އަޝްރަފް ހައިރާންވެފައި ބަލަހައްޓައިގެން ހުއްޓާ، ރޫހު ފަނޑުވެ، ގެއްލިގެން ދިޔައެވެ. ގޭތެރެއަށް އަނެއްކާވެސް ހަމަހިމޭންކަން ވެރިވިއެވެ. އަޝްރަފް ފުން ނޭވާއެއް ލިއެވެ. އޭނާގެ ހިތުގައި ބިރުވެރިކަމުގެ ބަދަލުގައި މިހާރު އޮތީ އުފާވެރިކަމާއި ހިތްހަމަޖެހުމެވެ.
އަޝްރަފް ގޭގެ ދޮރުމަތީގައި ހުއްޓި ހުރީއެވެ. އޭނާގެ ހިތުގެ ވިންދު އަވަސްވެފައި ވާކަން އިހުސާސް ކުރެވުނެވެ. މިރޭ ހިނގައިދިޔަ ކަންތައްތަކުގެ ސަބަބުން އޭނާގެ ހިތުގައި ބިރުވެރިކަން އުފެދިފައިވާކަން އެނގުނެވެ. ނަމަވެސް، އޭނާ ވިސްނީ މިރޭ ރަނގަޅަށް ނިދާލުމަށްފަހު މާދަމާ އިރު އެރީމަ ސަލީމްގެ ގެއަށް ދާން ކަމަށެވެ. އަދި މިރޭ ހިނގައިދިޔަ އެއްވެސް ވާހަކައެއް ސަލީމް އަދި އޭނާގެ އަނބި މީހާއަށް ވެސް ކިޔައި ނުދޭން ނިންމިއެވެ.
އަޝްރަފް ބިރުވެރިކަމާއެކު ގޭތެރެއަށް ވަދެ، އެނދާ ހަމައަށް ދިޔައެވެ. އޭނާ އެނދުގައި އޮށޯވެ ދެލޯމަރައިލިއެވެ. ގޭތެރެއިން އެއްވެސް ކަހަލަ އަޑެއް ނީވި މުޅި ގޭތެރެ ވަނީ ހަމަހިމޭންކަން ވެރިވެފައެވެ. ނަމަވެސް، މި ހަމަހިމޭންކަމުގެ ތެރޭގައި ވެސް އަޝްރަފްގެ ހިތުގައި ބިރުވެރިކަން އޮތެވެ.
އިވުނީ ކޮޓަރީގެ ދޮރު ހުޅުވާލި އަޑެވެ. އަޝްރަފް ބިރުން ކޮޅަށް ތެދުވިއެވެ. އޭނާއަށް އެނގުނީ މިއީ ހަގީގަތެއްކަމެވެ. އަޝްރަފް ބިރުން އަވަހަށް ކޮޓަރީގެ ދޮރާ ދިމާއަށް ބަލައިލިއެވެ. އެހިނދު، އޭނާއަށް ފެނުނީ ކަޅު ހެދުމެއް ލައިގެން ހުރި މީހެކެވެ. އިރުކޮޅެއް ނުވަނީސް އެމީހާ ގެއްލުނެވެ. އަނެއްކާވެސް އަޝްރަފް އެނދުގައި އޮށޯވެލީ ނިދާލުމަށެވެ.
ކުއްލިއަކަށް، އަޝްރަފަށް އިވުނީ ގޭގެ ބޭރުން އަންނަ އަޑެކެވެ. އެއީ ކުޑަދޮރުގައި މީހަކު ޓަކި ޖަހާ އަޑެވެ. އަޝްރަފްގެ ހިތުގެ ވިންދު އަނެއްކާވެސް އަވަސްވެގެން ދިޔައެވެ.
"ކާކު އެއީ؟" އަޝްރަފް ބިރުވެރި އަޑަކުން ގޮވާލިއެވެ.
ޖަވާބެއް ނުލިބުނެވެ. ހަމައެކަނި ކުޑަދޮރުގައި ޓަކި ޖަހާ އަޑު އިވެމުން ދިޔައެވެ. އަޝްރަފް ބިރުން ތުރުތުރު އަޅަމުން، ލަސް ލަހުން ކުޑަދޮރާ ދިމާއަށް ދިޔައެވެ.
އަޝްރަފް ކުޑަދޮރު ކައިރިއަށް ގޮސް، ފަރުދާ ކަހާލައި ބޭރަށް ބަލައިލިއެވެ. އެހިނދު، އޭނާއަށް ފެނުނީ ކަޅު ހެދުމެއް ލައިގެން ހުރި މީހެކެވެ. އަޝްރަފް ބިރުން ފަހަތަށް ޖެހިލިއެވެ. އޭނާގެ ހިތް ބާރަށް ތެޅެން ފެށިއެވެ.
"ކާ... ކާކު އެއީ؟" އަޝްރަފް އަނެއްކާވެސް ގޮވާލިއެވެ.
އަޝްރަފް ބިރުން ހަޅޭއްލަވައިގަތެވެ. އޭނާ ކޮޓަރީގެ ދޮރާ ދިމާއަށް ދުވެފައި ދިޔައެވެ. އެހެންނަމަވެސް، ދޮރު ހުޅުވޭ ގޮތެއް ނުވިއެވެ. އަޝްރަފް ބާރަށް ދޮރުގައި ތަޅައި، އެހީއަށް ގޮވާލިއެވެ.
"އެހީވޭ! އެހީވޭ!" އަޝްރަފް ބާރަށް ހަޅޭއްލަވައިގަތެވެ.
ފަހަތުން މީހަކު އައިސް އަޝްރަފްގެ އަތުގައި ހިފެހެއްޓިއެވެ.
"ކާކު... ކާކު ތިއީ؟" އަޝްރަފް ބިރުވެރި ކަމާއިއެކު އަހާލިއެވެ.
"އަހަރެންނަކީ ކާކުކަން ތިޔަ ނޭނގެނީތަ" އެ މީހާ ބުނެލިއެވެ.
"މިރޭ ކުރި ކަންތައް ހަނދާން ވޭތަ" އެމީހާ އަހާލިއެވެ.
އަޝްރަފް ބުންޏެވެ. "އަހަރެން... އަހަރެން އެކަން ކުރީ ގަސްދުގައެއް ނޫން. އަހަރެންނަށް މާފު ކުރޭ"
ކުއްލިއަކަށް، އެމީހާ ވައިގެ ތެރެއަށް ފޮހެވިގެން ދިޔައެވެ. އަޝްރަފް ހައިރާންވެ، ވަށައިގެން ބަލައިލިއެވެ. އޭނާ ހުރީ އަނެއްކާވެސް އެކަނި، އަނދިރި ކޮޓަރީގައެވެ.
އަޝްރަފް ބިރުވެރިކަމާއެކު އެނދުގައި އިށީނދެ، އަތުން މޫނު ފޮހެލިއެވެ. އޭނާ ވިސްނީ މާދަމާ އިރުއެރުމުން ސަލީމްގެ ގެއަށް ގޮސް، މިރޭ ހިނގައިދިޔަ ކަންތައްތައް ކިޔައިދޭން ކަމަށެވެ. އަދި އޭނާ ކުރި ކަމުގެ ޒިންމާ ނަގައި، އެކަން އިސްލާހު ކުރާށެވެ.
އިރުއަރައި، އައު ދުވަހެއް ފެށުނެވެ. އަޝްރަފް ހޭލެވުނު އިރު، އޭނާގެ ހިތުގައި އަދިވެސް ރޭގަނޑުގެ ބިރުވެރި ހާދިސާ އާލާވެފައި ވިއެވެ. ނަމަވެސް، އޭނާގެ ހިތުގައި އޮތް ކުށްވެރިވުމުގެ އިހުސާސް އަދިވެސް ފިލާފައެއް ނުވެއެވެ.
ހެނދުނު ހޭލެވުމާއި އެކު އަޝްރަފް އަވަސް އަވަހަށް ތައްޔާރުވެ، ސަލީމްގެ ގެއާ ދިމާއަށް ހިނގައިގަތެވެ. މަގުމަތީގައި ދަނިކޮށް، އޭނާއަށް ފެނުނީ މީހުން އެއްވެ ތިބި ތަނެކެވެ. އަޝްރަފް ކުރިއަށް ދިޔަ ވަރަކަށް، އޭނާގެ ހިތުގެ ވިންދު އަވަސްވެގެން ދިޔައެވެ. މިހާ ގިނަ ބަޔަކު މިތާ ޖަމާވެފައި ތިބީ ކީއްވެގެން ހެއްޔެވެ. އަޝްރަފް އަމިއްލަ ނަފްސާ ސުވާލު ކުރިއެވެ. އަޝްރަފް އެމީހުންގެ ތެރެއަށް ވަދެ ރަނގަޅަށް ބަލައިލިއެވެ. ކުރިމަތީގައި އޮތީ ފިރިހެނެކެވެ. އެމީހާގެ މޫނު ރަނގަޅަށް އެނގޭ ވަރެއް ނުވިއެވެ. މުޅި މޫނުމަތީގައި އޮތީ ލެއެވެ.
އަޝްރަފްގެ ހިތުގެ ވިންދު އިތުރަށް އަވަސްވެގެން ދިޔައެވެ. އޭނާގެ ގައިގައި ހުރި އިސްތަށިތައް ކޮޅަށް ޖެހުނެވެ. މިއީ ކޮން ކަމެއް ހިނގައިގެން އުޅޭ ގޮތެއް ބާވައެވެ؟ އަޝްރަފް ވަށައިގެން ތިބި މީހުންގެ މޫނުތަކަށް ބަލައިލިއެވެ. އެންމެންގެ މޫނުމަތިން ފެންނަނީ ބިރުވެރިކަމާއި ހައިރާންކަމެވެ. އަޝްރަފް އަވަސްވެގަތީ ސަލީމްގެ ގެއަށް ދާށެވެ. މިކަމެއް ހިގައިގެން މިއުޅެނީ އެގެއާއި މާދުރުނޫން ހިސާބަކުންނެވެ. އަޝްރަފް ގޭތެރެއަށް ވަދެ ސަލީމަށް ގޮވިއެވެ.
"މިގޭދޮށުގައި ކޮންކަމެއް ހިނގައިގެން މިއުޅެނީ" އަޝްރަފް ވަރަށް ހާސްވެފައި ހުރެ އަހައިލިއެވެ.
"އެއުޅެނީ މިރަށަށް އައިސްގެން އުޅޭ މީހަކު މަރުވެގެން" ސަލީމްގެ ވާހަކަ ހުރީ ވަރަށް ފަރުވާ ކުޑަގޮތަކަށެވެ.
"ކީއްވެ މަރުވާންވީ. ވަރަށް ބޮޑަށް ޒަޚަމްވެފައި އޮތީ" އަޝްރަފް އަނެއްކާވެސް ސުވާލުކޮއްލިއެވެ.
އެމީހުންގެ ވާހަކަ ހުއްޓުނީ ސަލީމްގެ އަނބިމީހާ އެމީހުންނަށް ސައިބޯން ގޮވާލި އަޑަށެވެ. ސައިބޯން އިށީނީ ސަލީމް އާއި އަޝްރަފް އާއި ދެމީހުން އެކަންޏެވެ. ދުރުގައި ހުރި ގޮނޑިއެއްގައި ސަލީމްގެ އަންހެނުން އިނެވެ.
"ކޮބާ ހާދަ ދުރެއްގައި" އަޝްރަފް ސަލީމްގެ އަންހެނުން ދުރުގައި އިނުމުން އަހައިލިއެވެ.
"ކޮބާ އަޝްރަފްއަށް އިންނާނެ މީހަކު ވޭތޯ އެބަބަލަންތަ" ސަލީމް އޭނަގެ އަންހެނުންގެ ގާތުގައި އަހައިލިއެވެ.
"ކިހިނެއް މިރަށުން މީހަކާ އިންނާނީ. ދެންމެވެސް މިފެނުނީ މީހަކު މަރުވެފައި އޮތްތަން" އަޝްރަފް ބުނެލިއެވެ.
އެދެމީހުން އަވަސް އަވަހަށް ނުކުމެގެން ދިޔައީ އެހާދިސާ ހިނގި ތަނާ ދިމާއަށެވެ. އެމީހުން ދާއިރު، ރަށުގެ އެހެން މީހުންވެސް އެތަނަށް އައިސް އެއްވަމުން ދިޔައެވެ. އަޝްރަފްގެ ހިތުގައި އުފެދުނު ބިރުވެރިކަމާއި ކަންބޮޑުވުން އިތުރުވަމުން ދިޔައެވެ. އޭނާގެ ހިތުގައި އުފެދުނު ސުވާލުތަކަށް ޖަވާބު ލިބޭނެކަމުގެ އުއްމީދުގައި ގޮސް އެތަނަށް އެއްވެފައި ތިބި މީހުންގެ ގާތުގައި ހުއްޓުނެވެ.
"މިއީ ރަށަށް އައިސް އުޅުނު މީހެއް. އޭނާ މަރުވެފައި އޮތީ ވަރަށް ބޮޑަށް ޒަޚަމްވެފައި އޮތީ" އެތަނަށް އެއްވެފައިވާ މީހުންގެ ތެރެއިން އެކަކު ބުނެލިއެވެ.
އަޝްރަފްގެ ހިތުގައި އުފެދުނު ބިރުވެރިކަން އިތުރުވެގެން ދިޔައެވެ. އޭނާގެ ހިތުގައި އުފެދުނު ސުވާލުތަކަށް ޖަވާބު ހޯދުމަށް އިތުރަށް މަސައްކަތް ކުރަން ފެށިއެވެ. މިކަހަލަ ހާދިސާއެއް މިކުޑަ ރަށުގައި ހިނގުމަކީ ވަރަށް ނާދިރު ކަމެކެވެ. އަދި ހަމަ އެހެންމެ، މިކަމުގެ ސަބަބުން ރަށުގެ އަމާންކަމަށް އަސަރުކޮށްފާނެކަމުގެ ބިރު އަޝްރަފްގެ ހިތުގައި އުފެދުނެވެ.
"ކާކުބާ މިކަން ކޮށްފައި މިއޮތީ؟" އަޝްރަފް އަހާލިއެވެ. އެހެންނަމަވެސް، އެއްވެސް މީހަކު ޖަވާބެއް ނުދިނެވެ. އެންމެންގެ މޫނުމަތިން ފެންނަނީ ބިރުވެރިކަމާއި ހައިރާންކަމެވެ.
ކުއްލިއަކަށް، އެއްވެފައިވާ މީހުންގެ ތެރެއިން އަންހެނެއްގެ އަޑު އިވުނެވެ. "އަހަރެން ދުށިން! އަހަރެން ދުށިން!" އެ އަންހެންމީހާ ހަޅޭއްލަވަމުން ކުރިއަށް އައެވެ. އޭނާގެ މޫނުމަތިން ފެންނަނީ ބިރުވެރިކަމާއި ކަންބޮޑުވުމެވެ.
"ކޮންކަމެއް ދުށީ؟ ކިޔާބަލަ އަވަހަށް!" އަޝްރަފް އަވަސްވެގަތެވެ.
"އަހަރެން ގޭގައި އިންދާ، ބޭރުން އަޑުތަކެއް އިވުނީ. ދޮރުން ބޭރު ބަލާލިއިރު، މި މީހާ އާއި އަނެއް މީހާ ޒުވާބުކުރަނީ. ދެން ކުއްލިއަކަށް އަނެއް މީހާ މީނާގެ ގައިގައި ތަޅައިގަތީ. އަހަރެން ބިރުން ދޮރު ލައްޕާލީ. ދެން އަނެއްކާ ބޭރަށް ނުކުތްއިރު، މީނާ މިހެން އޮތީ" އެ އަންހެންމީހާ ވާހަކަ ދައްކަން ފެށިއެވެ.
"އެ އަނެއް މީހާއަކީ ކާކު؟ ކީއްވެގެން ޒުވާބުކުރީ؟" މި ވާހަކަ އަޑުއެހުމަށްފަހު، އަޝްރަފްގެ ހިތުގައި އުފެދުނު ސުވާލުތައް އިތުރުވެގެން ދިޔައެވެ.
"އަހަރެންނަކަށް ނޭނގެ. އެއީ މިރަށުގެ މީހެއް ނޫން. އަހަރެން ކުރިން ދެކެފައެއް ނެތް." އެ އަންހެންމީހާ ޖަވާބު ދިނެވެ.
"މިހާރު އެ މީހާ ކޮންތާކު ހުރީ؟" އަޝްރަފް އަނެއްކާވެސް ސުވާލުކުރިއެވެ.
"އަހަރެންނަކަށް ނޭނގެ. އެ މީހާ ތަޅައިގަތުމަށްފަހު ދުވެފައި ދިޔައީ" އެ އަންހެންމީހާ ޖަވާބުދިނެވެ.
އަޝްރަފް ބޭނުންވީ އެނބުރި ސަލީމް އާއި އެކު އެގެއަށް ދާށެވެ. އެކަންތަކާއި ގުޅޭގޮތުން އިތުރަށް ވާހަކަ ދައްކާލާށެވެ. ނަމަވެސް ފަހުން ޚިޔާލު ބަދަލުވެ އަޝްރަފް ބޭނުންވީ ބަނދަރާއި ދިމާލަށް ދިއުމަށެވެ. އެއީ ހަމަކައެކަނި އެކަމާއި ގުޅޭ މައުލޫމާތެއް ލިބޭތޯއެވެ. ފުލުހުން އެހާދިސާ ތަހުގީގު ކުރަމުން ދިޔަ ނަމަވެސް އަޝްރަފް ބޭނުންވަނީ އިތުރު މައުލޫމާތެވެ. އަޝްރަފް ކިޔަވައިގެންހުރި ދާއިރާއަކީވެސް ތަހުގީގީ ދާއިރާކަމަށް ވާތީއެވެ. ސަލީމް އާއި އެކު އަޝްރަފް ހިނގަމުން ދިޔައިރު ސަލީމްގެ ގާތުން އަޝްރަފް ވަރަށް ގިނަ ކަންތައް އޮޅުން ފިލުވަމުން ދިޔައެވެ. ކުރިން މިރަށުން އެފަދަ ކަމެއް ހިނގައިފައި ނުވާކަމަށް ސަލީމް އަޝްރަފްއަށް ކިޔައިދިނެވެ.
އަޝްރަފް އާއި ސަލީމް ބަނދަރު ސަރަހައްދަށް ދިޔައެވެ. އެމީހުން ބޭނުންވީ ރޭގަނޑު ރަށަށް އައި އުޅަނދުފަހަރާއި ބެހޭ މަޢުލޫމާތު ހޯދާށެވެ. ބަނދަރު މަސައްކަތްކުރާ މީހުންގެ ފަރާތުން އެމީހުންނަށް އެނގުނީ، އެރޭ ދޯންޏެއް ރަށަށް އައިކަމެވެ. އެއީ މަސްދޯންޏެކެވެ.
މަސްދޯނީގެ ފަޅުވެރިންނާ ވާހަކަދެއްކުމުން އެނގުނީ، އެމީހުންގެ ދޯންޏަށް އެހެން މީހަކު އަރާފައި ނުވާކަމެވެ. އަދި އެމީހުންވެސް ރަށަށް ފައިބައިގެން ނޫޅޭކަމެވެ. މިހާހިސާބުން އަޝްރަފްގެ ސިކުނޑީގައި އުފެދުނު ސުވާލަކީ، އެމީހާ ރަށަށް އައީ ކިހިނެއްކަމެވެ.
"މިއީ ވަރަށް ބިރުވެރި ކަމެއް ސަލީމް. މީހަކު ކުއްލިއަކަށް ފައުޅުވެ، ދެން ގެއްލިގެން ދިއުން. މިކަމުގައި ކޮންމެވެސް ސިއްރެއް އެބައޮތް" އަޝްރަފް އެހެން ބުނިއިރު ސަލީމް ހަމަހިމޭނުން ހުރީ ފުންވިސްނުމެއްގައެވެ.
އެވަގުތު، ރަށުގެ އިރުމަތީ ފަރާތުން އަޑުގަދަ އަޑުތަކެއް އިވެން ފެށިއެވެ. އަޝްރަފް އާއި ސަލީމް އެކުގައި އެދިމާއަށް ދުވެފައި ދިޔައެވެ. އެތަނަށް ދިޔައިރު، ގިނަ ބަޔަކު އެއްވެފައި ތިއްބެވެ. އަދި އެމީހުން ދައްކަމުންދިޔަ ވާހަކަތަކުން އެނގުނީ، އަނެއްކާވެސް އެ ސިއްރުވެރި މީހާ ފެނިފައިވާ ކަމެވެ.
"އޭނަ ދުވެފައި ދިޔައީ ކޮން ދިމާއަކަށް؟" އަޝްރަފް އެތާ ތިބި މީހުންގެ ކިބައިން އަހާލިއެވެ.
"އެކޮޅަށް، ޖަންގައްޔާ ދިމާއަށް!" އެއްފަހަރާ އެތައް މީހަކު ޖަވާބު ދިނެވެ. އަޝްރަފް އާއި ސަލީމް ލަސްނުކޮށް އެދިމާއަށް ދުވެފައި ދިޔައެވެ.
ޖަންގަލީގެ ތެރެއަށް ވަދެވުނު ވަރަކަށް، ވަށައިގެންވާ މާހައުލު އިތުރަށް އަނދިރިވަމުން ދިޔައެވެ. ގަސްތަކުގެ ހިޔަލުގައި، އެތަނުގެ ވައި ފިނިވެފައި ހުއްޓެވެ. އަޝްރަފް އާއި ސަލީމް ކުރިއަށް ދިޔައީ ވަރަށް ފަރުވާތެރިކަމާއެކުގައެވެ. ކޮންމެ ހިނދަކުވެސް އެ ސިއްރުވެރި މީހާ ފެނިދާނެކަމުގެ އުއްމީދުގައެވެ.
ކުއްލިއަކަށް، އެމީހުންނަށް ކުރިމަތިން އަނދިރި ސިފައެއްގައި ހުރި މީހަކު ފެނުނެވެ. އެއީ އިންސާނެއްގެ ސިފައިގައި ހުރި އެއްޗެކެވެ. އަޝްރަފް އާއި ސަލީމް ބިރުން ހުއްޓުނެވެ. އެމީހުންގެ ހިތް ބާރަށް ތެޅެން ފެށިއެވެ.
"އަ... އަ... އަޝްރަފް، އެއީ ކޯއްޗެއް؟" ސަލީމް ވަރަށް ބިރުން ސުވާލު ކުރިއެވެ.
"އަ... އަހަރެންނަކަށް ނޭނގޭ. އަވަހަށް ދުވޭ!" އަޝްރަފް ގޮވާލިއެވެ.
އެމީހުން ދެމީހުން ވީހާވެސް ބާރަކަށް ދުވެފައި ދާން ފެށިއެވެ. އެކަމަކު އެ އަނދިރި ސިފަ އެމީހުންނާ ވަރަށް ގާތުން ފަހަތުން އަންނަކަން އެމީހުންނަށް އިހުސާސް ކުރެވުނެވެ. އެމީހުން ދުވަމުން ދިޔައިރު، އެމީހުންނަށް ފަހަތުން އަންނަ ނޭވާގެ އަޑު އިވެން ފެށިއެވެ.
= ނުނިމޭ =