ބާތިލްގޮތުގައި މީސްތަކުންގެ މުދާ ކައިއުޅުމުގެ ނަތީޖާ އަކީ ﷲ އާއި އެމީހަކާއި ދެމެދު އޮންނަ ގުޅުން ކެނޑިގެން ދިއުން ކަމަށާއި ހަށިގަނޑުގައި ޙަރާމްތަކެތި ކައިގެން އުފެދުނު މަސް ޖަހާފައި ހުރިހާ ހިނދަކު ދުޢާ އިޖާބަވުމަށް ހުރަސްއެޅޭނެ ކަމަށް ހުކުރު ޚުތުބާގައި ވަނީ ބުނެފައެވެ. އަދި އެމުދަލުން ތިމާގެ އަނބިދަރިންނަށް ކާންބޯން ދިނުމުގެ ނަތީޖާއަކީ ވެސް އެއީ ކަމަށް ވެއެވެ.
ވައްކަމާއި ފޭރުމާއި މަކަރާއި ޙީލަތުން މީސްމީހުންނާއި، ދައުލަތުގެ މުދަލަށް އަރައިގަތުމަކީ މުޖުތަމަޢުގައި އަށަގަނެފައިވާ ވަރަށްބޮޑު އިޖުތިމާޢީ ބައްޔެއްކަމަށާއި، މިބަލީގެ ސަބަބުން ގެއްލިގެންދަނީ ހަމައެކަނި ވަކިވަކި ފަރުދުންގެ ޙައްޤުތަކެއް ނޫން ކަމަށްވެސް ފާހަގަކޮށްފައިވެއެވެ. އަދި މިބޮޑު ޖަރީމާގެ ސަބަބުން ވިޔަފާރިތަކާއި ކުންފުނިތަކާއި ދައުލަތުގެ އޮފީސްތަކާއި މުއައްސަސާތަކަށް އެކިވަރުގެ ގެއްލުން ލިބެމުންދާކަމަށް ވެއެވެ.
ދިވެހި މުޖުތަމަޢުގައި ފާހަގަކުރެވޭ ކަންތައްތަކަށް ބަލާއިރު މަގުމަތިން ހިނގާފައިދާ މީހުންގެ ދަބަސް ޖަހައިގަނެގެން ފިލުމާއި، އެކިތަންތަނުން ވައްކަންކުރުމާއި، އެކިއުކުޅުތައް ބޭނުންކޮށްގެން ބޭންކު އެކައުންޓްތަކުގައި ހުންނަ ފައިސާ ވަގަށް ނެގުމާއި، ދައުލަތާއި ގުޅުންހުރި ކަންކަމުން ނާޖާއިޒު ފައިދާ ނެގުންފަދަ ޖަރީމާތަކަކީ އޭގެ ސަބަބުން ބޮޑެތި ގެއްލުންތަކާއި ކުރިމަތިލާންޖެހޭ ކަންތައްތައް ކަމަށް ޚުތުބާގައިވެއެވެ.
މުސްލިމުންގެ މެދުގައި ވައްކަމާއި ނާޖާއިޒު ގޮތުގައި މުދާ ހޯދުމުގެ ވަބާ ފެތުރިފައި މިވަނީ، އަފުރާދުންގެ މެދުގައި އޮންނަންޖެހޭ ހަރުދަނާ ޢަޤީދާ އާއި އީމާންކަން ބަލިކަށިވެ ދުނިޔަވީ އެދުންތަކުގެ ޝިކާރައަކަށް ވުމުގެ ސަބަބުން ކަމަށާއި، މިއަދު ހާލަތު މިވަނީ މީސްމީހުންގެ ފުރާނައަށްވެސް ގެއްލުންދޭން ޖެހިލުން ނުވާ ހިސާބުގައި ކަމަށްވެސް މިއަދުގެ ހުކުރު ޚުތުބާގައި ފާހަގަކޮށްފައިވެއެވެ.
" ޤިޔާމަތް ދުވަހު، އެފަދަ މީހަކަށް އެންމެ އައުލާވެގެންވާ ތަނަކީ ނަރަކަ ކަން މާތް ނަބިއްޔާ ވަނީ އަންގަވާފަ. ވަގުތު ފާއިތުވުމުގެ ކުރިން ކުރެވިފައިވާ ފާފަތަކުން ތައުބާވެ ﷲ ގެ ޙަޟްރަތަށް ރުޖޫޢަވުމަށް އަވަސްވެގަނޭ" ޚުތުބާގައިވެއެވެ.
