ބަދުރު ހަނގުރާމަ ހިނގާފައިވަނީ ހިޖުރައިން 2ވަނަ އަހަރު، ރަމަޟާން މަހުގެ 17ވަނަ ދުވަހުއެވެ. މިއަދުގެ ހުކުރު ޚުތުބާގައި ފާހަގަކޮށްފައިވާގޮތުން އެދުވަހު، ޤުރައިޝް ވަންހައިގެ ބޮޑުން ނިކުތީ ބޮޑާކަމާއި ކިބުރުވެރިކަމާއެކުއެވެ. އެމީހުންގެ މި ބޮޑާކަމާއި ކިބުރުވެރިކަމުގެ ދަލީލަކަށް އަބޫޖަހުލުގެ ބަސް ފުދެއެވެ. އަބޫޖަހުލު ބުންޏެވެ. "ﷲ ގަންދީ ބުނަމެވެ. ބަދުރަށް ގޮސް 3 ދުވަސް ވަންދެން އެތަނުގައި ޖަމަލުމަސް ކައި، ރާބޮއި، އަންހެންކުދިން ލައްވައި ލަވަކިޔުއްވައި މަޖާކޮށްފައި ނޫނީ އަހަރުމެން އެނބުރި ނުދާނަމެވެ. އެއިރުން އަހަރުމެންގެ ނުފޫޒާއި ބާރު، ޢަރަބިންނަށް އެނގި، އަހަރުމެން ދެކެ އަބަދުވެސް އެމީހުން ބިރުގަންނާނެއެވެ".
އަދި ބަދުރުގެ ހާދިސާ އަންގައިދެނީ ﷲ ގެ ދީނަށްޓަކައި ވާންޖެހޭ ޤުރުބާނީގެ މަތިވެރިކަމާއި އެ ޤުރުބާނީގައި މަތިވެރި އަޞްޙާބުން ދައްކަވާފައިވާ ރިވެތި ނަމޫނާގެ އިތުރަށް އިސްލާމް ދީނުގައި މަޝްވަރާ ކުރުމަށް ބާރުއަޅާ މިންވަރު ކަމަށް ޚުތުބާގައި ފާހަގަކޮށްގައިވެއެވެ.
މައްކާގެ މުޝްރިކުންގެ ޚަބަރު އެނގިވަޑައިގެން، ކީރިތި ރަސޫލާ ޞައްލަﷲ ޢަލައިހި ވަޞައްލަމް އެކަލޭގެފާނުގެ އަރިހުގައި ތިއްބެވި ޞަޙާބީންގެ އަރިހުން މަޝްވަރާ އަށް އެދިވަޑައިގެން ޙަދީޘް ކުރައްވާފައިވަނީ "ތިމަންކަލޭގެފާނަށް މަޝްވަރާ ދެއްވާށެވެ. އެހިނދު މުހާޖިރުން އެކަލޭގެފާނުގެ އަރިހުގައި ސާބިތުވެ ތިއްބަވާނެކަން ބަޔާންކުރެއްވި" ޚުތުބާގައިވެއެވެ.
ބަދުރު ހަނގުރާމައިން ދަސްކޮށްދެނީ ނަސްރަކީ ﷲ ދެއްވާ އެއްޗެއް ކަމެވެ. އެއީ ފަހަރެއްގައިވެސް މާއްދީގޮތުން ލަޝްކަރުގެ ބައިބޯކަމާއި ހަތިޔާރުގެ މޮޅުކަމަށް ބިނާވެފައި އޮންނަ ކަމެއް ނޫންކަމެވެ. މިހަނގުރާމައިގައި މުސްލިމުންގެ އަދަދަކީ 313 ބޭކަލުންނެވެ. އޭގެތެރޭގައި ހިމެނެނީ ހަމައެކަނި 2 އަސްވާރުންނެވެ.
" ކީރިތި ރަސޫލާ ނިކުމެވަޑައިގަތީ ހަނގުރާމައެއް ކުރައްވާކަށެއް ނޫން. ދުޝްމަނުންގެ ލަޝްކަރުގެ އަދަދު ހާހަކަށްވުރެ ގިނަ. އަދި ސަތޭކަ އަސްވާރުން ތިބި. އެމީހުން ނިކުތީ ހަނގުރާމައަށް ތައްޔާރުވެގެން"
ބަދުރު ހަނގުރާމައިގެ މަތިވެރި ނަސްރުން ލިއްބައިދޭ އަނެއް ފިލާވަޅަކީ، މުއުމިނުންގެ އެންމެ ބާރުގަދަ ހަތިޔާރަކީ ދުޢާ ދެންނެވުން ކަމަށާއި، ހަނގުރާމައަށް ތައްޔާރުވަމުން ދިޔަ ހިނދު ކީރިތި ރަސޫލާ ދެއަތްޕުޅު އުފުއްލަވައި ﷲ ގެ ހަޟްރަތުގައި ނަޞްރަށް އެދިވަޑައިގެން އާދޭސް ދެންނެވި ކަމަށް ޚުތުބާގައި ބަޔާންކޮށްފައިވެއެވެ.
ބަދުރުގެ މަތިވެރި ނަޞްރުން ޢިބުރަތް ޙާޞިލުކުރައްވާ، އިސްލާމް ދީނުގެ ދިފާޢުގައި ކުރަންޖެހިއްޖެ ކޮންމެ ކަމެއްގައި ކެރިގެން ކުރިމަތިލުމަށް ޚުތުބާގައި ވަނީ ގޮވާލާފައެވެ.
