ދުވަސްވަރަކީ މީގެ ފަންސާސް އަހަރު ކުރިއެވެ. އެދުވަސްވަރު ގއ. ބަކައްތާ އަކީ ހަމަ އެއަތޮޅު ކަނޑުހުޅުދޫ ގެ ބެލުމުގެ ދަށުގައި އޮތް ރަށެކެވެ. އެދުވަސްވަރުގައި ރާއްޖެ އަށް ވަނީ ވަރަށްބޮޑަށް ތަދުމަޑުކަން ވެރިވެފައެވެ. ކޮންމެވެސް ވަރަކަށް ކާށި ގަބުޅި ކުރުބާ ލިބެން ހުރެއެވެ. އެއީވެސް ވަރަށް މަދުންނެވެ. މި ދަތި ދުވަސްވަރުގައި ކަނޑުހުޅުދޫ ކަތީބަކީ އަބުދުލް ކަރީމް ކިޔާމީހެކެވެ. އެއްދުވަހަކު މީނާ ކުރިކަމަކީ ސަންގު ފުމެ ރަށުގެ ރައްޔިތުން އޮފީސް ކައިރިއަށް ޖަމާކުރުވިއެވެ. އަދި އެއްވި މީހުންނާއި ވާހަކަ ދައްކަމުން ކަރީމް ބުނަންފެށިއެވެ.

" މިދުވަސްވަރަކީ ވަރަށް ތަދުމަޑު ދުވަސްވަރަކަށްވެފައި އަތްމަތިވެސް ދަތި ދުވަސްވަރެއް. ވީމާ މިރަށުގެ ކުރިމަތީގައި އެއޮތް ބަކައްތާގައި ޒުވާރި ހައްދަމާ ހިނގާ. މަސައްކަތެއް ނުކޮށް ތިބޭކަށް ނުވާނެ. ދިހަކިލޯ ޒުވާރި ލިބިދާނެ. ވީމާ މިކަން ކުރަންވީ ނޫންތަ؟" ރައްޔިތުމީހުން މިކަމާއި އެއްބަސްވިއެވެ.

އޮފީހުން ކަނޑައެޅީ ގުރޫޕު ހަދައިގެން ކޮންމެ ގުރޫޕަކަށް ވެސް ވަކިވަރެއްގެ ބިން ދޫކުރުމަށެވެ. އެގޮތުން އެކުލަވާލީ ދިހަ ގުރޫޕެވެ. ކޮންމެ ގުރޫޕަކަށްވެސް ފައްސަތޭކަ ފޫޓުގެ ބިމެކެވެ. ހުރިހާ ގުރޫޕަކުންވެސް ވަރަށް ފޯރިއާއެކު އެރަށަށް ގޮސް އެގުރޫޕެއްގެ ދަނޑު ކޮށާ ސާފުކޮށްފިއެވެ. ދެން މުޑުވަށް ކުރުމަށް ކަނޑައެޅިފައިވާ ދުވަހަށް އެރަށަށް ގޮސް މުޑުވަށް ކޮށް ނިމިއްޖެއެވެ.

Advertisement

ކޮންމެ ދުވަހަކުވެސް ކޮންމެވެސް އެއްގުރޫޕަކުން އެރަށަށް ގޮސް ދަނޑުތަކަށް ފެންދެމުން އައިސް މިހާރު ގަސްފަޅާ ބޮޑުވަމުން އެބައާދެއެވެ. ބައެއް ގަސްތަކުން ކުރާ ވެސް އައިސްފައިވެއެވެ. ބަކައްތާ އަކީ ވަރަށްބޮޑު ދޮންވެލި ތުނޑިއެއް އޮންނަ ރަށެކެވެ. ވަރަށް ގިނަ ދޫނި ރޭކުރާ ރަށެކެވެ. އެހެންވުމުން ގިނައަދަދެއްގެ ދޫނި ބިސްވެސް ހުރެއެވެ. އަދި ރޭގަނޑު އެއްވެސް ބަޔަކު އެރަށަށް ގޮސް ނޫޅެއެވެ. މިއީ އަތޮޅު އެއްމެން ދަންނަ ޙަޤީޤަތެކެވެ. އެދުވަސްވަރު ދަނޑު ހައްދާމީހުން ނޫން އެހެން ބަޔަކު އެރަށަށް އެރުން އޮންނަނީ އޮފީހުން މަނާ ކޮށްފައެވެ. ނަމަވެސް މިއަމުރާއި ހިލާފަށް ކަނޑުހުޅުދޫ ދެތިންކުއްޖަކު ދަތުރެއް ރޭވިއެވެ.

ބަކައްތާ އަށް ގޮސް ދޫނިބިސް ނެގުމުގެ ދަތުރެކެވެ. މިގޮތުން ރަށުގެ ރައްޔިތުންނަށް ސިއްރުން މިކުދިން އެއްރެއަކު ބަކައްތާ އަށް ދަތުރަކުދިޔައެވެ. މިކަމުގައި އިސްވެ ހުރީ ކަނީރުގޭ އަޝްރަފް އެވެ. ދެންތިބީ ބޯގަންވިލާ ޝަރީފް އާއި ނޫރީގޭ ހުސައިން އެވެ. މި ތިންމީހުން ފިސާރި ފޯރީގައި ބަކައްތާ އަށް ދަތުރު ގޮސްފިއެވެ. އަދި މުޅިރަށް ވަށާ ހިނގާލުމަށްފަހު ދޮންވެލިގަޑުމަތީ ތިބެ ކޮންމެވެސް އެއްޗެއް ކާންފެށިއެވެ. ކެއުމުން ނިމިގެން ތިންމީހުންވެސް ތައްޔާރު ވަމުން މިދަނީ ދޫނިބިސް ނެގުމަށެވެ.

ތިންމީހުން ބޮޑު ތިން ކޮތަޅު ހިފައިގެން ތިންދިމާއަށް ހިނގާގެންފިއެވެ. ފުރަތަމަ ބިސް ނަގަންފެށީ އަޝްރަފް އެވެ. މިހާރު ތިންމީހުންވެސް ބިސްނަގަމުން ދަނިކޮށް އަޝްރަފަށް ފެނުނީ އޭނަގެ ބޯމަތީން ކަޅުދޫނި ތަކެއް އުދުހެނިކޮށެވެ. އަޝްރަފު ވަރަށް ބިރުގަންފިއެވެ. ދޫނިތައް އެއާގޮތަށް އަޝްރަފް ވަށައިލިއެވެ. އެއާއެކު ދޫނިތަކުގެ އަނގައިން އަލިފާން ދޫކުރަން ފެށުމާއެކު އަޝްރަފު އެހެންމީހުނަށް ގޮވަންފެށިއެވެ. އެހެން މީހުން ތިބި ހިސާބު ދުރުވީމާ އަޑުއިވޭގޮތެއްނުވިއެވެ. މިހާރު ދޫނިތައް ސިފަ ހުތުރު ޝައިތާނުން ތަކަކަށް ބަދަލުވެއްޖެއެވެ. އަޝްރަފް ހޭނެތިގެން ވެއްޓިއްޖެއެވެ. މަރުވީނޫންކަމެއްވެސް ނޭގެއެވެ. އާދެ! ހަމަމަރާލީއެވެ. ދެން މިދޫނިތައް ދިމާކުރީ ޝަރީފް އާއިއެވެ.

ފުރަތަމަވެސް ދޫނީގެ ސިފައިގައި ގޮސް ޝަރީފުގެ ބޯމައްޗަށް ތިރިކުރީއެވެ. އޭގެފަހުގައި ފުރޭތައަކަށް ބަދަލުވެ ހޫނު ވަޔެއް ދޫކޮށް ޝަރީފު އަންދާލީއެވެ. އެންމެފަހުން ދޫނިތައްގޮސް ހުސައިނު އާއި ދިމާކޮށްލީ މާރިދުންގެ ގޮތުގައެވެ. މާރިދުންގެ ވަކިތަކުން ހުސައިނު ނޮޅާލިއެވެ. މިޝައިތާނުންގެ އަތްދަށުވެ މިތިންމީހުންވެސް މަރުވީއެވެ. އަނެއްދުވަހު ދަނޑުތަކުގެ ވެރިން ބަކައްތާ އަށް ދިޔައިރު ބޮއްކުރައެއް އޮއްވާ ފެނުނެވެ. އެމީހުން ހީކުރީ ދަނޑުތަކުން ވައްކަން ކުރަން އައިސްގެން އުޅޭ ބައެއްކަމަށެވެ. ނަމަވެސް ރަށަށް އަރާ ބަލާލި އިރު އަޝްރަފު މަރުވެފައި އޮއްވާ ފެނުނެވެ. އަދިހަމަ އެހެންދިމާއަކުން ޝަރީފް މަރުވެފައި އޮއްވާ ފެނުނެވެ. ހަމަ އެއާއެކު ހުސައިނު ވެސް މަރުވެފައި އޮއްވާ ފެނިގެން މިމީހުން ވަރަށް ކަންބޮޑުވެއްޖެއެވެ. ދަނޑުތަކަށްވެސް ނުވަދެ މި ތިން ގަބުރު ގޮވައިގެން ރަށަށް ގޮސް ކުޑަސަހަރާގައި ވަޅުލީއެވެ. މިކުޑަސަހާރާ އަކީ ގޮތްނޭގޭ ގޮތަށް މަރުވާ މީހުން ވަޅުލާތަނެކެވެ.  

މިއީ ތުއްތުދީދީ ގެ 'އެވޭލާ ވާހަކަ' ފޮތުން ނަގައިފައިވާ ހާދިސާ އެކެވެ. އަސްލު ނުގެއްލޭގޮތަށް ބަދަލު ގެނެސްފައިވާނެއެވެ.