ފިތުނައަކީ ހިތަށާއި ސިކުނޑިއަށް ޖެހޭ މުސީބާތެއް ކަމަށާއި އޭގެ ސަބަބުން ކެތްތެރީން އާވާރާވެ، މަގު އޮޅިގެންދާ ކަމަށް މިއަދުގެ ހުކުރު ޚުތުބާގައި ވަނީ ބުނެފައެވެ.
" ފިތުނަ އަކީ ދެކޮޅުވެރިކަމާއި، ބައިބައިވުން އުފެއްދުމަށް މަގުފަހިކުރުވާ ޝައިތާނީ ޢަމަލެއް. ހަޤީޤަތާއި ޚިލާފު ވާހަކަ ފެތުރުމަކީ، މީހުން ރުޅިއަރުވައި ފިތުނައިގެ ހުޅު ރޯކުރުމަށް ބޭނުންކުރެވޭ އެންމެ ބާރުގަދަ ވަސީލަތެއް" ޚުތުބާގައި ފާހަގަކުރިއެވެ.
އަދި އެންމެ ނުރައްކާތެރި ފިތުނައަކީ ދީނީ ފިތުނަ ކަމަށާއި، އެއީ ﷲ ގެ އަޅާއާ އޭނާގެ ވެރި ރަސްކަލާންގެއާ ދެމެދުގައިވާ ގުޅުން އިމްތިހާނު ކުރެވޭ ފިތުނައެއްކަމުގައިވެއެވެ. އަދި މި އިމްތިހާނުގައި ފެއިލްވާ މީހުން ފުރެދުމުގެތެރެއަށް ވެއްޓިގެންދާކަމަށް ޚުތުބާގައި ފާހަގަކޮށްފައިވެއެވެ.
" ފިތުނައިން ސަލާމަތްވެވޭނީ ހަމަބުއްދި ބޭނުންކޮށް، ރަނގަޅު ގޮތް ދެނެގަނެ، އެއަށް ތަބާވެގެން. ޤައުމެއްގައި ސައްޙަ ތެދު މަޢުލޫމާތާއި ހުނަރު ފެތުރިއްޖެނަމަ އެ ޤައުމެއް ކުރިއަރާނެ. ބަޔަކާ ފިތުނައެއް ކުރިމަތިވެއްޖެނަމަ އެކަންވެގެންދާނީ ވަކި މީހަކު އިސްތިސްނާ ނުވެ އެންމެން އޮޔާދާ ސުނާމީއަކަށް" ޚުތުބާގައި ފާހަގަކުރިއެވެ.
އަދި ޚުތުބާގައި ވަނީ ފިތުނައާއި މުސީބާތްތަކުން ސަލާމަތްވެވޭނީ އެންމެންއެކީ ﷲ ގެ އަމުރުފުޅުތަކަށް ތަބާވެގެންކަން ހަނދާންކޮށްދީ އިސްލާމްދީނުގެ އަދާވާތްތެރިންނަށް ޖާގަ ނުދިނުމަށް ގޮވާލާފައެވެ.
