މިއީ ރާއްޖޭގައި ބުޑިސްޓުން އުޅުނު ޒަމާނުގެ ހާދިސާއެކެވެ. އެޒަމާނުގައި ހުވަދު އަތޮޅު ފިޔޯރީގައި ވަރަށް މުސްކުޅި ވެފައިވާ ދެމަފިރިއަކު އުޅުނެވެ. މުސްކުޅިން ބުނާގޮތުން އެއީ ފިޔޯރީ ހުސައިންކަލޭފާނާއި އެރަށުގެ ބީފާންއެވެ. އެދެމަފިރިންގެ ޒުވާންދުވަސްވަރު ހަޔާތް ވޭތުކުރަމުން ދިޔައީ ފަރު ހިލުމާއި، ފަންގި ވިނުމުގައެވެ. މި ދެމަފިރިންނަށް ލިބޭ ކުޑަ އާމްދަނީއިން މާބޮޑު ތަނަވަސް ބަޔަކަށް ނުވިނަމަވެސް މިދެމީހުންނަކީ ރަށުގެ ނިސްބަތުން ފުދިގެން އުޅޭ ދެމަފިރިންނެވެ. ހަޔާތް ވޭތުކުރަމުންދަނީ އުފަލާއި ހިތްހަމަ ޖެހުމުގައެވެ. މިގޮތަށް ދިރިއުޅެމުން، ދުވަސްތައް މާޒީއާއި އެކުވަމުން ދިޔައެވެ.
މިދެމަފިރީންނަށް ތިން ދަރިން ލިބުނެވެ. ޖީލަކަށްފަހު ޖީލަކަށް މި ތިންކުދީންގެ ނަންތައް އައީ ވާރުތަވަމުން ނެވެ. އެތިންކުދިންގެ ތެރެއިން ދޮށީ ދަރިފުޅަކީ "ކައިދާބުއި" ދެވަނަ ދަރިފުޅަކީ "ހައްވާބުއި" ތިންވަނަ ދަރިފުޅަކީ "އާމިނާބުއި" މިތިންކުދީން ބޮޑުވަމުން އައީ ވަރަށް ސާދާ ދިރިއުޅުމެއްގެ ތެރެއިންނެވެ. ނަމަވެސް ބޮޑު ހިތާމައެއް އެޢާއިލާއަށް ކުރިމަތިވީ ދެވަނަ ދަރިފުޅު ހައްވާބުއިގެ ލޯ އަނދިރިވުމުންނެވެ. "ހިތާމަހުރި! އަޅުގަނޑުމެންގެ ދެވަނަ ދަރިފުޅަކީ ލޮލަށް ނުފެންނަ ކުއްޖެއް." ވަރަށް އަސަރާއެކު ހުސައިން ކަލޭގެފާނު ބުނުއްވިކަމަށް މުސްކުޅިންގެ ފަރާތުން އެނގިފައިވެއެވެ.
އެއްރެއެއްގެ ދަންވަރު ހައްވާބުއި ތެދުވެގެން އޭނާގެ ދައްތަ ކައިދާބުއިއަށް ގޮވާ އޭނާއާއެކު އަތިރިއަށް ގޮސްދޭން ބުންޏެވެ. ހައްވާބުއި އަށް ލޮލަށް ނުފެންނާތީވެ އޭނާ ގޮވައިގެން އޭނާގެ ދައްތަ އަތިރިއަށް ދާން ނުކުމެއްޖެއެވެ. މިގޮތަށް މިދެބެއިން ގެއިން ނުކުމެގެން އަތިރިއަށް ދިޔައިރު ކަމަކުދާކަށް ނެތެވެ. މަގުގެ ދެފަރާތުގައިހުރި ރުއްގަސް ވަނީ ލެބިގެން ބިންމައްޗަށް ތިރިވެފައެވެ. އަދި އެރުއްގަސް އެކަތި އަނެކެއްޗަށް ވާހަކަ ދައްކަނީ އެވެ. ދެން އަތިރިމައްޗަށް ގޮސް މޫދަށް ބަލާލިއިރު މޫދު އޮތީ ރިހިގަނޑެއްހެން ވެފައެވެ. ކެކިގެން ބޮކިޖަހާފައި އަރަނީއެވެ. މިދެބޭން އަވަސް އަވަހަށް ގޭދޮށަށް ގޮސް ބައްޕަ ހުސޭންކަލޭގެފާނަށް ގޮވާ މިވާހަކަ ބުނެފިއެވެ. ހުސައިންކަލޭގެފާނު ނުކުމެ ބެލިއިރު އެއީ ތެދެކެވެ. ހުރިހާ ރުއްގަސް ބިންމައްޗަށް ތިރިވެ ވާހަކަ ދައްކަނީ، ވަޅުތަކުގެ ފެންގަޑު ބޮޑުވެގެން ކެކިއުތުރިއަރަނީއެވެ. ހުސައިންކަލޭގެފާނު އަތިރިމައްޗަށް ގޮސް ބެލިއިރު މޫދު ލޮނުގަޑުވެސް ކެކިއަރަނީއެވެ. އަދި ތެލި، ލޯގަނޑު، ތަރާފަތް، ބުލިބުލި ފަދަ ހިފާގެންގުޅޭ ސާމާނުވެސް މޫދުން އެއްގަމަށް އަރާ މުޅި ގޮނޑުދޮށް ފުރެނީއެވެ.
ހުސައިންކަލޭގެފާނަށް މިވެގެން އުޅޭގޮތް މިއެގުނީ އަދިކިރިޔާ،"މިއޮތީ ނަސީބު އަތުގައި ހިފާފައި". ބަލާކަށް ނުހުރެ މީނާގެ ދަރިންނާއެކު މިސާމާނު އެއްކޮށްގެން ގެއަށް ގެންދަން ފަށައިފިއެވެ. ގޭގައި އެއްޗެހި ބަހައްޓަން ހުރި ހުރިހާ ތަނަކަށް އެއެއްޗެހިވައްދާ ފުރާލިއެވެ. ފަޖުރުލުމާއެކު ރުއްގަސް އިހުތިބިހެން ބަދަލުވެއްޖެއެވެ. ކަނޑުގެ ލޮނުގަނޑުވެސް ކުރިން އޮތްގޮތަށް ބަދަލު ވެއްޖެއެވެ. ގޭގެ އޮޅިގަނޑު ކައިރީގައި ހުރެފައި ހުސައިންކަލޭގެފާނު ބުނެލިއެވެ. "ބީފާނު، މިހާރު ލައްކަގިނަ އެއްޗެތި ރައްކާކުރެވިއްޖެ. ﷲ ޝުކުރު ކުރަންވީ ވަގުތަކީ މިއީއެވެ. ނިޢުމަތަށް ޝުކުރު ނުކޮށްފިނަމަ ބީވެގެން ހިގައިދާނެއެވެ." އޭގެފަހުން އެރަށުގައި ހުސައިންކަލޭގެފާނަށްވުރެ މުދާގިނަ މުއްސަދި މީހަކު އުޅޭކަމަކަށް ނުވެއެވެ. އެރަށުގެ އެންމެން އަދި އެއަތޮޅުގެ ރައްޔިތުންވެސް ދެކެނީ ރާއްޖޭގައިހުރި އެއްމެ މުއްސަދި މީހަކީ މީނާކަމުގައެވެ. ގިނަދުވަހެއް ނުވަނީސް މިޚަބަރު މާލެއަށް ގޮސްގެން ރަސްގެފާނު އަރިހުގައި މިވާހަކަ ބަޔަކުމީހުން ދައްކައިފިއެވެ.
އަދި އެހާ މުއްސަދި މީހަކު ހުރެއްޖެނަމަ ރަސްގެފާނުގެ ބާރު ކުޑަވެ ރަސްކަމަށް ނުރައްކާވެދާނެކަމަށް ބަޔަކު ރަސްގެފާނަށް ލަފާދެއްވިއެވެ. ދެން ރަސްގެފާނުގެ އަމުރަށް މާލެއިން ބަޔަކު ފޮނުވައިގެން ފިޔޯރީ ހުސައިންކަލޭގެފާނުގެ މުދާތައް އަތުލައިގެން މާލެގެނެސްފިއެވެ. މިމުދާ ގެންދިއުމަކުން އެޢާއިލާގެ މުއްސަދި ކަމެއް ކުޑައެއްނުވިއެވެ. އޭގެފަހުންވެސް އެކިފަހަރު މަތީން މާލެއިން މީހުންގޮސް ހުސައިންކަލޭގެފާނުގެ އެކި ދަރިންގެ މުދާ އަތުލިއެވެ. އެންމެފަހުން ބަޔަކުގޮސް ހުސައިންކަލޭގެފާނު ފިޔޯރީ ބީފާނު ކުނާވިޔަން ހާ ހައްދާ އޮޅުގައި އަލިފާންޖަހާ އަންދާލިއެވެ.
މިދެންނެވި ބީފާނުގެ ހާގަސްތައް އަންދާލުމުގެ ސަބަބުން އެއަތޮޅުގެ އެންމެނަށް ކުރިން އެމީހުން ނުދަންނަ ބޭނުންތެރި އާކަމެއް ދަސްވިއެވެ. އެއީ މާލެއިން ދިޔަމީހުން ހާއޮޅު އަންދާލާފައި ފުރައިގެން ދިޔަފަހުން އެހާތަކުގެ ބުޑުތަކުން އިހަށްވުރެ މާ ވަރުގަދައަށް ނިރުތައް ފަޅައިގެން އަލުން ގަސްތައް ހެދޭން ފަށައިފިއެވެ. އޭގެފަހުން އެރަށު ކުނާ ވިޔަން ހާހައްދާ ދަނޑުތައް ދެރަވެ ބަލިކަށިވުމުން އެދަޑުތައް އަންދާ އަޅި ޖަހައި ދަނޑުތައް މާވަރުގަދަކޮށް ދަނޑުތައް ހައްދަން ފަށައިފިއެވެ. ކޮންމެއަކަސް ފިޔޯރީ ބީފާނުގެ ކުނާވިޔުން މިކަމުގެ ސަބަބުން ދިޔައީ ހުއްޓުމެއްނެތި ކުރިއަށެވެ. އަދި އެބީފާނުގެ އާއިލާގެ މުއްސަދިކަން ދިޔައީ ދުވަހަކަށްވުރެ ދުވަހެއް ކުރިއަށެވެ. މީހުންބުނާ ގޮތުގައި މި ބީފާން އޭނާގެ އޮޅަށް ގޮސް ހާ ކަޑާ ނިމިގެން ބޮޑިބޮޑިއަށް ބަދެ ހާ ތަކުގެ ބުޑުކޮޅު އެއްވަރު ކުރަން ބިމުގައި ޖަހާލީމާ އަރާ ގުޑުމަކުން އެރަށުގެ ފަޅުގައި ތިބޭ އައްޑޫ އޮޑި ފަހަރުގެ ދިޔަހިލިގެން ގޮޑުދޮށަށް ބީއްސާ ކަމަށް މީހުން ބުނާ އަޑު މިހާރުވެސް ތުންތުން މަތީން އަޑު އިވެއެވެ.
ފިޔޯރީ ހުސައިންކަލޭގެފާނުގެ ތިންކުދިންގެ ތެރެއިން ދޮއްޓަށް ހުރި ކައިދާބުއި އަކީ ވަރަށް ދަރީންގިނަ އަންހެނެކެވެ. މީނަގެ ދަރީން ތަކުގެ އަދަދު ގިނަވުމުން މީނާއަށް އަދަދު ކުރަންވެސް ނޭނގެއެވެ. މިހެންވެ މީނާ ވަރަށްބޮޑަށް ވިސްނާފައި ހެދިގޮތަކީ ހުކުރު ދުވަހެއްގައި އޭނާގެ ދަރިން ހުކުރަށް ގޮސްފައި އައުމުން އެދަރިންގެ ހެދުންތައް އެދުވަސްވަރުގެ އާދައިގެމަތީން ބޭރުގައި ހުރި ރޯނުގައި އަވީގައިލިއެވެ. މި ހެދުންތައް އަވީލުމަށްފަހު ކައިދާބުއި އޭނާގެ މަންމަ ކައިރީގައި ބުނެގެން ހެދުންތައް ގުނާލީއެވެ. އެއިރު ރޯނުގައި ވަނީ ސާޅީސް ހެދުމެވެ. އެވަގުތުން ފެށިގެން ކައިދާބުއި އަށް އެނގުނީ އޭނާގެ ތިބީ ސާޅީސް ދަރީންކަމެވެ. ކައިދާބުއި އޭނާގެ ދަރިން ގުނި ހުކުރުދުވަހުން ފެށިގެން ކޮންމެހުކުރުދުވަހަކު އޭނާގެ ދަރިއަކު މަރުވަމުންގޮސް ސާޅީސް ހުކުރުވީއިރު ސާޅީސް ދަރީން މަރުވެ ހުސްވީއެވެ. ކައިދާބުއި އަށް ލިބުނު ފިލާވަޅަކީ ދަރީންނަކީ ﷲ ގެ އަމާނާތެއްކަމެވެ. އެ އަމާނާތައް ރައްކާތެރި ނުވެއްޖެނަމަ އެއަމާނާތް ދެއްވި ފަރާތުން އެގެންދެވީކަމެވެ. ނިޢުމަތަށް ޝުކުރު ނުވެވުނީއެވެ.
ނޯޓް: މިއީ ނ.ތ. ހަސަންދީދީ ލިޔުއްވި ކުރީގެ "ހުވަދު އަތޮޅު" ފޮތުގައި އޮތް ލިއުމުގެ ނަކަލެކެވެ. މި ލިޔުންވާނީ އަސްލު ނުގެއްލޭނެހެން މިހާރު ބޭނުންކުރާ ގޮތަށް ބަސްތަކާއި ޖުމްލަތައް ބަދަލު ކުރެވިފައެވެ.
