ބައެއް ފާފަތަކާއި ގާތްނުވުމަށް މާތް ﷲ އަންގަވާފައިވަނީ، އެކަމުގެ ނުބައިކަމާއި، ދެދުނިޔޭގައި ކުރިމަތިވެދާނެ ގެއްލުން ބޮޑުކަމުންނެވެ.
" ތިޔަބައިމީހުން ޒިނޭއާ ގާތްނުވާށެވެ. ހަމަކަށަވަރުން އެއީ ހުތުރުކަން ބޮޑުވެގެންވާ ފާފައެއް ކަމުގައިވިއެވެ." އެއްޗަކާ ގާތްނުވާން ބުނެއުޅެނީ އެއެއްޗެއްގެ ނުރައްކަލާއި ގެއްލުން ނުހަނު ބޮޑުވީމައެވެ. ޒިނޭއާ ދުރުވުމަށް އެންގެވީ އޭގެ ސުންޕާކަމުގެ ސަބަބުން މުޖުތަމަޢު ފަސާދަވެ، ނަސްލު އޮޅުންބޮޅުން ވާނެތީއެވެ. އަދި އީމާންކަން ނިގުޅިގެން ދާނެތީއެވެ.
އިންސާނަކަށް ވީތީ އޭނާގެ ކިބައިގާ ލައްވާފައިވާ ބޭނުންތަކާއި ޢަރީޒާ ތަކެއް ވެއެވެ. އެ ކަންކަމަށް އިޖާބަދޭނެ ޝަރުޢީ ގޮތްތައް މާތްﷲ ވަނީ ފަހިކޮށް ދެއްވާފައެވެ. އޭގެތެރެއިން އެއްކަމަކީ ޝަރުޢީ ކައިވެންޏެވެ. މިއީ ސައްޙަ ރައްކާތެރި ގޮތުގައި ޖިންސީ ޢަރީޒާ ޙާޞިލު ކުރުމަށް ހަމަޖައްސަވާފައިވާ މަގެވެ.
" ޒިނޭކުރުމާއި އެއްޖިންސުން ގުޅުން ހިންގުން އިސްލާމް ދީނުގައި މަނާ ކުރައްވާފައި ވަނީ ފާފަވެރިވުމުގެ އިތުރުން އެކަންކަމުގެ ސަބަބުން ދިމާވާ އިޖްތިމާޢީ އަޚްލާޤީ މައްސަލަތަކާއި، ނުރައްކާތެރި ވަބާތަކާއި، ބަލިތަކުން ފަރުދުންނާއި މުޖުތަމަޢު ރައްކާތެރި ކުރެއްވުމަށް. އޭގެތެރޭގައި އަނގައިގެ ކެންސަރާއި، ރަޙިމުގެ ކެންސަރާއި، ލަދުވެތި ގުނަވަންތަކަށް ޖެހޭ ކިހުނު ބަލި ފަދަ ނުރައްކާތެރި އެތައް ބަލިތަކެއް ހިމެނޭ." އެފަދަ ބައެއް ބަލީގެ ސަބަބުން ހަށިގަނޑުގެ ދިފާޢީ ނިޒާމު ހަލާކުވެ، ބޭސް ކުރިޔަސް ޝިފާ ލިބުން ލަސްވެ، ގުނަވަންތައް ހަލާކުވެ އެންމެ ފަހުން މަރާ ކުރިމަތިލާން ޖެހެއެވެ.
ހިނދުކޮޅެއްގެ އުފަލާއި އަރާމަށްޓަކައި މައުސޫމް އަންހެނުންނާއި، ފިރިހެނުން ދުނިޔޭގެ ދަހިވެތިކަމާއި، ތިމާގެ ކެހިވެރިކަމުގެ ދަލުގައި ޖައްސައި، މަކަރާއި ހީލަތުން ފާހިޝު އަމަލުތަކަށް އަރައިގަތުމަށް އެމީހުންނަށް މަޖުބޫރުކޮށް ދެދުނިޔޭގެ ބާއްޖަވެރިކަމުން މަޙްރޫމް ނުކުރާށެވެ.
މުސްލިމް ދިވެހި މުޖުތަމަޢުގައި ދެޖިންސުގެ މީހުން ހިމެނޭގޮތަށް އެކި ނަންނަމުގައި ހަށި ވިއްކުމުގެ ޙަރާމް ވިޔަފާރި ހިންގާ ބަޔަކު އުޅޭކަމީ ހިތާމަހުރި ކަމެކެވެ. އިސްވެދިޔަ އުއްމަތްތަކުގައި މިފަދަ ފާހިޝު ޢަމަލުތައް އާއްމުވުމުން މާތް ﷲ ގެ ކޯފާއާއި އަޒާބު އައި ގޮތާމެދު ވިސްނައި، ފާހިޝު އަމަލުތަކާ ދުރުހެލިވެ ދެދުނިޔޭގެ ބާއްޖަވެރިކަން ލިބެނިވި މަގަށް ދިރިއުޅުން ބައްޓަން ކުރަން ޖެހެއެވެ.
މުޅި މުޖުތަމަޢު ސަލާމަތްކުރުމަކީ މައިންބަފައިންނާއި ކޮންމެ ފަރުދެއްގެވެސް ޒިންމާއެކެވެ. ސަރުކާރާއި ކަމާއިބެހޭ ހުރިހާ ފަރާތްތަކެއް ގުޅިގެން، ޒުވާނުންނާއި މުޖުތަމަޢު ނުރައްކާތެރި ވަބާއިން ސަލާމަތް ކުރުމަށް އާ ހިތްވަރެއް ލާން ޖެހެއެވެ.
ކައިވެނި ކުރުން ހުއްދަ ކުރައްވާފައިވާއިރު ކައިވެނީގެ އިމުގެތެރެއިން، މާތް ﷲ ރުހިވޮޑިގެންވާ މަގުން ކަންކުރާށެވެ. ދެދުނިޔޭގެ ބާއްޖަވެރިކަން ލިބޭނީ އެއިރުންނެވެ. ﷲ ގެ މަގަށް ތަބާވެ ތަޤްވާވެރިވި މީހުންނަށް ތަނަވަސްވެގެންވާ ސުވަރުގެތައް ވަނީ ތައްޔާރު ކުރެވިފައެވެ.
ތިޔަބައިމީހުންގެ ވެރި ރަސްކަލާންގެ ހަޟްރަތުން ފާފަ ފުއްސެވުން ލިބިގަތުމަށާއި، އުޑުތަކާއި ބިން ފަދަ ތަނަވަސްކަން ހުރި ސުވަރުގެޔަށް ތިޔަބައިމީހުން އަވަސްވެގަންނާށެވެ. އެ ސުވަރުގެ ތައްޔާރު ކުރައްވާފައި ވަނީ ތަޤްވާވެރިންނަށެވެ.
މަޢުލޫމާތު: ހުކުރު ޚުތުބާ
