މިއަދު ދުނިޔޭގެ އެކިކަންކޮޅުތަކުން އިވެމުންދަނީ ފަލަސްޠީނުގެ އަޑެވެ. އެތަށް ދުވަހެއް ވަންދެން ހިންގަމުންދިޔަ ނަސްލު ނައްތާލުމުގެ އަނިޔާވެރި ހަނގުރާމަ މެދުކަނޑައިލި ވާހަކައެވެ. އެކަމަށްޓަކައި ﷲ ސުބުހާނަހޫ ވަތަޢާލާ އަށް ހަމްދުކޮށް އަހަރެމެންގެ އަޚުންނާއި އުޚުތުންނަށް މަރުހަބާކިޔަމެވެ. އެ ލޮބުވެތި އަޚުންނާއި އުޚުތުންނާ ދެކޮޅަށް ހިންގަމުން ދިޔަ އަނިޔާވެރި ހަނގުރާމައަކީ އިންސާނީ ތާރީޚު ދެކެފައިނުވާފަދަ އަނިޔާވެރިކަން ބޮޑު ހަނގުރާމައެކެވެ. މި ހަނގުރާމަ ހުއްޓާލުމަށް ޞަހްޔޫނީ ނިޒާމަށް މަޖްބޫރުވީ ދެން އެހެން އެއްވެސް ގޮތެއް ނެތިގެންނެވެ. މިއީ ޣައްޒާގެ ރައްޔިތުންނަށް ލިބުނު މަތިވެރި ނަޞްރެކެވެ.
ޣައްޒާގެ ރައްޔިތުންނަށް ލިބުނު ނަސްރުގެ ފަހަތުގައި ވަނީ އީމާންކަމާއި ހިތްވަރާއި ކެތްތެރިކަމާއި އުޚުއްވަތްތެރިކަމާއި ނުގުޑާ ފަދަ އަޒުމެއްގައި ބަދަހިކަމާއެކު ތިބެ ﷲ އަށް ވަކީލުކޮށްގެން ކުރި ވަރުގަދަ ހަނގުރާމައެވެ. މި ހަނގުރާމައިގައި ގާތްގަނޑަކަށް 50،000 މީހުން ވަނީ ޝަހީދުވެފައެވެ. އޭގެ ތެރޭގައި ކުޑަކުދީންނާއި މުސްކުޅީންނާއި އިލްމުވެރީންނާއި ފަލަސްޠީނުގެ މިނިވަންކަމަށްޓަކައި މަސައްކަތްކުރަމުންދިޔަ އެތައް ލީޑަރުން ހިމެނެއެވެ. މުޅި ޣައްޒާ އެވަނީ ބިމާއި ހަމަވެފައެވެ.
ހަނގުރާމަތަކުގައި ނަޞްރު ލިބެނީ ލަޝްކަރުގެ އަދަދު ގިނަކަމާއި ހަތިޔާރުގެ މޮޅުކަމުގެ މައްޗަކަށް ނޫނެވެ. އީމާންކަމާއި ކެތްތެރިކަމުގެ މައްޗަށެވެ. ހަނގުރާމަ މެދުކެނޑުމާއެކު ފެނިގެންދިޔައީ އަސީރުން ބަދަލުކުރެވުނު ތަނެވެ. މުސްލިމުންގެ ބެލުމުގެ ދަށުގައި ތިބި ދުޝްމަނުންގެ އަސީރުންގެ ކިބައިން ފެނުނު މަންޒަރަކީ އުފާވެރިކަމުގެ މަންޒަރެވެ. އަސީރުންނާމެދު ހެޔޮކޮށް ހިތުމަކީ އިސްލާމްދީނުގެ އަޚުލާޤެވެ.
މި ހަނގުރާމައިން އެތައް ޢިބުރަތެއް ލިބިދެއެވެ. އެންމެ ފުރަތަމަ ޢިބުރަތަކީ ﷲ އަށް ނަސްރުދޭ ބަޔަކަށް ﷲ ނަސްރު ދެއްވާނެކަމެވެ. ޢިބުރަތް ހޯދަންޖެހޭ ކަންކަމުގެ ތެރޭގައި ޣައްޒާގެ ރައްޔިތުން ހަނގުރާމައިގެ ހާލަތުގައިވެސް ޢަމަލުކުރި ގޮތް ހިމެނެއެވެ. މުސްލިމުން ޢަމަލުކުރީ ރިވެތި އަޚުލާގުންނެވެ. އަނިޔާވެރިވުމެއްނެތިއެވެ. އިސްލާމްދީނުގައި އަނިޔާވެރިވުން ވަނީ ހަރާމް ކުރައްވާފައެވެ. އެއްވެސް ދީނެއްގެ މީހަކަށް ނުހައްގުން އަނިޔާއެއް ދިނުމަކީ އިސްލާމްދީން މަނާކުރައްވައިފައިވާ ކަމެކެވެ. ހަނގުރާމައިގެ ހާލަތުގައިވެސް ކުޑަކުދީންނާއި މުސްކުޅީންނާއި އަންހެނުން ޤަތުލުކުރުމާއި ގަސްގަހާގެހި ހަލާކުކުރުމާއި ޖަނަވާރުތައް މެރުން އިސްލާމްދީނުގައި ނަހީކުރައްވާފައިވެއެވެ. އަދި އެހެން ދީންތަކުގެ އަޅުކަންކުރާ ތަންތަން ހަލާކުކުރުމާއި އެ ތަންތަނުގައި އަޅުކަންކުރަން ތިބޭ މީހުން ޤަތުލުކުރުން ވެސް ނަހީކުރައްވައިފައިވެއެވެ. މިއީ ހަނގުރާމައިގެ ހާލަތުގައިވެސް އިސްލާމީ އަޚުލާޤިއްޔާތެވެ.
މުސްލިމުންގެ ހައިސިއްޔަތުން ފަލަސްޠީނުގެ ރައްޔިތުންނާ މެދު އަދާކުރާން ޖެހޭ އަޚްލާޤީ ވާޖިބުތައް ވެއެވެ. ފަލަސްޠީނުގެ ދިފާޢުގައި އަޑުއުފުލުމާއި ފަލަސްޠީނުގެ ރައްޔިތުންނަށްޓަކައި ހެޔޮ ދުޢާކުރުމާއި އިންސާނީ ގޮތުން އެހީތެރިވުމަށް އަހަރެމެން އެންމެން އަތުގުޅައިލާންޖެހެއެވެ.
މައުލޫމާތު: ހުކުރު ޚުޠުބާ
