާއްވާށެވެ. ނަމަވެސް ޝަރީފާ އެކަމާއި އިންކާރު ކުރަމުން ދިޔައީ ކައިވެންޏަށްފަހު ދިރިއުޅޭނެ ފައިސާ ރައްކާކޮއްފައި ބެހެއްޓުމުގެ ބޭނުމުގައެވެ. ނަމަވެސް އިބްރާހިމްފުޅު އެހާ ބޭނުންވާ ކަމަކަށް ޝަރީފާއަށް ހުރަސް އަޅާކަށް ނުކެރުނެވެ. ހިތާއި ދެކޮޅަށް ނަމަވެސް އެކަމާއި އެއްބަސްވީ އިބްރާހިމްފުޅު އުފަލުގައި ބެހެއްޓުމަށެވެ. އިބްރާހިމްފުޅާއި ޝަރީފާގެ ކައިވެނީގެ ހަފްލާއަކީ ރަށުގައި ބޭއްވި ހަފްލާތަކުގެ ތެރެއިން ވަރަށް އާދައިގެ ހަފްލާއެކެވެ. މަދު ބަޔަކަށް ދަޢުވަތު ދީގެން ބޭއްވި ހަފްލާ އޮތީވެސް ޝަރީފާމެންގެ ގޯތިތެރޭގައެވެ.
ރޭގަނޑު އިރުއޮއްސިގެން އައިއިރު ޝަރީފާމެންގެ ގޯތިތެރެވަނީ ދިއްލާ ވަރަށް ޒީނަތްތެރިކޮއްފައެވެ. މެހެމާނުންނަށް ދަޢުވަތު ދިން ގަޑިއަށް އެމީހުން އަންނަމުން ދިޔައިރު ޝަރީފާ އާއި އިބްރާހިމްފުޅާއި ދެމީހުން ނަލަ ހެދިލައިގެން އެމީހުންނަށް މަރުހަބާ ކިޔަން ދޮރާށި ދޮށުގައި އެމީހުންނަށް ޚާއްސަ ކޮއްފައިވާ ސަރަހައްދުގައި މަޑުކޮއްލައިގެން ތިއްބެވެ. މަޑު ފިޔާތޮށި ކުލައިގެ ހެދުމަކާއި ހުދުކުލައިގެ ބުރުގާއެއް އަޅައިގެން ޝަރީފާ ހުރިއިރު އިބްރާހިމްފުޅު ލައިގެން ހުރީ ހުދު ކުލައިގެ އަތްދިގު ގަމީހަކާއި ކަޅު ފަޓްލޫނެކެވެ. މެހެމާނުން އަންނަމުން ދިޔައިރު ފަހަރަކު މީހަކާއި އެމީހުން ސަލާމް ކުރަމުން ދިޔައީ ހިނިތުންވުމުގެ މޫނަކާއިގެންނެވެ. އެދެމީހުންގެ ލޯތަކުން ފެންނަމުންދިޔައީ އެކަކު އަނެކަކު ދެކެވާ ލޯބީގެ ބޮޑުކަމެވެ. ކައިވެނީގެ ރަސްމިއްޔާތު ނިމުނުއިރު ދެމީހުންވެސް ތިބީ ވަރަށް ވަރުބަލިވެފައެވެ. ވެފައިވާ ވަރުބަލިން ދެމީހުންވެސް ބޭނުންވީ އަވަހަށް ނިދާލުމަށެވެ. މާދަމާ ގޯތިތެރެ ސާފުކޮށް ހަމަޖައްސަންޖެހޭ ކަންތައް ހަމަޖެއްސުމަށް މާދަމާއަށް މަޑުކޮއްލުމަށެވެ. ދެމީހުން ގޭތެރެއަށް ވަންއިރު ޝީމާ ހުރީ ގޭތެރެ ވަރަށް ރީތިކޮށް އެ ދެމީހުންނަށް ސަޕްރައިޒު ދޭން ތައްޔާރު ކޮއްފައެވެ. ދެމަފިރިން ދިރިއުޅެން ބޭނުންވި ގޮތަށް އެމީހުން ދިރިއުޅެން ފެށީ ޝަރީފާމެންގެ ގޭގައެވެ.
އިބްރާހިމްފުޅަކީ ވަރަށް ހިތްހެޔޮ، އޯގާތެރި މީހެކެވެ. އޭނާގެ އަނބިމީހާ ޝަރީފާއަށް އިޙްތިރާމް ކުރުމުގެ އިތުރުން ޝަރީފާގެ ދަރިފުޅު ޝީމާއަށްވެސް ވަރަށް ރަނގަޅެވެ. އިބްރާހިމްފުޅު ޝީމާއާ މެދު ދެކެނީ އޭނާގެ އަމިއްލަ ދަރިފުޅެއްގެ ގޮތުގައެވެ. އެއްވެސް ކަމެއް އުނި ނުވާހެނެހެންނެވެ. އެކަމާއި ޝީމާ އާއި އޭނަގެ މަންމަ ޝަރީފާވެސް ހުންނަނީ ވަރަށް އުފަލުންނެވެ. ޚާއްސަކޮށް އިބްރާހިމްފުޅަކީ ދީނީ ކަންތަކަށް ވަރަށް ފަރުވާ ބަހައްޓާ މީހަކަށް ވާތީ ޝަރީފާ ހުންނަނީ ވަރަށް ހިތްހަމަޖެހިފައެވެ.
އިބްރާހިމްފުޅަކީ ގޭތެރޭގެ ހުރިހާ ކަމެއްގައި އެހީތެރިވާ މީހެކެވެ. ކެއްކުމާއި، ދޮވެ އިސްތިރިކުރުމާއި، ގޭތެރެ ސާފުކުރުމުގައި އޭނާ ޝަރީފާއަށް އެހީތެރިވެއެވެ. މިކަމުން ޝަރީފާގެ ހިތުގައި އިބްރާހިމްފުޅަށް އޮންނަ ލޯބި އިތުރުވެގެން ދިޔައެވެ.
އިބްރާހިމްފުޅަކީ އަމިއްލަ މަސައްކަތް ކުރާ މީހެކެވެ. ރޭނުމާއި ވަޑާން ކުރުމެވެ. އެމަސައްކަތުން ރަނގަޅު އާމްދަނީއެއް ލިބެއެވެ. ހުސްވަގުތެއް ވިޔަސް މަސައްކަތް އަވަހަށް ނިމޭ ދުވަހެއް ނަމަވެސް އިބްރާހިމްފުޅު ބޭނުންވަނީ އޭނަގެ އަނބިމީހާ ޝަރީފާ އާއި އެކު ވަގުތު ހޭދަކޮއްލާށެވެ. އަދި ހުސްވަގުތު ތަކުގައި ޝަރީފާ ގޮވައިގެން ހިނގާލަން ދިއުމާއި އަދި އަތިރިމައްޗަށް މަސްބާނަން ދިއުމަކީވެސް އިބްރާހިމްފުޅު ކުރާކަމެކެވެ. ކޮންމެ ތާކަށް ދިޔަޔަސް ދަނީ ޝަރީފާ ގޮވައިގެންނެވެ. އަދި އަބަދުވެސް ކޮންމެ ކަމެއް ކުރިނަމަވެސް ޝަރީފާގެ ޚިޔާލު ހޯދައެވެ. މިކަމުންވެސް ދެމީހުންގެ ގުޅުން އިތުރަށް ބަދަހިވެއެވެ. އިބްރާހިމްފުޅާއި ޝަރީފާގެ ދިރިއުޅުމަކީ އިސްލާމީ ރިވެތި އުޞޫލުތަކުގެ މަތީގައި ބިނާކުރެވިފައިވާ އުފާވެރި ދިރިއުޅުމެކެވެ. ދެމީހުން އެކަކު އަނެކަކަށް އިޙްތިރާމްކޮށް ލޯބިވެ އޯގާތެރިވެ އުޅެއެވެ.
އެއް ދުވަހަކު ޝަރީފާގެ ދޮންބެމެން އެމީހުންގެ ގެއަށް އައެވެ. އެމީހުން އައީ ކުރީގައި ޝަރީފާ އާއި މެދު ކަންތައް ކުރި ގޮތާއި މެދު މަޢާފަށް އެދުމަށެވެ. އެމީހުންގެ މޫނުމަތިން ލަދުވެތިކަން ފެންނަން ހުއްޓެވެ. ކިތަންމެ ދުވަހެއްކޮއްލާފައި ނަމަވެސް އެމީހުންނަށް ގޯސްކޮށް ކަންތައް ކުރެވުނުކަމުގެ އިހުސާސް ކުރެވުނީތީ ޝަރީފާ ވަރަށް އުފާކުރިއެވެ. މިދުވަސް މިޖެހުނީ ޝަރީފާގެ ކެތްތެރިކަމުންނެވެ. އެހެން ނޫންނަމަ މިދުވަސް ނައީހެވެ. ޝަރީފާ އެމީހުންނަށް މަޢާފު ދިނެވެ. އިސްލާމްދީނުގައި މަޢާފު ކުރުމަކީ މާތް ސިފައެއް ކަމަށްވާތީއެވެ.
އޭގެ ކުޑަ ދުވަސްކޮޅެއް ފަހުން ފާއިޒުވެސް ޝަރީފާމެންގެ ގެއަށް ޒިޔާރަތް ކުރިއެވެ. ފާއިޒު އައީ އޭނަގެ މައިންބަފައިންވެސް ގޮވައިގެން ޝަރީފާމެންނަށް މަރުޚަބާ ކިޔާށެވެ. ފާއިޒު އިބްރާހިމްފުޅާއި ބައްދަލުވެ މަރުޚަބާ ކިޔުމަށްފަހު ފުރަތަމަވެސް އިބްރާހިމްފުޅަށް ވަޒީފާއެއް ހުށަހެޅިއެވެ. ނަމަވެސް، އިބްރާހިމްފުޅު އެ ހުށަހެޅުން ޤަބޫލު ނުކުރިއެވެ. އޭނާ އެ ވަޒީފާ ބޭނުންނުވީ އޭނާ ކުރަމުންދާ އަމިއްލަ މަސައްކަތް ގެއްލިދާނެތީއެވެ. އެހެންނަމަވެސް އިބްރާހިމްފުޅު ފާއިޒުގެ ކިބައިން އެދުނީ ޝީމާއަށް ވަޒީފާގެ ކަންތައް ރަނގަޅުކޮށްލަ ދިނުމަށެވެ.
ފާއިޒު އާއި އިބްރާހިމްފުޅު ބޭރުގައި ވާހަކަ ދައްކަން ތިއްބާ ފާއިޒުގެ މަންމަ އާއި ބައްޕަ ގޮވައިގެން ޝަރީފާ ގޭތެރެއަށް ވަނެވެ.
"ވަރަށް އުފާވެއްޖެ ތިކައިވެންޏާ" ފާއިޒު އިބްރާހިމްފުޅާއި ސަލާމް ކޮއްލަމުން ބުނެލިއެވެ.
އަދި އެއްވެސް އެހީތެރިކަމެއް ބޭނުންވާ ނަމަ އެކަން އޭނާއަށް އަންގާލަ ދިނުމަށް އެދުނެވެ.
ޝަރީފާ އަވަސް އަވަހަށް ސައި ތައްޔާރުކުރަމުން ދިޔައެވެ. ފާއިޒުގެ މަންމައާއި ބައްޕަ އަށް ސައި ތައްޔާރު ކުރަން ޝީމާއަށް ވެސް ގޮވިއެވެ. އެމީހުންނަށް ސައި ހަދައިދޭން ޖެހޭގޮތް ޝަރީފާއަށް އެނގެއެވެ.
"ޝަރީފާ ކޮބާ ސައި" އިބްރާހިމްފުޅު ގޭތެރެއަށް ވަންނަމުން ގޮވާލިއެވެ.
"މިނިމެނީ. ނިމެނީ" ޝަރީފާ ބުނެލިއެވެ.
ޝީމާ އާއި ޝަރީފާ ދެމީހުން ގުޅިގެން ސައި ތައްޔާރުކޮށް ނިންމާލިއެވެ. ޝަރީފާ ފާއިޒާއި އިބްރާހިމްފުޅަށް ސައިބޯން އަންނަން ގޮވާލިއެވެ
"މާޝާﷲ ވަރަށް މީރު ސައި" ފާއިޒުގެ މަންމަ ބުންޏެވެ.
"ޝުކުރިއްޔާ" ޝަރީފާ ހިނިތުންވެލަމުން ބުންޏެވެ.
"ދަރިފުޅާ ތިޔަ ދެމީހުން ކައިވެނިކުރި ނަމަވެސް އަހަރެމެންގެ ގެއަށް އަންނަން ވާނެ" ފާއިޒުގެ މަންމަ ބުންޏެވެ.
"އާދެ އިރާދަކުރެއްވިއްޔާ" ޝަރީފާ ޖަވާބުދިނެވެ.
ސައިބޮއި ނިމުމުން ފާއިޒުގެ މަންމަ ޝަރީފާއަށް ސިޓީއުރައެއް ދިނެވެ.
"މިއީ ކުޑަ ހަދިޔާއެއް" ފާއިޒުގެ މަންމަ ބުންޏެވެ.
އެމީހުން ދިޔުމަށްފަހު، ޝަރީފާ ސިޓީއުރަ ކެނޑިއެވެ. އޭގައި ހުރީ ފައިސާއެވެ. އޭނާގެ ލޮލުން ކަރުނަ އައެވެ. އެއީ އުފަލުގެ ކަރުނައެވެ.
އެމީހުން ދިއުމުން ޝަރީފާ އާއި ޝީމާވެސް ސައިބޯން އިށީނެވެ. ހިތްހަމަޖެހުމުގެ ކުލަ ދެމީހުންގެ މޫނުމަތިން ފެންނަމުންދިޔައެވެ.
"މަންމަ ވަރަށް ނަސީބު ގަދަ" ޝީމާ ބުނެލިއެވެ.
"އާނ ދަރިފުޅާ. އަހަރެމެން އެންމެން ވެސް ނަސީބު ގަދަ. ﷲ ގެ ރަޙްމަތްފުޅުން އަހަރެމެން އުޅެނީ އުފަލުން. އެކަމަށް ޝުކުރުވެރިވާންވާނެ" ޝަރީފާ އޭނާގެ ދަރިފުޅުގެ ބޮލުގައި ފިރުމާލަމުން ބުންޏެވެ."
= ނުނިމޭ =
