ކަމަކާމެދު އިންސާނާ ވިސްނައި އޭނާގެ އަމަލުތައް މުރާޖަޢާކޮށް އޭނާގެ ކަންތައްތަކަށާއި ހާލަތްތަކަށް ބަލައި ވަޒަންކުރާއިރު އޭނާ ހަނުހުރުމުގެ އަތަށް ލެނބެއެވެ. ހަނުހުރުމަކީ މުއުމިނުންގެ ސިފަތަކުގެތެރޭގައި ހިމެނޭ ސިފައެކެވެ. އެއީ ބުއްދިވެރީންނާއި ވިސްނުންތެރީންގެ ސިފައެކެވެ.
ﷲ ތަޢާލާ އާއި އެކަލާނގެ ރަސޫލާ މީސްތަކުންނަށް ގޮވައިލައްވަނީ ހަނު ހުރުމަށެވެ. އަނގަގަދަ ނުކުރުމަށެވެ. ބުއްދިވެރި ގޮތަކީ މަސްލަހަތެއް ނެތް ނަމަ ހަނުހުރުމެވެ. ބޭކާރު ވާހަކަތައް ނުދެއްކުމެވެ.
ހިފެހެއްޓުމެއްނެތި ދުލަކީ ޝައިޠާނާގެ އަތަށް ދޫކޮށްލެވޭ ވައުގަނޑެކެވެ. ފަހެ އޭނާ ބާޠިލު ވާހަކަތަކާ ދުރުހެލިވެ ހުރެއްޖެނަމަ އޭނާ ވާނީ ސުވަރުގޭގެ އަހުލުވެރިއަކަށެވެ. އޭނާ ބާޠިލުވާހަކަދައްކަން ފަށައިފިނަމަ ޝައިޠާނާ އޭނާ އަތްއަތަށް ދަމާން ފަށައިފާނެތެވެ. އެކަލޭގެ އެދޭގޮތަށް އެދޭ ކޮންމެ ވަގުތަކު އޭނާ އަނބުރައިލައިފާނެއެވެ. އިންސާނާއަށް އޭނާގެ ބަސްތައް ކޮންޓްރޯލު ނުކުރެވިއްޖެނަމަ އޭނާއަކީ އަނގަ ހުތުރު ހިތް ފަސާދަވެފައިވާ މީހަކަށް ވެދާނެއެވެ.
އިންސާނާ ވަޒަން ކުރެވޭނީ އޭނާގެ ދުލުން ބުނާ ބަސްތަކުންނެވެ. އޭނާ ހަނުހުރެއްޖެނަމަ އޭނާއާ މެދު ނިޔާއެއް ކަނޑައަޅާކަށް ނޭނގޭނެއެވެ. އޭނާ ވާހަކަދައްކައިފިނަމަ އޭނާގެ ޝަހުސިއްޔަތު ފާޅުވާނެއެވެ. ހަރުދަނާކަމާއި ދޯހަޅިކަން ފެނިދާނެތެވެ.
މުއުމިނާއަކީ އޭނާގެ ދުލުން ރައްކައުތެރިވާ މީހެކެވެ. އަމަލު ގިނަކޮށް ބަސް މަދުކުރާ މީހެކެވެ. މުއުމިނާ ވާހަކަދައްކާނީ އޭނާގެ ނަފްސަށާއި އޭނާގެ މުޖުތަމައަށާއި އޭނާގެ ވަޠަނަށް ފައިދާ ހުރި ކަންކަމުގައެވެ. ހަނުހުރުމުގެ އިމަކީ ތިމާއާއި ބެހޭ ކަންްކަމުގައި ރިވެތި ބަހުން ބަސްބުނުމެވެ. ތިބާ މިއަދު ބުނާ ކޮންމެ ކަލިމައަކާ ބެހޭ ގޮތުން ޤިޔާމަތްދުވަހުން ތިބާއާ ސުވާލުކުރެވޭނެތެވެ. އެހެންކަމުން ވާހަކަ ދައްކަންވާނީ މިކަމަށް ސަމާލުވެގެންނެވެ.
މައުލޫމާތު: ހުކުރު ޚުޠުބާ
