އިސްރާފު ކުރުމަކީ ހަމައެކަނި ކެއުން ބުއިމާ ގުޅިފައިވާ ކަމެއް ނޫން ކަމަށާއި، އެއީ ކޮންމެ ކަމެއްގައި ވެސް ހައްދު ފަހަނައަޅައި ދިއުން ކަމަށް މިއަދުގެ ހުކުރު ޚުތުބާގައި ވަނީ ބުނެފައެވެ.
" އުރެދުންތަކަށް އަރައިގަތުން ގިނަކޮށް، ކުފުރުވުމާ ހަމައަށް ހިނގައްޖެނަމަ އެއީ ވެސް އެކަމުގައި އިސްރާފު ކުރުން. ހެޔޮގޮތުގައި ކާބޯތަކެތީގެ ބޭނުން ނުހިފައި، އޭގެ ހައްޤު އަދާނުކޮށް ގުދަންކޮށްފައި ބެހެއްޓުމަކީ ވެސް އިސްރާފު ކުރުން" ޚުތުބާގައި ފާހަގަކޮށްފައިވެއެވެ.
އިސްރާފު ކުރާ މީހުން ދެކެ އެކަލާންގެ ލޯބިވެވޮޑިގެން ނުވާކަމަށާއި، ފޭރާމާއި ހިފައި ގެންގުޅޭ ތަކެތި ހިސާބަށްވުރެ ގިނަކުރުމަކީ ވެސް އިސްރާފުކުރުން ކަމަށްވެއެވެ. އަދި ދެވަނަ ފަހަރަށް ބޭނުން ކުރެވިދާނެ ކާއެއްޗެހި އުކާނުލައި، އެތަކެތި ބޭނުންކުރުމަށް އިސްލާމް ދީން ބާރު އަޅައި ކަމަށާއި ކާބޯތަކެއްޗަކީ ﷲ ގެ ނިޢުމަތެއްކަމަށް ވެސް ފާހަގަކޮށްފައިވެއެވެ.
" މި ތަކެތި އުކާލުމަކީ ނިޢުމަތުގެ ވެރިފަރާތަށް ޝުކުރު ނުކުރުން. މުދާ ހަލާކުވަންދެން ބަހައްޓައި އެތަކެތި އުކާލުމަކީ އިސްރާފު ކުރުމަށްވުރެ ނުބައި ކަމެއް. އިސްރާފު ކުރުމަކީ ޝައިތާނާގެ ޢަމަލެއް. އެއީ އެކަމުގެ ގެއްލުން ސިއްޙީ ގޮތުންނާއި މާލީ ގޮތުން ފަރުދުންނާއި މުޖުތަމަޢަށް ފޯރާނެ ކަމެއް. ކީރިތި ރަސޫލާ ގެ އިރުޝާދަށް ތަބަޢަވެ އިސްރާފު ނުވާގޮތަށް ކެއުމާއި، ބުއިމުގެ ކަންތައްތައް ހަމަޖައްސައިލެވިދާނެ"
އަދި އިސްރާފު ކުރުމާއި ބޭކާރު ކަންކަމުގައި ހޭދަކުރުމަކީ އިސްލާމް ދީނުގައި ހިމެނޭ ކަންކަމެއް ނޫންކަމަށާއި، މުސްލިމުންގެ ގޮތަކީ ހައްޤު ގޮތުގައި މުދާ އެއްކޮށް ބޭނުންތެރި ކަންކަމަށް ހޭދަކުރުމެވެ. މުސްލިމުންނަކީ ދިމާވާ ދަތި ޙާލަތްތަކުގައި އެހެން މީހުންގެ މަސްލަހަތަށް ބެލުމެއް ނެތި ކާބޯތަކެއްޗާއި މުދާ ގަނެ ގުދަންކުރާ ބައެއް ނޫން ކަމަށާއި، މިއަދު އިސްރާފު ކުރަނީ ހަމައެކަނި މުއްސަނދިން ނޫން ކަމަށް ވެސް ހުކުރު ޚުތުބާގައި ފާހަގަކޮށްފައިވެއެވެ.
