ވެލާނާ އިންޓަނޭޝަނަލް އެއަރޕޯޓް ވީ.އައި.އޭ އަކީ ދިވެހިރާއްޖޭގެ ތަރައްގީގެ އެންމެ މުހިންމު ބައިވެރިޔާ ކަމަށާއި އެމް.އޭ.ސީ.އެލް އަކީ ދިވެހިރާއްޖޭގެ އިޤްތިސާދު ކުރިއެރުމުގެ އެންމެ ބޮޑު އެއް ހިއްސާދާރު ކަމަށް އެމްއޭސީއެލްގެ މެނޭޖިންގ ޑައިރެކްޓަރ އިބްރާހީމް ޝަރީފު މުހައްމަދު ވަނީ ވިދާޅުވެފައެވެ.
އެއަރޕޯޓްގެ ތަރައްގީއަށް ގިނަގުނަ މަސައްކަތްތަކެއް މިސަރުކާރުން ދަނީ ކުރަމުންނެވެ. މިގޮތުން އެއަރޕޯޓްގެ އޮޕަރޭޝަންސްއަށް ވަރަށް ބޮޑެތި ބަދަލުތަކެއް ގެނެސް މުވައްޒަފުންގެ ހުނަރު އިތުރު ކުރުމަށް ތަމްރީން ޕްރޮގްރާމްތައް ހިންގާ ގިނަގުނަ މަސައްކަތްތަކެއް އައު މެނޭޖްމަންޓުން ދަނީ ކުރަމުންނެވެ.
މިގޮތުން ނޮވެންބަރު މަހުގެ 7 ވަނަ ދުވަހު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހުޅުއްވައިދެއްވި ވެލާނާ އިންޓަރނޭޝަނަލް އެއަރޕޯޓުގެ އައު ފިއުލް ފާމް އާއި ފިއުލް ހައިޑްރަންޓް ސިސްޓަމް އަކީ ބޮޑެތި އިންގިލާބީ ބަދަލުތަކެއް ގެންނާނެ ތަރައްޤީއެއް ކަމަށް ޝަރީފު ވަނީ ވިދާޅުވެފައެވެ.
އައު ފިއުލް ފާމް އަދި ފިއުލް ހައިޑްރަންޓް ސިސްޓަމް ޤާއިމުކޮށްފައިވަނީ ކުރީގެ ފެސިލިޓީއަށްވުރެ ތިން ގުނަ ބޮޑު، 37,000 އަކަފޫޓުގެ ސަރަޙައްދެއްގައެވެ. އައު ފިއުލް ފާމް އަދި އައު ފިއުލް ހައިޑްރަންޓް ސިސްޓަމް ގާއިމު ކުރުމުގެ މަޤްޞަދަކީ ވެލާނާ އިންޓަރނޭޝަނަލް އެއަރޕޯޓުގެ އިތުރުވަމުންދާ އޮޕަރޭޝަނަލް ބޭނުންތަކަށް އެކަށީގެންވާ ގޮތެއްގައި އެހީތެރިވެދިނުމެވެ. މި ފެސިލިޓީގައި 45 މިލިއަން ލީޓަރުގެ ޖެޓް އޭ1 (އޭ-ވަން) ތެޔޮ ރައްކާކުރެވޭނެއެވެ. މީގެ އިތުރުން ޑީސަލް އަދި ޕެޓްރޯލްގެ ރިޒާވްވެސް ހިމެނިފައިވެއެވެ.
އައު ފިއުލް ހައިޑްރަންޓް ސިސްޓަމްގައި 8.4 ކިލޯމީޓަރުގެ ދިގުމިނުގެ ވިއުގައެއް ވަނީ ޤާއިމުކޮށްފައެވެ. މި ވިއުގައަކީ ތެޔޮ ރައްކާކުރާ ތަނުން ފެށިގެން މަތިންދާބޯޓުތައް ޕާކުކުރާ ސަރަޙައްދާ ހަމައަށް ސީދާ ގުޅިފައިވާ ވިއުގައެކެވެ. މި ނިޒާމުގެ ސަބަބުން އެއަރސައިޑުގައި އުޅަނދުތަކުގެ ޙަރަކާތްތެރިވާ މިންވަރު މަދުވެ، ސަލާމަތްތެރިކަން އިތުރުވެގެންދާނެއެވެ. މީގެ އިތުރުން މި ނިޒާމުގެ ސަބަބުން ތެޔޮ އެޅުމަށް ހޭދަވާ ވަގުތު މަދުވެ، އަވަސް އަދި ރައްކާތެރިގޮތެއްގައި ތެޔޮ އެޅުމުގެ ނިޒާމެއް އެއަރލައިންތަކަށް ފަހިވެގެންދާނެއެވެ. އަދި ކުރިމަގުގެ ޑިމާންޑަށް ތައްޔާރުވުމުގެ ފުރުޞަތު ލިބިގެންދާނެއެވެ. އަދި ކޮންމެ ޙާލަތެއްގައިވެސް މެދުނުކެނޑި ޚިދުމަތް ފޯރުކޮށްދިނުމުގެ މަގު ފަހިވެގެންދާނެއެވެ.
ވެލާނާ އިންޓަރނޭޝަނަލް އެއަރޕޯޓުގެ ހިންގުމުގެ ލަނޑުދަނޑިތަކަށް އަމާޒުކޮށް، ޚާއްޞަކޮށް ސަރަޙައްދުގެ ވައިގެ ދަތުރުފަތުރު އިތުރުވަމުން އަންނަ ދަނޑިވަޅުގައި ތެޔޮ ރައްކާކުރުމުގެ ޖާގަ އިތުރުކުރުމަކީ ވަރަށް މުހިއްމު ކަމެކެވެ. މިހާރު ފުރިހަމައަށް ހިންގަން ފަށާފައިވާ އައު ފިއުލް ފާމާއި، ހައިޑްރަންޓް ސިސްޓަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ 20 އަހަރުގެ މާސްޓަރ ޕްލޭނާ އެއްގޮތަށް ވެލާނާ އިންޓަރނޭޝަނަލް އެއަރޕޯޓް ކުރިއަރުވައި، މި އެއަރޕޯޓް ފުރަތަމަ ދަރަޖައިގެ އޭވިއޭޝަން ހަބަކަށް ބަދަލުކުރުމުގެ މަސައްކަތް އިތުރަށް ހަލުވިވެގެންދާނެ ކަމަށް އެމްއޭސީއެލް އިން ވަނީ މައުލޫމާތުދީފައެވެ.
