މައިންބަފައިންނޭވެ. ދަރިންގެ ތަރުބިއްޔަތާއި މެދު މިހާރަށްވުރެ ބޮޑަށް ސަމާލުވާށެވެ. މަސްތުވާތަކެތީގެ ތެރެއަށް ދަރިން ގެންދިޔުމަށް މަސައްކަތްކުރާ ބަޔަކު އަވަދިނެތި އެކަން އެބަކުރެއެވެ.
ވަކިން ޚާއްސަކޮށް ފުރާވަރުގެ ކުދިންނާމެދު ސަމާލުވާށެވެ. މަސްތުވާތަކެތީގެ ވިޔަފާރިކުރާ ފަރާތްތަކުން އެބައިމީހުންގެ ޙަރާމް ވިޔަފާރީގަ ފުރާވަރުގެ ކުދިން ބޭނުންކުރަމުންދާ ކަމީ ހިތާމަވެރި ކަމެކެވެ. މިއުމުރުގެ ކުދިން މަސްތުވާތަކެތީގެ އަވާގައި ޖައްސާ އެބައިމީހުން އަމިއްލަ މަންފާއަށް އެކުދިންގެ މުޅި ދިރިއުޅުން ބަނަކުރުމަށް ގިނަ މަސައްކަތްތަކެއް ކުރަމުންދާކަން ހިނދުކޮޅަކަށްވެސް ހަނދާނުން ކައްސާލިޔަ ނުދޭށެވެ.
" އޮންލައިން ބައެއް ގޭމްތަކާއި، ސޯޝަލް މީޑިއާގެ ޕްލެޓްފޯމްތަކުގައި އެކުދިން ޝިކާރަކުރުމަށް މަޅިފަތި ޖަހައިގެން ޝިކާރަވެރިން ތިބިކަން، ހަނދާނުން ކައްސާލިޔަ ނުދީ. އިންޓަނެޓް ރައްކާތެރި ގޮތުގައި ބޭނުންކުރުމަށް ދަސްކޮށްދީ، ބަދަހި ގުޅުމެއް އެކުދިންނާ އެކު ޤާއިމު ކުރޭ."
މަސްތުވާ ކޮންމެ އެއްޗަކީ އޭގެ ސަބަބުން އެ ބޭނުންކުރާ މީހާ ހަމަބުއްދިން އެއްކިބާކޮށްލާ އެއްޗެކެވެ. ނަތީޖާއެއްގެ ގޮތުން ސިކުނޑިން ފޮނުވާ ނުރަނގަޅު މެސެޖުތަކެއްގެ ސަބަބުން އަމިއްލަ ނަފްސުގެ ކޮންޓްރޯލް ގެއްލިގެންދެއެވެ. އިސްލާމް ދީނުގައި މަސްތުވާ ހުރިހާ ބާވަތެއް ޙަރާމް ކޮށްފަވަނީ އެއިން ލިބޭ ގެއްލުމުން މުޖުތަމަޢާއި އަފްރާދުން ސަލާމަތް ކޮށްދިނުމަށެވެ.
" މުޖުތަމަޢުގައި މަސްތުވާ ތަކެތީގެ ވަބާގެ ޝިކާރައަކަށް ވެފައިވާ މީހަކު ނުވަތަ ޒުވާނަކު ނެތް އާއިލާއެއް މަދު. މަސްތުވާތަކެތީގެ ވިޔަފާރި ކުރާ ތަންތަން ހިންގުމާއި، މަސްތުވާތަކެތި ބޭނުންކުރުމަށް ޚާއްސަ ކެފޭތައް ސިއްރިޔާތުގައި ހިންގުމަކީ މިއަދު ފެންނަން އޮތް ހިތްދަތި ހަޤީޤަތެއް. މައިންބަފައިންނާއި، އަނބިދަރިންގެ ކަރުނަ ފޮހެދީ ކާއެތިކޮޅު ފޯރުކޮށްދޭން ޖެހޭ އަތްތަކުން ކާއެތިކޮޅަށް ހޭދަކުރަން އޮންނަ ލާރިކޮޅު އަންދައި އަޅިއަށް ހަދާލައި، ހިފާގެންގުޅޭ ސާމާނުން ފެށިގެން ހަރުމުދާތައް ވިއްކާ ހުސްކުރަނީ. މުޖުތަމައުގައި ހިނގާ ގެވެށި އަނިޔާގެ ގިނަ މައްސަލަތަކުގައި މަސްތުވާ ތަކެތީގެ ބޮޑު ދައުރެއް އޮންނަ ކަމީ ހަޤީޤަތެއް."
މަސްތުވާތަކެތީގެ ވިޔަފާރިކޮށް، ފައިސާގެ ދަހިވެތިކަމުގައި، ޖީލުތައް ބަރުބާދުކުރާ މީހުންނޭވެ. އެތައް ސަތޭކަ މައިންގެ ލޯތައް ލޭގެ ކަރުނައިގެ ކޯރުތަކުން ފުރާލި ރަޙުމުކުޑަ މީހުންނޭވެ. ﷲ އަށް ބިރުވެތިވާންވީ ވަގުތު އަދިވެސް ނާންނަނީ ހެއްޔެވެ؟ ﷲ އަށް ތައުބާ ނުވެ ހުރެ މަރުވެއްޖެނަމަ ތިބާއާ ކުރިމަތިވާނެ ކަންތައްތަކާ މެދު ފުންކޮށް ވިސްނާށެވެ.
" މަސްތުވާތަކެތީގެ ވިޔަފާރިކުރާ މީހުންނޭވެ. ތިބާގެ މުޅި ހަޔާތް ބިނާކުރަނީ ޙަރާމް ވިޔަފާރިއެއްގެ މައްޗަށް. މަސްތުވާތަކެތީގެ ވިޔަފާރިން ލިބޭ ފައިސާ އަކީ ކަނޑައެޅިގެން ޙަރާމްވެގެންވާ އެއްޗެއް. ތިބާ އެންމެ ލޯބިވާ އަނބިދަރިންނަށް ކާން ތިޔަދެނީ އަލިފާން. ޙަރާމް ތަކެތި ކައިގެން ހަށިގަނޑުގައި ޖަހާ މަހަށް އައުލާވެގެންވަނީ ނަރަކަ ކަމަށް ނަބަވީ އިރުޝާދުތަކުގައި ބަޔާންކުރައްވާފަވޭ."
މަސްތުވާތަކެތީގެ ވަބާގެ ޝިކާރައަކަށް ވެފައިވާ މީހުންނަކީ އެހީތެރިކަން ބޭނުންވާ ބައެކެވެ. މުޖުތަމައުގައި ސަލާމަތުން ތިބި މީހުން އެބައިމީހުންނަށް އެހީތެރި ނުވެއްޖެނަމަ އެވަބާއިން ސަލާމަތްވެވޭނެ ގޮތަކީ ކޮބައި ހެއްޔެވެ؟ ކޮންމެ މީހަކުވެސް އެމީހެއްގެ ފަރުދީ ޒިންމާ އަދާކުރުމަށް އަވަސްވެގަނެ، މިވަބާއާއި ދެކޮޅަށް ކުރާ މަސައްކަތުގައި އެއްބާރުލުން ދޭށެވެ.
ހުކުރު ޚުތުބާގައި ވަނީ ޒިންމާ އަދާކުރެއްވުމުގައި ފަހަތަށް ނުޖެހި، މި ނުރައްކާތެރި ވަބާއިން މުޅި ޤައުމު ސަލާމަތްކުރުމަށް މަސައްކަތް ކޮށްދިނުމަށް ކަމާބެހޭ މުއައްސަސާތަކާއި މަސްއޫލުވެރިންނަށް ގޮވާލާފައެވެ.
ނޯޓް: މިލިޔުމުގައިވާ މައުލޫމާތު ނަގާފައިވަނީ މިއަދުގެ ހުކުރު ޚުތުބާއިންނެވެ.
