އަހަރެންގެ މޭޒުމަތީގައި އޮތް ސިޓީ އުރައަށް ބަލަހައްޓައިގެން އިނދެވުނީ ކިހާއިރެއް ވަންދެން ކަމެއް ނޭގެއެވެ. އެ ސިޓީ އުރައިގެ ތެރޭގައި ވާނީ ކޮން އެއްޗެއްކަން އަހަރެންނަށް އެނގޭއިރު، އެ ކިޔާލުމުގެ ހިތްވަރު ފާއިތުވި ދުވަސްތަކުގައި ނުލިބުނެވެ. އެއީ އަހަރެން އެސިޓީ ކިޔަން ބޭނުންނުވާތީއެވެ. އެއީ އަހަރެން މިދުނިޔެމަތިން އެންމެ ފޫހިވި އަދި އަހަރެންގެ ކުރީގެ އަނބިމީހާ އައިޝާ އަހަންނަށް ފޮނުވި ސިޓީއެކެވެ. އެސިޓީ އެއީ މީގެ އަހަރެއްހާ ދުވަސް ކުރިން އައިޝާ އަހަންނަށް ފޮނުވި ސިޓީއެކެވެ. ނަމަވެސް، ހިތްވަރު ކޮއްލާފައި އެންމެ ފަހުން އަހަރެން ސިޓީ އުރަ ކަނޑާލީމެވެ. ސިޓީގައިވާ ލިޔުންތަކަށް ލޯ ހުޅުވާލެވުނު ހިނދު، އަހަރެންގެ ހިތަށް ކުއްލި ސިހުމެއް އައެވެ. އެ ސިޓީގައި ވަނީ އަހަރެންގެ ކުރީގެ އަނބިމީހާގެ ވާހަކައެވެ. އެއީ އޭނަގެ އަތުލިޔުމެވެ. ހިތްވަރުކޮއްލާފައި ސިޓީ ކިޔަންފަށައިފީމެވެ.
އޭ ލޯބިވާ އަކްރަމެވެ. ހިތުގެ އަޑިން އަންނަ ރުއިމުގެ އަޑު އިވެއެވެ. ކަލާ ވަކިވުމުގެ ވޭނުގައި ހިތް ފުރިގެންދެއެވެ. ދަންވަރުގެ ހިމޭން ވަގުތުތަކުގައި، އަހަރެމެންގެ ހަނދާންތައް އެމަންޒަރުތަކުގެ ތެރެއަށް ހިތް ދަތުރުކުރަމުންދެއެވެ. ކަރުނައިގެ ކޯރުތަކުގައި ހިތް ފީނަމުންދެއެވެ. ޚިޔާލުގެ ފުން ކަނޑުގެ އަޑިއަށް ގެނބެމުންދެއެވެ. އެ ވޭނުގެ ބާނިތަކުން ސަލާމަތްވުމަށް މަސައްކަތް ކުރި ނަމަވެސް އެކަން ކާމިޔާބެއް ނުވިއެވެ. އަހަރެންގެ ހިތް ކަލާގެ ލޯތްބަށް އެދި، ހިތް އާދޭސްކުރަނީއެވެ. ހަމަޔަޤީނުންވެސް ކުރީގެ ލޯބީގެ ހަނދާންތަކަށް، ހަނދާއި ތަރިތައް ހެކިވާނެއެވެ. އަހަރެމެންގެ ލޯބީގެ ވާހަކަތަކުގައި ބައިވެރިވެ އެކަމަށް ފުރުސަތުދިން ވައިރޯޅިތައްވެސް ހެކިވާނެވެ. އަދިވެސް ލޯބީގެ މަސްތުކަމުން ފުރުނު އެ ރޭދުވާ، ހިތުން ފިލައިގެން ނުދެއެވެ. އޭ އަހަރެންގެ ލޯބިވާއެވެ. ބުނެދީބަލާށެވެ. މި ހުރިހާ ކަމެއް ޤަދަރާ ގުޅުވަންވީ ހެއްޔެވެ. އަހަރެމެންގެ ގުޅުން އަލުން ނުލިބޭނެ ހެއްޔެވެ. ނަމަވެސް، މިގޮތަށް އުމުރަށް ތިބާގެ އިންތިޒާރުގައި ހުރުމަށް އަހަރެން ތައްޔާރަށް ހުރީމެވެ.
އަހަރެންގެ ލޮލުން ކަރުނަ ފައިބަން ފެށިއެވެ. މި ސިޓީ ކިޔުނުއިރު އައިޝާ ދުނިޔޭގައި ނެތްކަން ހަނދާންވިއެވެ. އަހަރެންނަށް މި ސިޓީ ކުރިން ކިޔުނު ނަމަ، ކިހާ ރަނގަޅު ހެއްޔެވެ. އައިޝާ އާއި އެންމެ ފަހު ބައްދަލުވުމެއް ބޭއްވުނު ނަމަ، ކިހާ ރަނގަޅު ހެއްޔެވެ. އެކަމަކު އަހަރެން އައިޝާ ދެކެވީ ފޫއްސަކުން އައިޝާގެ މޫނު ދެކެންވެސް ބޭނުން ނުވީއެވެ. އަހަރެން އައިޝާއާ ދޭތެރޭ ޝައްކު އުފެދުނެވެ. މަންމަ ގާތުގައި އައިޝާއާ ބެހޭގޮތުން މީހަކު ވާހަކަތަކެއް ބުނެފައިވާ ކަމަށް މަންމަ އަހަރެންގެ ގާތުގައި ބުނިއެވެ. އައިޝާ އެހެން ފިރިހެނަކާއި ގުޅުން އޮންނަ ވާހަކައެވެ. އަހަރެންނަށް މިކަން ވަރަށް ކަންބޮޑުވިއެވެ. އަހަރެން އައިޝާއާ ވާހަކަ ދައްކަން ނިންމީމެވެ. އޭނާއާ ސުވާލުކުރީމެވެ. އައިޝާ ވަރަށް ހިތްވަރާއެކު ޖަވާބުދިނެވެ. އޭނާ ބުނީ އެއީ ދޮގު ވާހަކައެއް ކަމަށާއި، އޭނާ އަކީ އެފަދަ މީހެއް ނޫން ކަމަށެވެ. އަދި ދުވަހަކުވެސް އަހަރެންނަށް ބޭވަފާތެރިއެއް ނުވާނެ ކަމަށެވެ. ނަމަވެސް، އަހަރެންނަށް އައިޝާގެ ވާހަކަ ގަބޫލެއް ނުކުރެވުނެވެ. އަހަރެން ވަރަށް ރުޅިއައީމެވެ. އަދި އައިޝާއަށް ބުނީމެވެ. އަހަރެން އައިޝާ ވަރިކުރަން ބޭނުންވާ ކަމަށެވެ. އައިޝާއަށްވަރަށް ރޮވުނެވެ. އަދި އަހަރެންނަށް ފަހުން ވިސްނޭނެކަމަށް އައިޝާ ބުންޏެވެ. އަހަރެންގެ ހިތުގައި އޮތް ފޮނިކަމާއި ބޮޑާކަމުގެ ސަބަބުން، އައިޝާގެ ތެދުވެރި ބަސްތަކަށް ކަންފަތް ބީރުކޮށްލީމެވެ. އައިޝާގެ ކަރުނައިގެ ވިދުވަރު ފެނުނު ނަމަވެސް، އަހަރެންގެ ހިތުގައި އޯގާތެރިކަމުގެ އިހުސާސެއް ނުވިއެވެ. އަހަރެންގެ ދުލުން ނުކުތް ހަރުކަށި ބަސްތަކުން، އައިޝާގެ ހިތް ފުނޑުފުނޑުވެގެން ދިޔައެވެ. "ދެން ނުޖެހޭނެ ތިޔަ ދޮގުވެރި މޫނު އަހަރެން ދެކޭކަށް! ނިކުމޭ މިގެއިން!" އަހަރެން ހަޅޭއްލަވާލީމެވެ. އައިޝާ ބޯ ތިރިކޮށްލައިގެން ހުރެ، ލޮލުން އޮހޮރެމުންދިޔަ ކަރުނަ ފޮހެލަމުން ގެއިން ނިކުތެވެ. އައިޝާ ދިޔަ ދިމާއަކަށް ބަލާލުމުގެ ބަދަލުގައި، އަހަރެން ދިޔައީ ގޭތެރޭގައި ހުރި އަގުބޮޑެތި ތަކެއްޗަށް ބަލަމުންނެވެ. މާލޭގެ އެންމެ މުއްސަނދި އާއިލާތަކުގެ ތެރެއިން އާއިލާއަކަށް ނިސްބަތްވާ މީހަކަށް ވުމުގެ ފަޚުރުވެރިކަން އަހަރެންގެ ހިތުގައި އޮތެވެ. އެހެން މީހުންގެ އިހުސާސްތަކަށް އަޅާލުމުގެ ބަދަލުގައި، އަހަރެންގެ މުދަލާއި ފައިސާގެ މައްޗަށް ބަރޯސާވެ ހުރީމެވެ.
ދުވަސްތައް ފާއިތުވަމުން ދިޔަވަރަކަށް، އަހަރެންގެ ހިތުގައި ހުސްކަމެއް އިހުސާސްވާން ފެށިއެވެ. އައިޝާގެ ހިނިތުންވުމާއި، އޯގާތެރި ބަސްތަކާއި، އަޅާލުންތެރި ޢަމަލުތައް ހަނދާންވާން ފެށިއެވެ. އަހަރެން އެވާހަކަތައް މަންމަ އާއި ހިއްސާކުރީމެވެ.
"އަދިވެސް އެ އައިޝާގެ މަތިން ހަނދާން ނުނެތޭ ދޯ" މަންމަގެ ހަރުކަށި ބަސްތައް އިވުނެވެ.
"ކާކު ބުނީ އެވާހަކަ. މަންމަ ދެކުނިންތަ. އަހަންނަކަށް ދުވަހަކުވެސް އެކަހަލަ ވާހަކައެއް އަޑެއް ނީވޭ" އަހަރެން މަންމައަށް ޖަވާބު ދިނީމެވެ.
"ދެން ކިހިނެތް އެކަހަލަ ނިކަމެތި މީހަކާއި އިނދެގެން ދަރިފުޅަށް ރަނގަޅު ދިރިއުޅުމެއް ލިބޭނީ. އެމީހުން ބޭނުންވާނީ އަހަރެމެންގެ މުއްސަނދިކަން. ފައިސާ. އެނޫން އެއްޗެއް އެމީހުން ބޭނުމެއް ނުވާނެ" މަންމަގެ ވާހަކަ ވަރަށް ހަރުކައްޓެވެ.
އަހަރެން މަންމަ އާއި އިތުރަށް ވާހަކަ ދައްކާކަށް ބޭނުމެއް ނުވިއެވެ. އަހަރެން ގޮސް ކޮޓަރިއަށް ވަދެ ދޮރު ލައްޕައިލީމެވެ. އަހަރެން ބޭނުންވީ އެވާހަކަތަކުގެ ހަގީގަތް ހޯދާށެވެ. މަންމަ އަބަދުވެސް ދައްކަމުން އައި އައިޝާގެ ވާހަކަ އަހަރެންގެ ހިތުގައި އުފެދިފައިވާ ސުވާލުތަކުގެ ސަބަބުން، އެ ވާހަކައިގެ ހަގީގަތް ހޯދުމަށް އަހަރެން ބޭނުންވެފައިވާ ވަރު ބޮޑެވެ. އެއްވެސް މީހަކު އައިޝާ ކިޔައިގެން ގޯސް ވާހަކައެއް ދެއްކި އަޑެއް ދުވަހަކުވެސް އަހަރެން ނާހަމެވެ. ނަމަވެސް މަންމަ އައިޝާއޭ ކިޔައިގެން އެކި މީހުންގެ ގާތުގައި ވާހަކަ ދައްކާފައިހުރިކަން އެމީހުންގެ ވާހަކަތަކުން އެނގެއެވެ. އަހަރެން ކުރި މަސައްކަތުން އެނގުނީ މަންމަ އައިޝާދެކެ އެހާ ހިތްހަމަނުޖެހެނީ އައިޝާ އަކީ ފަގީރު އާއިލާގެ މެންބަރަކަށް ވީތީއެވެ. މިކަމުގެ ހަގީގަތް އެނގުމުން އަހަރެންގެ ހިތަށް ވަރަށް ބޮޑު ހިތާމައެއް ލިބުނެވެ. އަހަރެން ނިންމީ މަންމައަށް އޯގާތެރިވެ، ލޯތްބާއި އިޚްތިރާމާއި އެކު އެ ވާހަކަ މަންމައަށް ކިޔައިދޭށެވެ. އަހަރެން މަންމަ އާއި އެހުރިހާ ވާހަކައެއް ދެއްކި ނަމަވެސް މަންމަގެ ވާހަކަ ހުރީ މުއްސަނދިކަމާއި ފަގީރުކަމުގެ ތަފާތު ދެއްކުމުގެ ރާގެއްގައެވެ. އަހަރެންގެ ހިތް ރޮމުން ދިޔައީ އަލުން އައިޝާ އާއި ބައްދަލު ކޮއްލާށެވެ. އެހެނަސް އެކަން ފޮރުވައިގެން މަންމައަށް ހިނިތުންވެލާން މަސައްކަތް ކުރީމެވެ. އަހަރެންގެ ވާހަކަ މަންމަ ޤަބޫލުނުކުރި ނަމަވެސް، އަހަރެން މަންމައާ ދިމާލަށް ނުރުހުމުގެ އެއްވެސް އެއްޗެއް ބުނާކަށް ބޭނުމެއް ނޫނެވެ. އަހަރެންގެ އުމުރުން ދެ އަހަރުގައި ބައްޕަ ނިޔާވި ފަހުން، އަހަރެންގެ ހުރިހާ ކަމެއް ބަލަހައްޓަނީ މަންމައެވެ. މަންމަ އަހަރެންނަށް ދިން ލޯބި ބަޔާންކޮށް ނުދެވޭހާ ގިނައެވެ. އެހެންނަމަވެސް، އެންމެފަހުން އަހަރެންގެ ލޯބިވާ މަންމަގެ އެދުމަށް ފުރަގަސްދިނީމެވެ. އެއީ އަހަރެންގެ ހިތުގެ އަޑަށް ކިޔަމަންވުމުގެ ސަބަބުންނެވެ. އަހަރެން އައިޝާ ހޯދަން ނިކުތީމެވެ. އައިޝާމެންގެ ރަށަށްވެސް ދިޔައީމެވެ. ނަމަވެސް އައިޝާއާ ދިމަލެއް ނުވިއެވެ. އައިޝާ ވީ ބަލިވެގެން ރާއްޖެއިން ބޭރުގައެވެ. އަހަރެން ވަރަށް ދެރަވިއެވެ. އަހަރެން އައިޝާގެ އާއިލާގެ ފަރާތުން މަޢުލޫމާތު ހޯދަން ކުރި މަސައްކަތްވީ ބޭކާރެވެ. އެމީހުން އައިޝާގެ އެއްވެސް ޚަބަރެއް އަހަރެންނަށް ދޭކަށެއް ބޭނުމެއް ނޫނެވެ. އެއީ އެމީހުން ބުނާގޮތުން އައިޝާގެ ހާލު މިހާރު ހުރިގޮތުން އިތުރު ހިތްދަތިކަމެއް ދޭން އެމީހުން ބޭނުން ނުވާތީކަމަށް އެމީހުން ބުންޏެވެ. ހިތާމައާއެކު އަނބުރާ އައީމެވެ. އެނބުރި މާލެ އައިސް އަހަރެން އައިޝާއަށް ގުޅޭތޯ ބެލީމެވެ. ނަމަވެސް އައިޝާއަށް ގުޅޭ ގޮތެއް ނުވިއެވެ. ހިތުގައި ކުއްލި ބިރެއް އުފެދުނެވެ. އަވަސް އަވަހަށް އައިޝާ އުޅޭ ތަނެއް ހޯދަން މަސައްކަތް ކުރީމެވެ. އެތައް ގުޅުމަކަށްފަހު، އެތައް ބަޔަކާ ސުވާލުކުރުމަށްފަހު، ފަހުން އެނގުނީ އައިޝާ އިންޑިއާގެ ކޮޗިންގައި ހުރިކަމެވެ.
އަހަރެންގެ މަންމަ މަނާކުރި ނަމަވެސް، އަހަރެން އިންޑިއާއަށް ފުރީމެވެ. ހިތުގެ އަޑުއަހައި، އައިޝާ ދެކެ ލޯބިވާ މިންވަރު ދައްކުވައިދޭން ބޭނުންވީމެވެ. ހޮސްޕިޓަލަށް ވަދެވުނު އިރު، އައިޝާގެ ވަށައިގެން އާއިލާގެ މީހުން ތިއްބެވެ. އައިޝާގެ މަންމައާއި ބައްޕަގެ މޫނުމަތިން ފެންނަނީ ފުން ހިތާމައެވެ. އެދެމީހުން އައިޝާގެ ބޮލުގައި ހިފަހައްޓައިގެން ތިއްބެވެ.
އައިޝާ އޮތީ ލޯމަރައިގެންނެވެ. އަހަރެންނަށް ބޭއިޚްތިޔާރުގައި ގޮވައިލެވުނެވެ. އައިޝާ އަށް އަޑު އިވުމާއެކު، އައިޝާ އެންމެ ސިކުންތަކަށް ނަމަވެސް ލޯ ހުޅުވައިލިއެވެ. އަހަރެންނަށް އޭނާގެ މޫނަށް ބަލަހައްޓައިގެން ހުރެވުނީ ކަރުނައިގެ ތެރެއިންނެވެ. އައިޝާ އަހަރެންގެ މޫނަށް ބެލުމަށްފަހު، ފުން ނޭވާއެއް ލައި، ލޯމަރައިލިއެވެ. އެއީ ތާއަބަދަށް، މުޅި އުމުރަށް ލޯމަރައިލީމެވެ. އެންމެފަހު ވަގުތު ވެސް އަހަރެންނާ ދިމާލަށް ބަލައިލުމަށްފަހުގައެވެ. އެ ވަގުތު އަހަރެންގެ ދުނިޔެ ބަނަވެގެން ދިޔައެވެ. އައިޝާގެ ފަހު ބަލައިލުމުގައި އޮތް ލޯބި އަދިވެސް އަހަރެންގެ ހިތުގައި ވަނީ ތާޒާކޮށެވެ.
އައިޝާގެ ޖަނާޒާގެ ކަންތަކުގައި އަހަރެން ބައިވެރިވީމެވެ. އަހަރެން ބަލަން ހުއްޓާ އައިޝާގެ ސަންދޯއް ވަޅުގަނޑަށް ތިރިކުރި ވަގުތަކީ އަހަރެންނަށް ބަލަން ފަސޭހަވި މަންޒަރެއް ނޫނެވެ. ހިތުގައި ކުރިން އިހުސާސް ނުވި ވަރުގެ ވޭނެއް އިހުސާސްވިއެވެ. އައިޝާގެ ހަނދާންތައް ހިތުގައި އާވަމުން ދިޔައެވެ.
ޖަނާޒާގެ ކަންތައް ނިމި ގެއަށް ދިއުމުގެ މަގުމަތީގައި އަހަރެން އައިޝާއަށް ވީ ގޮތެއް އޭނަގެ މަންމަގެ ގާތުން އަހައިލީމެވެ. އައިޝާގެ މަންމަ ކަރުނަ އަޅަމުން ވާހަކަ ދައްކަން ފެށިއެވެ.
"އަކްރަމާއި އިނދެގެން އުޅުނު އިރު އައިޝާގެ ބަނޑުގައި ރިއްސާތީ އުޅުނީ. އެކަމަކު އަކްރަމްގެ މަންމަގެ ކަންތައް ހުރިގޮތުން އައިޝާއަށް އެވާހަކަ ދައްކަން ނުކެރުނީ. އަދި ޑޮކްޓަރަށް ދައްކަންވެސް ޖެހިލުންވީ އަކްރަމްގެ މަންމަގެ ސަބަބުން" އައިޝާގެ މަންމަ ބުންޏެވެ.
"އަހަރެންނަށް އެއިރު ނުވިސްނުނީ. އައިޝާ ބަލިކަމެއްވެސް ނޭނގުނު. އެކަމަކު ކޮންމެވެސް ކަމަކާއި މޫޑު އޮފްވެފައި ހުންނާތީ ފެންނަނީ" އަހަރެންނަށް ރޮވުނެވެ.
"އައިޝާ ބަލިވާތީ އަހަރެމެން ޑޮކްޓަރަށް ދައްކާ ޓެސްޓް ހެދީމަ އެނގުނީ އައިޝާއަށް ކެންސަރު ޖެހިފައިވާކަން" އައިޝާގެ މަންމަގެ ވާހަކަ ހުއްޓުނެވެ.
އަހަރެން ޖެހިގެން އައި ދުވަހު މާލެ އައީމެވެ. މާލެ އައުމުން މަންމަ އަހަރެންނާއި އެއްވެސް ވަރަކަށް ވާހަކަ ނުދެއްކިއެވެ. އަހަރެން އެކަމާ އަޅައެއް ނުލަމެވެ. އަދި ކަންތައް ވީގޮތް ވަރަށް ތަފްސީލްކޮށް މަންމައަށް ކިޔައި ދިނީމެވެ.
"މަންމާ. ފައިސާއާއި މުއްސަނދިކަމުގައި ޖެހި އަހަރެންގެ ހަޔާތް ބަރުބާދުވެއްޖެ. އަހަރެންގެ ހަޔާތަށްވުރެ މަންމައަށް މުހިންމުވީ ފައިސާއާއި މުދާ. މީގެ ފަހުން އަހަރެން އެއްވެސް މުދަލެއް ފައިސާއެއް ބޭނުމެއް ނޫން. އަދި އަހަރެން ދެން އެހެން މީހަކާއި އިންނާކަށްވެސް ބޭނުމެއް ނުވޭ." މިހެން އަހަރެން ބުނީމެވެ.
އައިޝާގެ ހަނދާންތަކާއި އަހަރެންނަށް ދުރަކަށް ނުދެވުނެވެ. އައިޝާ ނެތަސް އޭނާގެ ތަސްވީރު އަހަރެންގެ ހިތުގައި އުމުރަށް އޮންނާނެއެވެ. އަހަރެންނަށް ކުރިން ވިސްނުނުނަމަދޯއެވެ. އަހަރެންނަށް ކުރިން ރުޅި މަޑުކޮށްލާފައި ކަމުގެ ހަގީގަތް ބެލުނު ނަމަތާއެވެ. އަހަރެންނަށް އަހަރެންގެ ލޯބިވާ އަނބިމީހާއަށް އިތުބާރު ކުރެވުނު ނަމައޭ އަހަރެންގެ ހިތަށް އެރިއެވެ.
ދަރިންގެ ދިރިއުޅުމުގެ ތެރެއަށް މައިންބަފައިން ވަންނަނީ ކީއްވެބާއޭ އަދި އެކަމުގެ ނަތީޖާ އަހަރެންނަށް އިހުސާސް މިއަދު ކުރެވިއްޖެއެވެ. އެކަމަކު ދެން ކުރާނެކަމެއް ނެތެވެ. އައިޝާ މިދުނިޔެ ދޫކޮށް ދިޔައީ ދެން ނާންނަ ގޮތަށެވެ. އަހަރެންނަށް މިހާރު އޮތީ އައިޝާއަށް ހެޔޮ ދުޢާ ކުރުމެވެ. އެކަމަކު އެތަސްވީރެއް ހިތަކުން ނުފޮހެވުނެވެ.
= ނިމުނީ =
