މިއަދުގެ ހުކުރު ޚުތުބާގައި ފާހަގަކޮށްފައިވާގޮތަށް ސުވަރުގޭގެ ނިޢުމަތްތައް ލިބޭނީ ފާފަތަކާއި، މުންކަރާތްތަކާ ދުރުހެލިވާ މީހުންނަށެވެ. އަދި މައިންބަފައިންނަށް އިޙްސާންތެރިވެ ފަރުޟު 5 ނަމާދު އަދާކޮށް ޒަކާތްދީ ރޯދަހިފައި ޞާލިޙު ޢަމަލު ކުރާ މީހުންނަށެވެ.
ޚުތުބާގައިވަނީ މާތްﷲ އަށް ތަޤުވާވެރިވުމަށް ގޮވާލާފައެވެ. ދިންނަވައި ނަސީބު ލިބެނިވި މީހުންނަކީ ތަޤުވާވެރިންކަމަށާއި، ﷲ އަށް ބިރުވެރިވުމަށް އޮތް އެންމެ ރަނގަޅު ވަސީލަތަކީ ތަޤްވާވެރިވުން ކަމުގައި ބުނެފައިވެއެވެ. އަދި ސުވަރުގޭގެ އަހުލުވެރިންނަށްޓަކައި މާތްﷲ ތައްޔާރު ކުރައްވާފައިވާ ގަނޑުވަރުތަކަކީ އިންސާނަކު ދުވަހަކު ލޮލުން ނުދެކޭހައި ފުރިހަމަ ތަންތަން ކަމަށެވެ.
" ސުވަރުގޭގެ މިސާލަކީ އެތާނގައި ތަޢައްޔަރުކަމެއް ނުވާ، ސާފު ފެނުގެ ކޯރުތަކާއި، އޭގެ ރަހަ ތަފާތު ނުވާ ކިރުގެ ކޯރުތަކާއި، ސާފު މާމުއިގެ ކޯރުތައްވާ ސުވަރުގެ. ހުރިހާ ބާވަތެއްގެ މޭވާތަކާއި ފާފަ ފުއްސެވުން ހުރި. ސުވަރުގެވަންތަވެރިންގެ ކާބޯތަކެއްޗަކީ ލައްޒަތާއި، މީރު ރަހަތަކާއި ހިތްހަމަޖެހުން، އެންމެމަތީ ދަރަޖައަށް ލައްވާފައިވާ ތަކެތި" ހުކުރު ޚުތުބާގައިވެއެވެ.
އިންސާނާގެ ދުނިޔަވީ ހަޔާތުގެ ހުރިހާވެސް މަޤުސަދަކީ އާޚިރަތުގެ ބާއްޖަވެރިކަން ޙާސިލުކުރުން ކަމަށާއި، ދުނިޔޭގައި ހެޔޮ ޢަމަލުކޮށް މާތްﷲ އާއި އެކަލާންގެ ރަސޫލާ މުހައްމަދު ސައްލައްﷲ ޢަލައިހި ވަސައްލަމް އަންގަވާފައިވާ ގޮތަށް އުޅޭ މީހުންނަށް ހުރިތަނަކީ ނިޢުމަތްތަކުން ފުރިގެންވާ ސުވަރުގެ ކަމަށް ޚުތުބާގައި ފާހަގަކޮށްފައިވެއެވެ.
