މާތް ﷲ އަށް އެންމެ ބޮޑަށް ބިރުވެތިވެ ތަޤްވާވެރިވާ މީހުންނަކީ ޢިލްމު އުނގެނި އެ ޢިލްމާ އެއްގޮތަށް ޢަމަލުކުރާ މީހުންނެވެ. އެމީހުން މާތް ﷲ އަށް ތަޤްވާވެރިވެއެވެ. ތަޤްވާވެރިންނަކީ އެންމެ މާތް މީހުންކަމުގައި އަންގަވައި މާތްﷲ ވަޙީކުރައްވައިފައިވެއެވެ. މާނައީ: "ހަމަކަށަވަރުން، ﷲގެ ޙަޟުރަތުގައި ތިޔަބައިމީހުންކުރެ އެންމެ މާތްކަން ބޮޑީ، ތިޔަބައިމީހުންކުރެ އެންމެ ތަޤްވާވެރި މީހާއެވެ. ހަމަކަށަވަރުން ﷲ އީ މޮޅަށް ދެނެވޮޑިގެންވާ، ޚަބީރުވަންތަ ރަސްކަލާނގެއެވެ".
ނަބީބޭކަލުން މީސްތަކުންނަށް ވާރުތަކުރެއްވީ ޢިލްމެވެ. ނަބީބޭކަލުންގެ ވާރިޘުންނަކީ ޢިލްމުވެރީންނެވެ. އުނގެނުނު ޢިލްމާ އެއްގޮތަށް ޢަމަލުކުރާ ޢިލްމުވެރިޔާގެ ފަރާތުން މިސްތަކުންނަށް ކުރާ މަންފާ ބޮޑުވާނެއެވެ. އެއާ ޚިލާފަށް އަޅުވެރިޔާ ކުރާ އަޅުކަމުގެ ސަބަބުން މަންފާ ކުރާނީ ހަމައެކަނި އޭނާގެ އަމިއްލަ ނަފުސަށެވެ.
ޢިލްމުގެ މަޤާމު މަތިވެރިއެވެ. ޢިލްމު އުނގެނުމަށް ނަބިއްޔާ ﷺ ވަރަށް ބޮޑަށް ބާރު އެޅުއްވިއެވެ. ބަދުރު ހަނގުރާމައިގެ އަސީރުން މިނިވަންވުމަށް ފިދުޔައިގެ ބަދަލުގައި މުސްލިމް ދިހަ ކުއްޖަކަށް ލިޔަންކިޔަން ދަސްކޮށްދިނުން ޝަރުތުކުރެއްވުމުން މިކަން ދޭހަވެއެވެ.
ހެޔޮކަމަށް އެދޭ މީހުން ޝަރުޢީ ޢިލްމު އުނގެނުމަށް ވަގުތުކޮޅެއް ހުސްކުރުން މުހިންމެވެ. އަހަރެމެންގެ ޢުމުރުން ކޮންމެ ދުވަހަކީ ވެސް ޢިލްމު އުނގެނުމަށް ވަގުތުކޮޅެއް ހޭދަކުރެވިދާނެ ދުވަހެކެވެ. އެހެނީ ޢިލްމު އުނގެނުމަކީ ތިމާއަށާއި އެހެން މީހުންނަށް ނުހަނު ފައިދާއާއި ލާބަހުރި ކަމަކަށްވާތީއެވެ. އަދި ޢިލްމުވެރިޔާ މަރުވުމަށްފަހުގައިވެސް އޭނާ އުނގެނި އެހެން މީހުންނަށް ފޯރުކޮށްދީފައިވާ ޢިލްމެއްގެ ފައިދާ ކުރާނެތީއެވެ.
ނުދެނަހުރެ އަޅުކަންކުރާ މީހަކަށް ބާޠިލު ގޮތުގައި އަޅުކަމެއްކުރުމަށް ޝައިޠާނާ ވިސްނައިދީފާނެއެވެ. އެކަމުގެ ސަބަބުން އޭނާ މަގުފުރެދި އެހެންމީހުންވެސް މަގުފުރައްދައިފާނެއެވެ. އެހެނެއްކަމަކު ޢިލްމު ވެރިޔާ މަގުފުރައްދާކަށް ޝައިޠާނާއަކަށް ފަސޭހައެއް ނުވާނެއެވެ. އޭގެ ބަދަލުގައި އޭނާ، އޭނާއަށް ލިބިފައިވާ ޢިލްމުގެ މަތީގައި ސާބިތުވެ ހުރެ އަނެކުން ވެސް ހެޔޮމަގަށް އަޅުވަން މަސައްކަތްކުރާނެއެވެ.
ދީނީ ޢިލްމު އުނގެނުން ކޮންމެ މުސްލިމަކަށްވެސް ވާޖިބުވެގެންވެއެވެ. ޢިލްމު އުނގެނުމަށް މާތް ﷲ ގެ ރަސޫލާ ﷺ އެހައި ބޮޑަށް ބާރު އަޅުއްވާފައިވަނީ އެހެންވެއެވެ. އަދި އެކަމަށް އެދި ދުޢާ ކުރުމަށްވެސް ކީރިތި ޤުރުއާނުގައި އަންގަވައިފައިވެއެވެ.
