ދިވެހިރާއްޖޭގައި ރަޖިސްޓްރީކޮށްގެން ހިންގާ ވެބްސައިޓްތަކާއި ޓީވީތައް ވަރަށް ގިނައެވެ. މީގެތެރެއިން ބައެއް ތަންތަނުން ޚަބަރާއި މަޢުލޫމާތު ގެނެސްދެނީ އެދެވިގެންވާ ގޮތަކަށް ނޫނެވެ. ކަޑައެޅިގެން ޒާތީގޮތުން މީހުންނާއި ޖައްސާލާ އެމީހުންގެ އަބުރު ކަތިލާ ދޮގު މައުލޫމާތު ގެނެސްދިނުން މިވަނީ އާދައަކަށް ވެފައެވެ. އެންމެފަހުން މިއަދުގެ ހުކުރު ޚުތުބާގައި މިވަނީ ވަރަށް ރަނގަޅު ނަސޭހަތްތަކެއް ދީފައެވެ.
ނޫސްވެރިންނާއި ޚަބަރުތައް ގެނެސްދޭ ފަރާތްތަކުން އަދާކުރަމުން އެދަނީ ވަރަށްބޮޑު ދީނީ އަދި ޤައުމީ ވާޖިބެއް ކަމަށާއި، އެއްވެސް އޮޅުވާލުމެއްނެތި ކަމުގެ ހަޤީޤަތާއި އެއްގޮތަށް މީސްތަކުންނަށް ސައްޙަ ޚަބަރާއި ތެދު މަޢުލޫމާތު ފޯރުކޮށްދީ މަގު ދެއްކުމުގެ ޒިންމާ ކަމަށް ޚުތުބާގައި ބަޔާން ކޮށްފައިވެއެވެ.
" ދޮގު ޚަބަރު ފެތުރުމުން އުފެދޭ ފިތުނައިގެ ބޮޑުކަމުން، މާތް ﷲ ވަނީ އެ ކަންކަން މަނާ ކުރައްވައިފައި. އިންސާނާ ދައްކާ ވާހަކަ އާއި އެހެން މީހުންނަށް ފޯރުކޮށްދޭ މަޢުލޫމާތު ބިނާކުރަން ޖެހޭނީ ޝަރުޢީ ހަމަތަކުގެ މައްޗަށް. އޭގައި އޮޅުވާލުމެއް ދޮގު ވާހަކައެއް ހިމެނިގެން ނުވާނެ. ވަގު އެކައުންޓް ހަދައި މީސްތަކުންގެ އަބުރު ގެއްލޭފަދަ ވާހަކަތައް އާންމުކުރާ މީހުން މީސްތަކުންނަށް އޮޅުވާލިއަސް، މާތް ﷲ އެކަންކަން މޮޅަށް ދެނެވޮޑިގެންވާކަން ދަނެ، އެކަލާންގެއަށް ބިރުވެތިވާންޖެހޭ." ޚުތުބާގައި ވެއެވެ.
އަދި ތެދު ބެލުމެއްނެތި މީޑިއާއިން ފެންނަހާ އެއްޗަކަށް ލައިކުކޮށް ޝެއާކުރުމާއި ރީޓުވީޓް ކުރުމަކީ ވަރަށް ނުރައްކާތެރި ނަތީޖާއެއް ނުކުމެދާނެ ކަމެއް ކަމަށް ވެސް ފާހަގަކޮށްފައި ވެއެވެ. ނޫސްވެރިންނާއި ޚަބަރު ގެނެސްދޭ ފަރާތްތަކުގެ ޒިންމާއަކީ މުޖުތަމަޢު ފަސާދަ ކުރުން ނޫން ކަމަށާއި، މުޖުތަމަޢާއި ފަރުދުން އިސްލާހު ކުރުން ކަމުގައި ޚުތުބާގައިވެއެވެ.
" މާތް ﷲ ގެ ދީނަށް ފުރައްސާރަ ކޮށްގެން ނުވާނެ. އަދި ތިމާ ފަތުރާ ޚަބަރަކުން އެއްވެސް މީހެއްގެ ޢިއްޒަތާއި އަބުރަށް އުނިކަމެއް އައިސްގެން ނުވާނެ. ޒާތީ ކަންކަމުގެ މަޢުލޫމާތު އާއްމުކޮށް ހާމަކޮށްގެން ނުވާނެ. މިއީ އިސްލާމް ދީނުގައި ނަހީކުރައްވާފައިވާ ކަންކަން." ޚުތުބާގައި ވެއެވެ.
ބައެއް މީޑިއާތަކުން އިސްލާމީ ރިވެތި އަޚްލާޤާއި ދިވެހިންގެ ރީތި އާދަކާދައާ ޚިލާފު މަންޒަރުތަކާއި ޚަބަރުތައް ގެނެސްދެމުންދާތީ މުޖުތަމަޢުގެ އަޚްލާޤީ ފޭރާން ވީދިގެންދާ ކަމަށްވެސް ޚުތުބާގައި ވަނީ ފާހަގަކޮށްފައެވެ. ދޮގު ޚަބަރު ފަތުރާ މީހާއަކީ އޭނާގެ ތަބީޢަތުގައި ދޭތެރެ ޖެއްސުމާއި ދެބައޮޑުވުމުގެ ނުބައި ސިފަ އަށަގެންފައިވާ މީހެއް ކަމަށާއި، އެއީ ފަރުދުންނާއި މުޖުތަމަޢުގެ މަސްލަހަތު ނަގާލަން މަސައްކަތް ކުރާ މީހެއް ކަމަށްވެސް ވަނީ ބަޔާންކޮށްފައެވެ.
ތެދު މަޢުލޫމާތު ފެތުރުމަށް ބާރުއަޅާ ޚުތުބާ ގެނެސްދިނުމާއި އެކު ސޯޝަލް މީޑިއާގައި ގިނަ އަދަދެއްގެ ބަޔަކު ވަނީ 'ޚުތުބާ އަޑު އެހުމަށްފަހު އިސްލާހުވުމަށް' ގޮވާލާފައެވެ. ފޭސްބުކާއި ޓުވިޓާގައި ވަގު އެކައުންޓް ހަދައި ދޮގު މަޢުލޫމާތު ފަތުރާ، މީހުންގެ އަބުރު ކަތިލަމުންދާއިރު މިކަން ހުއްޓުވުމަށް އެކަށީގެންވާ ފިޔަވަޅެއް އަޅާމަންޒަރު ނުފެނެއެވެ. މިފަދަ ފަރާތްތަކުން ފަތުރާ ދޮގު ވާހަކަތައް ޝެއާ ކޮށް ލައިކް ކުރާ މީހަކަށް ނުވެ މިކަމުގައި ފަރުދީގޮތުން ޒިންމާ ނަގަމާތޯއެވެ. އަދި ދޮގު ޚަބަރު ފަތުރާ މީޑިއާތަކަށާއި މީހުންނަށް މުޖުތަމަޢު ފަސާދަކުރުމުގެ ފުރުސަތު ދެވިގެން ނުވާނެއެވެ.
