ރޯދަމަހަކީ އާންމުކޮށް ގޭބީސީތަކުގެ ކަރަންޓްބިލާއި ފެންބިލް އިންތިހާއަށް ބޮޑުވާ މަހެކެވެ. އެހެނިހެން މަސްމަހާއި އަޅާބަލާއިރު ގިނައަދަދަކަށް ރޯދަމަހު ކަރަންޓް ބޭނުންކުރެވޭއިރު މިއަހަރުގެ ރޯދަމަހުންވެސް ޑިސްކައުންޓް ދިނުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ނިންމަވާ އެކަން އިއުލާން ކުރައްވާފައެވެ.
ސްޓެލްކޯއިން މައުލޫމާތުދޭގޮތުގައި ބިލުތަކުން ޑިސްކައުންޓް ދިނުމަށް ހަމަޖެހިފައިވަނީ 2024 ވަނަ އަހަރުގެ ކަރަންޓް އެންމެ ގިނައިން ބޭނުންކޮށްފައިވާ ފެބްރުއަރީ، މާރޗް އަދި އޭޕްރީލްމަސް އުނިކުރުމަށްފަހު ބާކީ އޮންނަ 9 މަސްދުވަހުގެ ކަރަންޓްބިލްގެ އެވްރެޖަކީ އާންމު މަސްތަކުގައި ކަރަންޓް ބޭނުންކުރާ މިންވަރުކަމަށް ބަލައި އެމިންވަރަށްވުރެ އިތުރަށް މި ރޯދަމަހު ބޭނުންކުރާ މިންވަރު ރޯދަމަހުގެ ޑިސްކައުންޓްގެ ގޮތުގައި ދިނުމަށެވެ.
" އާންމު މަސްތަކުގައި ކަރަންޓް ބޭނުންކުރާ އެވްރެޖަށްވުރެ މި ރޯދަމަހު ކަރަންޓް ބޭނުންކުރާ މިންވަރު ދަށްވިއަސް އެފަދަ ފަރާތްތަކަށްވެސް 10 އިންސައްތައިގެ ޑިސްކައުންޓް ލިބޭނެ. 9 މަސްދުވަހުގެ އެވްރެޖް ނެގެން ނެތް ތަންތަނަށްވެސް 10 އިންސައްތައިގެ ޑިސްކައުންޓް ލިބޭނެ". ސްޓެލްކޯގެ މެނޭޖިންގ ޑައިރެކްޓަރ ހުސައިން ފަހުމީ ވިދާޅުވިއެވެ.
އެހެންވުމުން މި ރޯދަމަހު މަދުވެގެން 10 އިންސައްތައިގެ ޑިސްކައުންޓް ނުލިބޭ އެއްވެސް ޑޮމެސްޓިކް ކަސްޓަމަރެއް ނުހުންނާނެކަމުގެ ޔަގީންކަން ސްޓެލްކޯއިން ވަނީ ދީފައެވެ.
ސްޓެލްކޯއިން މި ރޯދަމަހު ބިލް ތައްޔާރުކުރުމަށް ހަމަޖައްސާފައިވަނީ ރޯދަމަހުގެ ފުރަތަމަ ދުވަހުން ފެށިގެން ރޯދަމަސް ނިމެންދެނެވެ.
