ކީރިތި ޤުރުއާނަކީ މާތް ﷲ އެކަލާނގެ ރަސޫލާ މުހައްމަދު ﷺ އަށް ބާވައިލެއްވި އެކަލާނގެ ކަލާމްފުޅެވެ. ކީރިތި ޤުރުއާނަކީ މާތް ﷲ އިންސާނުންނަށް ތެދުމަގު ދެއްކެވުމަށްޓަކައި ބާވައިލެއްވި އިލާހީ ޤާނޫނެވެ. މުސްލިމުން ދިރިއުޅެންވީ ގޮތުގެ މަންހަޖެވެ. އެހެންކަމުން އަހުރެމެން މުސްލިމުން ކީރިތި ޤުރުއާން ކިޔަވައި އެފޮތާ އެއްގޮތަށް އުޅުމާއި ސުލޫކު ބައްޓަންކުރަން ޖެހެއެވެ. އަހުރެމެންގެ ދަރީންނަށް ކީރިތި ޤުރުއާން އުނގަންނައިދޭން ޖެހެއެވެ. އެކުދިން ހިތްތަކުގައި ކީރިތި ޤުރުއާނުގެ ލޯބި އަށަގަންނުވައި އެފޮތުގެ މަތިވެރިކަމާއި މާތްކަން ދަސްކޮށްދޭން ޖެހެއެވެ.
މިއަދު އަހުރެމެންނަށް ވަނީ ކީރިތި ޤުރުއާން ކިޔަވައި ތިލާވަތު ކުރުމާއި އެ ފޮތަށް ޢަމަލުކުރުން އުނދަގޫ ކަމަކަށްވެފައެވެ. އެކަމުގެ ސަބަބުން އަހުރެމެން ވަނީ ދީނާ ދުރުވެފައެވެ. އަދި ޣައިރު މުސްލިމުންގެ ކުރިމަތީގައި އަހުރެމެން ނިކަމެތިވެފައެވެ.
ކީރިތި ޤުރުއާން ކިޔެވުމާއި ޤުރުއާނަށް އަމަލުކުރުމަކީ އަހުރެމެންގެ މައްޗަށް ވާޖިބު ކަމަކަށްވީ ހިނދު ޤުރުއާނުން މީހާ ޒީނަތްތެރިވުމަކީ ވެސް ވާޖިބު ކަމެކެވެ. އެގޮތުން ތިމާގެ އެތެރެފުށާއި ބޭރުފުށުގެ ޠާހިރުކަމަކީ އެންމެ ފުރަތަމަ ޒީނަތެވެ. ދެވަނަ ޒީނަތަކީ ﷲ އަށް ބިރުވެތިވުމުގައި ތިމާގެ ނަފުސު ޒީނަތްތެރިކުރުމެވެ. ޤުރުއާނުން ޒީނަތްތެރިވުމުގައި ތިންވަނަ ޒީނަތަކީ އެފޮތުގައިވާ އެންމެހައި ކަމެއް ތެދުކުރުމެވެ. ﷲ ގެ އެއްކައުވަންތަކަން ޤަބޫލުކޮށް އީމާންކަމާއި އިސްލާމްކަމުގެ ރުކުންތައް ތެދުކޮށް ޤަބޫލުކުރާނަމަ ތިމާގެ އަމަލާއި ބަސް ދިމާވާން ޖެހޭނެއެވެ.
ކީރިތި ޤުރުއާނުގެ އަޚުލާޤުން ޒީނަތްތެރިވުމަކީ އެކަމުގެ ސަބަބުން ގިނަގުނަ ދަރުމައާއި ސަވާބު ލިބޭނެކަމެކެވެ. އަދި އެއީ ދެދުނިޔޭގެ ބާއްޖަވެރިކަން ލިބޭނެ ކަމެއް ވެސް މެއެވެ.
