ދުނިޔޭގައި އިންސާނާ ހިތް ނޭދޭ ކަންކަން މާތް ﷲ ލައްވާފައިވަނީ އިލާހީ މަތިވެރި ޙިކުމަތަކަށްޓަކައެވެ. އެކަންވަނީ އެކަލާންގެ އަދުލުވެރި އިމްތިހާނުގެ ތެރެއިންނެވެ.
މާތް ﷲ ވަހީކުރައްވައިފައިވާ ބަސްފުޅެއްގެ މާނައިގައިވެއެވެ. " މީސްތަކުން ތިމަންމެން އީމާން ވެއްޖައީމުއޭ ބުނުމުން، އެއުރެން އިމްތިޙާނު ނުކުރައްވައި ދޫކޮށްލައްވާނޭކަމަށް ހީކުރީ ހެއްޔެވެ؟ އަދި ހަމަކަށަވަރުން އެއުރެންގެ ކުރީގެ (އުއްމަތްތަކުގެ) މީހުން، ތިމަން ރަސްކަލާންގެ އިމްތިޙާނު ކުރެއްވީއެވެ. ފަހެ (އީމާންކަމުގައި) ތެދުވެރިވި މީހުން، ހަމަކަށަވަރުން ﷲ ދެނެވޮޑިގެންވެތެވެ. އަދި ހަމަކަށަވަރުން ދޮގުވެރިން ވެސް އެކަލާންގެ ދެނެވޮޑިގެންވެތެވެ".
މުސްލިމް އަޅާގެ މައްޗަށް ވަނީ މިފަދަ ކަންކަމުން ޢިބްރަތް ޙާޞިލުކުރުމެވެ. މިފަދަ ކަންކަން ބަލައިގަންނަންވާނީ އޭނާ ޣާފިލުކަމުގެ ނިދިން ހޭލައްވާލުމެއްގެ ގޮތުގައެވެ. ހެޔޮ ޢަމަލުތައް ގިނަކޮށް ނުބައި ކަންކަމުން ދުރުހެލިވެ، މާތް ﷲ އާ ކުއްތަންވުމަށް މަގުފަހިކޮށްދޭ ވަސީލަތެއްގެ ގޮތުގައެވެ. މަރުމަތިން ހަނދާންކޮށް ޤިޔާމަތް ދުވަހަށް ތައްޔާރުވުމަށް ލިބޭ ފުރުސަތެއްގެ ގޮތުގައެވެ.
އަދި ދަންނަންޖެހޭ ހަޤީޤަތަކީ ދުނިޔޭގެ ހާލަތު އެއްގޮތެއްގައި ތާއަބަދު ދެމި ނޯންނާނެކަމެވެ. ދަތިކަމަކަށްފަހު ފަސޭހަކަމެއް އަންނާނެކަމެވެ. ތަދުމަޑުކަމަކަށްފަހު ތިޔާގިކަމެއް އަންނާނެކަމެވެ. މިއީ ދުނިޔޭގައި ކަން ހިނގާގޮތެވެ.
ހިތާމަތަކާއި، ހިތްދަތިކަމާއި ހިތް ނޭދޭ ކަންކަން ތަހައްމަލް ކުރަން ނުޖެހޭ ބަޔަކު ނޫޅޭކަން ހަނދާނަށް ގެންނަންޖެހެއެވެ. އެހެންކަމުން އަޅުގަނޑުމެންގެ މައްޗަށް ވާޖިބުވެގެންވަނީ ﷲ މިންވަރު ކުރެއްވި ކަމެއް މެނުވީ ކުރިމަތިނުވާނެކަން ހިތުގެ އަޑިން ޤަބޫލުކޮށް ﷲ އާ ވަކީލުކޮށް ޘަވާބާއި ދަރުމައަށް އެދޭ ޙާލު ކެތްތެރިވުމެވެ. އަދި ބައެއްފަހަރު މެދުވެރިވާ ބައެއް ކަންކަމަކީ އެއީ ކިތަންމެ ހިތް ނޭދޭ ކަންކަން ކަމުގައި ވީނަމަވެސް އެކަންކަމުގެ ފަހަތުގައި ހެވެއް ފޮރުވިފައި އޮވެދާނެ ކަން ޤަބޫލުކުރަންޖެހެއެވެ.
މަޢުލޫމާތު: ހުކުރު ޚުތުބާ
