ޝަރީފާ އާއި ޝީމާ ފާއިޒްގެ ގެއަށް ދިޔައިރު އެގޭ ދޮރާށި ހުރީ ތަޅުލާފައެވެ. ޝަރީފާ މަޑުމަޑުން ދޮރުގައި ޓަކި ޖެހިއެވެ. ކުޑައިރުކޮޅެއްގެ ތެރޭގައި ދޮރު ހުޅުވާފައި ބޭރަށް ނިކުތީ ފާއިޒެވެ.
"އައްސަލާމް ޢަލައިކުމް" ޝަރީފާ އާއި ޝީމާ އެއްއަޑަކުން ބުންޏެވެ.
"ވަޢަލައިކުމް އައްސަލާމް. މަރުޙަބާ. އަވަހަށް ވަދޭ" ފާއިޒް ހިނިތުންވެލަމުން ބުންޏެވެ.
ޝީމާ އާއި ޝަރީފާ ގޮވައިގެން ފާއިޒް ގޭތެރެއަށް ވަންނަން ހިނގައިގަތެވެ. ފާއިޒްގެ ފަހަތުން ޝަރީފާ އާއި ޝީމާވެސް ގޭތެރެއަށް ވަންނަން ހިނގާފައި ދިޔައެވެ. ޝަރީފާ ގޭތެރެއަށް ވަދެ ފަށައިގެން ހޯދައިލިއެވެ. އަދި ގޭތެރެއަށް ގެންނަންޖެހޭ ބަދަލުތަށް ފާއިޒަށް ކިޔައިދެމުން ދިޔައިރު އެވާހަތައް އަޑުއަހަން ފާއިޒު އިނެވެ. ކޮޓަރިތައް ބަހައްޓާނެގޮތާއި އެހެނިހެން ކަންތައް ޝަރީފާ ކިޔާދެމުން ދިޔައެވެ. ޝަރީފާ ބޭނުންވަނީ ޝީމާއަށް އެތެރެ ކޮޓަރި އަދި ޝަރީފާމެންނަށް ބޭރު ކޮޓަރި ހަމަޖައްސާށެވެ. އެކަމަށް ފާއިޒު އެއްބަސްވިއެވެ. އަދި ގޭތެރޭގެ މަސައްކަތް މާދަމާ ފަށާނެ ވާހަކަވެސް ފާއިޒު ބުންޏެވެ.
ތިން މީހުން ގޭތެރޭގައި އަދި އިތުރަށް ހޭދަކުރި ވަގުތުކޮޅުގައި، ގެއަށް ގެންނަން ބޭނުންވާ ބަދަލުތަކާ ބެހޭގޮތުން މަޝްވަރާކުރިއެވެ. އެމީހުންގެ ހިތްތަކުގައި އުފެދިފައިވަނީ އައު ފެށުމެއްގެ އުފާވެރިކަމެވެ. ޝަރީފާ އާއި ފާއިޒްގެ ލޯބި އިތުރަށް ފުންވަމުންދިޔަ ކަހަލައެވެ. އަދި ޝީމާއަށް އިހުސާސްވީ އޭނާގެ ދިރިއުޅުމަށްވެސް އުފާވެރި ބަދަލުތަކެއް އަންނަމުންދާކަމެވެ.
ގޭތެރޭގެ މަސައްކަތްތަކާ ބެހޭގޮތުން މަޝްވަރާކޮށް ނިމުމުން، ޝަރީފާ އާއި ޝީމާ ގެއަށް ދާން ތައްޔާރުވިއެވެ. ފާއިޒް އެ ދެމީހުން ދޮރާށި ހަމައަށް ގެންގޮސްދިނެވެ.
ޝުކުރިއްޔާ މިގެއަށް އައިމަ. މާދަމާ ހެނދުނު އަހަރެމެން ބައްދަލުވާން އަންނަންވާނެ" ފާއިޒް ބުނެލިއެވެ.
"އާނ، އިރާދަކުރެއްވިއްޔާ. އަހަރެމެން ހެނދުނު 9 ގަޑިއަށް އަންނާނަން" ޝަރީފާ ޖަވާބު ދިނެވެ.
ޝަރީފާ ހިނގަމުން ދިޔައިރު އޭނަގެ މޫނުމަތިން އުފާވެރިކަން ފެންނަމުން ދިޔައެވެ. އޭނާގެ ހިނގުމުގައި ޚާއްޞަ ހަލުވިކަމެއް ވިއެވެ. އެކަން ޝީމާއަށް ވެސް ފާހަނގަވިއެވެ. ޝަރީފާ ގެއަށް އައިސް ބޭނުންވީ އަވަހަށް ކައިގެން ނިދޭތޯ ބެލުމަށެވެ. މާދަމާ ހެނދުނު ފާއިޒް އަންނަން ބުނެފައި އެބައޮތެވެ. އެއީ އެގޭގައި މަސައްކަތް ކުރަން މީހުންވެސް އަންނާނެ ވަގުތެވެ. ޝަރީފާ ބޭނުންވަނީ މަސައްކަތް ކުރާ ގަޑީގައި އެގޭގައި މަޑުކޮއްލާށެވެ. އެއިރުން އެގެއަށް ޝަރީފާ ބޭނުންވާނެ ހުރިހާ ބަދަލެއް ގެނެވެއެވެ. ޝަރީފާ ކޮޓަރިއަށް ވަދެ އެނދުގައި އޮށޯވެ ގަޑިއަށް ބަލައިލިއެވެ. ގަޑިން އަށެއް ޖަހަނީއެވެ. އަވަހަށް ނިދޭތޯ ދެލޯ މަރައިލިއެވެ. ހެނދުނު ހެނދުނާ ފާއިޒްގެ ގެއަށް މަސައްކަތު މީހުން އައުމުގެ ކުރިން އެގެއަށް ޝަރީފާ ދާން ބޭނުންވާތީ ވީހާވެސް އަވަހަކަށް ހޭލަން ބޭނުންވެއެވެ. އެހެން އޮއްވައި ޝަރީފާއަށް ނިދުނުއިރެއްވެސް ނޭނގެއެވެ.
ޝަރީފާއަށް ހޭލެވުނީ ބަންގީގެ އަޑަށެވެ. ފަތިސް ނަމާދު ކުރުމަށްފަހު، އަވަސް އަވަހަށް ތައްޔާރުވާން ފެށިއެވެ. އޭނާ ލައިގެން ހުރި ހެދުން ބަދަލުކޮށް، ކުޑަކޮށް ސައި ބޮއިލުމަށްފަހު، ގެއިން ނުކުތެވެ.
މަގުމަތީގައި ހިނގަމުން ދިޔައިރު، އިރުއަރަމުންދާ މަންޒަރު ފެނުނެވެ. ޝަރީފާގެ ހިތުގައި އުފެދުނީ އައު ދުވަހެއްގެ އުފާވެރި އިހުސާސެކެވެ. ފާއިޒްގެ ގެއާ ކައިރިވަމުން ދިޔަވަރަކަށް، އޭނާގެ ހިތުގެ ވިންދު އަވަސްވަމުން ދިޔައެވެ.
ފާއިޒްގެ ގޭ ދޮރާށި ކައިރިއަށް ގޮސް، މަޑުމަޑުން ޓަކި ޖެހިއެވެ. ކުޑައިރުކޮޅެއްގެ ތެރޭގައި ފާއިޒް ދޮރު ހުޅުވައިލިއެވެ. ޝަރީފާ ފެނުމުން ފާއިޒު ސަލާމް ގޮވައިލިއެވެ. އަދި ޝަރީފާ އާއި އެކު ގޭތެރެއަށް ވަނެވެ. މިއަދު މަސައްކަތްކުރާ މީހުން އައުމުގެ ކުރިން އަވަހަށް މިގެއަށް އައީ ކަމަށް ޝަރީފާ ބުނުމުން ފާއިޒުގެ މޫނުމައްޗަށް އުފާވެރިކަމުގެ ހިނިތުންވުމެއް ވެރިވިއެވެ. ދެމީހުން ގޭތެރެއަށް ވަދެ، ކުރަން ހުރި މަސައްކަތްތަކާ ބެހޭގޮތުން ވާހަކަދައްކަން ފެށިއެވެ.
"ޝަރީފާ، ހިތަށްއަރަނީ ކޮން މަސައްކަތެއް އެންމެ ފުރަތަމަ ފަށަންވީ ކަމަށްތޯ؟" ފާއިޒް އަހާލިއެވެ.
"އަހަރެން ހިތަށްއަރަނީ އެންމެ ފުރަތަމަ ކޮޓަރިތައް ސާފުކޮށް، ކުލަލުމުގެ މަސައްކަތް ފަށަންވީހެން. އޭރުން އެހެން މަސައްކަތްތައް ފަސޭހަވާނެ" ޝަރީފާ ކުޑަ ވަގުތުކޮޅަކަށް ވިސްނާލުމަށްފަހު ބުންޏެވެ.
" އާނ، އެއީ ވަރަށް ރަނގަޅު ޚިޔާލެއް. އަހަރެމެންނަށް މިހާރުން މިހާރަށްވެސް ފެށިދާނެ. މަސައްކަތު މީހުން އަންނަންވާއިރަށް އަހަރެމެންނަށް ގިނަ މަސައްކަތްތަކެއް ނިންމިފައި ހުންނާނެ" ފާއިޒް އެއްބަސްވިއެވެ.
ދެމީހުން ގޭތެރޭގައި ހުރި ތަކެތި ނަގައި، އެއްފަރާތްކުރަން ފެށިއެވެ. އެމީހުންގެ މޫނުމަތިން ފެންނަމުން ދިޔައީ އުފާވެރިކަމާއި ޝައުޤުވެރިކަމެވެ. ކޮންމެ މަސައްކަތެއް ކުރަމުން ދިޔައިރުވެސް، އެމީހުންގެ މުސްތަޤުބަލާ ބެހޭގޮތުން ވާހަކަދައްކަމުން ދިޔައެވެ.
"ފާއިޒް، ތިބާއަށް ހީވަނީ އަހަރެމެންނަށް މި ގެ ކިހާ ދުވަހެއްގެ ތެރޭގައި ނިންމޭނެ ކަމަށްތޯ؟" ޝަރީފާ އަހާލިއެވެ.
"އިރާދަކުރެއްވިއްޔާ، ދެ ހަފްތާއެއްހާ ދުވަހުގެ ތެރޭގައި ނިމޭނެހެން ހީވަނީ. އޭރުން އަހަރެމެންނަށް އަވަހަށް އެކީގައި ދިރިއުޅެން ފެށިދާނެ" ފާއިޒް ޖަވާބު ދިނެވެ.
"އާނ، އަހަރެންވެސް އެދުވަހަށް ވަރަށް ބޮޑަށް އިންތިޒާރުކުރަން. އަހަރެމެންގެ އާ ދިރިއުޅުން ފެށުމަކީ ވަރަށް އުފާވެރި ކަމަކަށް ވާނެ" ޝަރީފާގެ މޫނުމަތިން ހިނިތުންވުމެއް ފެނުނެވެ.
ދެމީހުން މަސައްކަތުގައި އުޅެނިކޮށް، ދޮރުގައި ޓަކި ޖެހި އަޑު އިވުނެވެ. ފާއިޒް ގޮސް ދޮރު ހުޅުވާލިއިރު، މަސައްކަތު މީހުން އައިސް ތިއްބާ ފެނުނެވެ.
މަސައްކަތު މީހުން ގެއަށް ވަދެ، ފާއިޒް އާއި ޝަރީފާ އެމީހުންނަށް ކުރަންޖެހޭ މަސައްކަތްތައް ކިޔައިދިނެވެ. އެންމެން އެކީގައި މަސައްކަތް ފެށިއެވެ. ކޮޓަރިތަކުގެ ފާރުތަކުގައި ކުލަ ލުމާއި، ތަޅުމުގައި ޓައިލްސް އެޅުމާއި، ކަރަންޓުގެ މަސައްކަތްތައް ފެށިގެން ދިޔައެވެ.
ދުވަހެއްގެ މެންދުރު ވަގުތު ޖެހުނުއިރު، ޝަރީފާ އާއި ފާއިޒް މަސައްކަތު މީހުންނަށް ކާންދިނުމަށްފަހު، ކުޑަ ހުސްވަގުތުކޮޅެއް ނެގިއެވެ. ގިނަ މަސައްކަތްތަކެއް ނިމިފައިވާކަން ފާހަގަކުރެވުނު އެދެމީހުން، އަރާމުކޮށްލުމަށް ގޭގެ ކުޑަ ގޯތިތެރޭގައި ހުރި ގޮނޑިއެއްގައި އިށީނދެލިއެވެ.
ދެމީހުންގެ ލޯތަކުގައި ވަނީ އުފާވެރި މުސްތަޤުބަލެއްގެ އުންމީދެވެ. ކުރިއަށް އޮތް ދުވަސްތަކުގައި ކުރަން ހުރި މަސައްކަތްތަކާ ބެހޭގޮތުން ވާހަކަދައްކަން ފެށިއެވެ.
ކޮންމެ ވަގުތަކީވެސް އެމީހުންނަށް އެކަކު އަނެކަކާ އިތުރަށް ގާތްވެ، ލޯބި އިތުރުވަމުންދާ ވަގުތުތަކެކެވެ. އެކަކު އަނެކަކަށް ބަލައިލާ ކޮންމެ ފަހަރަކު، ފެންނަނީ ފުން ލޯތްބާއި އިޙްތިރާމެވެ.
"ޝަރީފާ، އާއި އެކު މިދަތުރު ކުރެވޭތީ އަހަރެން ވަރަށް އުފާވޭ. ޝަރީފާގެ ހިތްވަރާއި ކެތްތެރިކަމަކީ އަހަރެންނަށް ލިބޭ ބާރެއް" ފާއިޒް ބުންޏެވެ.
"އަހަރެންވެސް ހަމަ އެހެން. ފާއިޒުގެ ލޯބި އަހަރެންނަށް ދޭ ހިތްވަރަކީ މިސާލެއް ނެތް އެއްޗެއް. އިރާދަކުރެއްވިއްޔާ އަހަރެމެން މިދަތުރު ފުރިހަމަކުރާނަން" ޝަރީފާ ޖަވާބުދިނެވެ.
މެންދުރު ނަމާދުކޮއްލައިގެން އަނެއްކާވެސް ޝަރީފާ އާއި ފާއިޒު މަސައްކަތް ފެށިއިރު ޝިމާވެސް އޭނައަށް ދެއްކި ކޮޓަރީގެ މަސައްކަތް ކުރަމުން ދިޔައެވެ. އެމީހުންގެ ބޭނުމަކީ ވީހާވެސް އަވަހަކަށް އެގޭގެ މަރާމާތުގެ މަސައްކަތް ނިންމުމެވެ.
މެންދުރު ނަމާދުކޮށްލައިގެން އަނެއްކާވެސް ޝަރީފާ އާއި ފާއިޒު މަސައްކަތް ފެށިއިރު ޝިމާވެސް އޭނައަށް ދެއްކި ކޮޓަރީގެ މަސައްކަތް ކުރަމުން ދިޔައެވެ. އެމީހުންގެ ބޭނުމަކީ ވީހާވެސް އަވަހަކަށް އެގޭގެ މަރާމާތުގެ މަސައްކަތް ނިންމުމެވެ.
ޝަރީފާ އާއި ފާއިޒު ގޯތިތެރޭގައި މަސައްކަތް ކުރަމުންދާއިރު، ޝިމާ ކޮޓަރީގައި ކުލަލުމުގެ މަސައްކަތް ކުރަމުން ދިޔައެވެ. އޭނާގެ ހުނަރުވެރި އަތްތަކުން ކުލަ ފުހެމުންދިޔަ ގޮތް ބަލަމުން ޝަރީފާ ހިނިތުންވެލިއެވެ.
އެމީހުންގެ މަސައްކަތް ނިމުނުއިރު އިރުއޮއްސި އަނދިވަނީއެވެ. ޝަރީފާ ބޭނުންވަނީ އަވަހަށް ޝީމާ ގޮވައިގެން ގެއަށް ދާށެވެ. ފާއިޒުގެ ގާތުގައި މިހާރު ވަގުތު ވަރަށް ލަސްވެއްޖެ ކަމަށް ބުނެ ޝަރީފާ ޝީމާ ގޮވައިގެން ގެއަށް ދާން ހިނގައިގަތެވެ.
ޝަރީފާ އާއި ޝީމާ ގެއަށް ދާން ދިޔަމަގުމަތީ އިބްރާހިމްފުޅު މިސްކިތުން ފައިބައިގެން އަންނަނިކޮށް ދިމާވިއެވެ. ޝީމާ ސަލާމްގޮވާލުމުން، އިބްރާހިމްފުޅު ހިނިތުންވެލަމުން ޖަވާބުދިނެވެ. މިހާ ލަސްކޮއްލާފައި ތިއަންނަނީ ކޮންތާކުންތޯ އިބްރާހިމްފުޅު އެހުމުން އެމީހުން އެއަންނަނީ ފާއިޒުމެންގެ ގެއަށް ގޮސްފައި ކަމަށް ޝަރީފާ ޖަވާބު ދިނެވެ. އިބްރާހިމްފުޅާ ވަކިވެލުމަށްފަހު، ޝަރީފާ އާއި ޝީމާ ހިނގައިގަތީ ގެއާއި ދިމާލަށެވެ. މަގުމަތީގައި ހިނގަމުންދާއިރު، ޝަރީފާ ޝީމާއަށް ދެން ކުރިއަށް ދާންވީ ގޮތް ކިޔައިދެމުން ދިޔައެވެ.
ޝަރީފާ އާއި ދަރިފުޅު ޝީމާ ގެއަށް އައިސް ވަދެވުނު އިރު އެމީހުން ތިބީ ވަރަށް ވަރުބަލިވެފައެވެ. ދުވަހުގެ ބުރަ މަސައްކަތުން ހަށިގަނޑު ވަރުބަލިވެފައިވާކަން އެމީހުންގެ މޫނުމަތިން ފެންނަން ހުއްޓެވެ. ޝަރީފާ ސޯފާގައި އިށީނދެލިއެވެ.
"އާހް! މިއަދު ވަރަށް ވަރުބަލިވެއްޖެ. މަންމަ ވެސް އަރާމުކޮށްލާ. ދެން ކުޑައިރުކޮޅަކުން ކާނީ" ޝީމާ ބޯޖަހާލަމުން ބުންޏެވެ.
"އާނ ދަރިފުޅާ. އަހަރެންވެސް ކުޑަކޮށް އިށީނދެލާނަން. ދަރިފުޅު ބޭނުންނަމަ މަންމަ ކައްކަން ފަށާނަން. މަންމައަށް އެނގޭ ރަނގަޅު ކާއެއްޗެހި ތައްޔާރުކުރަން." ޝަރީފާ ހިނިތުންވެލަމުން ޖަވާބުދިނެވެ.
ޝީމާ އިތުރަށް ވާހަކަދައްކަން އުޅުނު ނަމަވެސް، ޝަރީފާ އަވަހަށް ތެދުވެ ބަދިގެއާ ދިމާލަށް ދިޔައެވެ. "އަހަރެން މިރޭ ކުޅިހިކި މަހާއި ރޮށި ހަދާނަން. އެއީ ދަރިފުޅަށް ކަމުދާނެ އެއްޗެއް" ޝަރީފާ ބުންޏެވެ.
"އާނ، އެއީ ވަރަށް މީރު ކެއުމެއް. ޝުކުރިއްޔާ" ޝީމާ ޖަވާބުދިނެވެ.
ޝަރީފާ ކައްކަން ފެށުމުން، ޝީމާ ސޯފާގައި އޮށޯވެލައިގެން އަރާމުކޮށްލިއެވެ. އޭނާގެ ހިތުގައި އުފެދުނީ މަންމަގެ އޯގާތެރިކަމާ މެދު ޝުކުރުވެރިކަމެވެ. ކުޑައިރުކޮޅެއްގެ ތެރޭގައި ބަދިގެއިން ކާއެއްޗެހީގެ މީރުވަސް ދުވަން ފެށިއެވެ.
"ޝީމާ، ކާން ތައްޔާރުވެއްޖެ. ތެދުވެ އަތްދޮވެލާ" ޝަރީފާ ގޮވާލިއެވެ.
ދެމީހުން އެކީ މޭޒު ދޮށުގައި ތިބެ ކައި ނިމިގެން ބަދިގެ ސާފުކޮއްލުމަށްފަހު ގޮސް ކޮޓަރިއަށް ވަނީ ނިދާލާށެވެ. ދެމީހުންވެސް ގޮސް ވަނީ އެމީހެއްގެ ކޮޓަރިއަށެވެ.
= ނުނިމޭ =
