ދުނިޔޭގެ އެކި ކަންކޮޅުތަކަށް ބަލާއިރު މި ޒަމާނަކީ މާސްޓަރސް ޑިގްރީ އަދި ޕީ.އެޗް.ޑީ އަށް ކިޔަވައިގެން ތިބި ނަމަވެސް ވަޒީފާގެ ފުރުސަތު ލިބުން ދަތި ޒަމާނެކެވެ. މެލޭޝިއާ އަށް އުފަން ނުރައިޝާ ޝަމްޝުއްދީނަކީ އާދައިގެ ދިރިއުޅުމެއް ޚިޔާރުކޮށް ވަޒީފާ ދޫކޮށްލި ނަމަވެސް، ކާމިޔާބު ކަމާއި، މަސައްކަތްތެރި ކަމާއި، ހީވާގި ކަމުން ކުރިއަރައިފައިވާ ޒުވާނެކެވެ. އުމުރުން 27 އަހަރުގެ މި ޒުވާނާ އަކީ ގްރެފިކްސް ޑިޒައިނިންގެ ރޮގުން މާސްޓަރސް ޑިގްރީ ހާސިލް ކޮށްފައިވާ ޒުވާނެކެވެ. އޭނާގެ ވިސްނުމަށް އައީ މުޅިން ތަފާތު ޚިޔާލެކެވެ. ވަކި އިރަކަށް މަސައްކަތްތައް ނިންމައި، މީހެއްގެ ދަށުން މަސައްކަތް ކުރުމަށްވުރެ އޭނާގެ އަމިއްލަ މަސައްކަތުން ލިބޭ ހިތްހަމަޖެހުން ބޮޑުކަން އެތައް ގުނައަކަށް ރަނގަޅުވެގެން ހިގައިދާނެ ކަމެވެ.

އޭނާ އަކީ ކުއަލަލަމްޕޫރުގެ އެންމެ ކާރުބާރު ބޮޑު ހިސާބުގައި ދިރިއުޅެމުން އައި މީހެކެވެ. އަދި ގްރެފިކްސް ޑިޒައިނަރެއްގެ ގޮތުގައި އެއްވެސް އަރާމް ކުރުމެއްނެތި، ވަރަށް ބުރަކޮށް މަސައްކަތް ކުރަމުން އައި މީހެކެވެ. މިގޮތުން އޭނާ ވިސްނީ  އަމިއްލަ ވިލެޖަށް ގޮސް ދިރިއުޅުން އާރާސްތު ކުރާނެ ގޮތަކާއި މެދުއެވެ.

އޭނާގެ މާމަ އަދި ކާފަ އަކީ އެކި ބާވަތް ބާވަތުގެ މޭވާ ހައްދައިގެން އާމްދަނީ ހޯދުމަށް މަސައްކަތް ކޮށްފައިވާ ބައެކެވެ. އެހެން ނަމަވެސް ނުރައިޝާ ބޭނުންވީ ތަފާތު ވައްތަރުގެ ތަރުކާރީ ހައްދާނެ ގޮތް ދަސްކުރުމަށެވެ. މިގޮތުން މިކަމާއި ގުޅޭ ހުރިހާ ކަމެއް އޭނާ ދަސްކޮށްފައި ވަނީ ޔޫޓިއުބާއި އިންޓަރނެޓު ބަލައިގެންނެވެ. ފުރަތަމަ ކަމަކަށް ތަފާތު ވައްތަރުގެ މޭވާ ގަސް ހެއްދިއެވެ. އަދި މިތަކެތި ދޮންވެ ފައްކާވުމާއި ދޭތެރޭ އޮތް ދުވަސް ކޮޅު ތަރުކާރީ ހައްދާނެ ވަސީލަތްތައް ހޯދައި ބަށި ލެޓިއުސް ކައްޓަލަ ފަދަ ވަރަށް ގިނަ ވައްތަރުގެ ތަރުކާރީ ގަސް ހެއްދިއެވެ. 

Advertisement

އޭނާގެ ޓްވިޓަރ އެކައުންޓް މެދުވެރިކޮށް ލިބުނު މައުލޫމާތުން ނުރައިޝާ އަކީ، ޕޮލިސިސްޓިކް އޯވަރީގެ މައްސަލަ ހުންނަ މީހަކަށްވެފައި، ފައިދާހުރި ކާނާ ކެއުމަށް ސަމާލުކަމެއް ނުދެވުނީ ކުރީގެ ބުރަ ދިރިއުޅުމުގެ ސަބަބުންނެވެ. ނަމަވެސް މިއަދު އޭނާ އަކީ ހަށިގަޑުގެ ބުރަހެލި ކަމުން ދުރުވެ ސިސްޓުގެ މައްސަލައަށް ވެސް ލުއި ލިބިފައިވާ ޒުވާނެކެވެ. މިހުރިހާ ކަމެއްގެ ސިއްރަކަށް ނުރައިޝާ ޤަބޫލު ކުރަނީ ފައިދާހުރި ކާނާއާއި އަމިއްލައަށް ތައްޔާރުކުރާ ކާނާ އެވެ. މިގޮތުން ބަރުދަނުގައި ކުރިން 82 ކިލޯ ހުރިއިރު، 17 ކިލޯ ލުއި ކުރިކަމަށް ނުރައިޝާ ވަނީ ބުނެފައެވެ.

މިހުރިހާ ކަމަކުން ދޭހަވީ ބޭރުން ކެއުމަކީ ހަށިގަޑަށް ވަރަށް ގެއްލުން ހުރިކަމެއް ކަމެވެ. މިއަދު ނުރައިޝާ އަކީ އަމިއްލަ ބިމެއް ގަނެ، އޭނާގެ ބުރަ މަސައްކަތުން  އެބިމުގައި ހުރިހާ ވައްތަރެއްގެ ތަރުކާރީ އާއި މޭވާ ހައްދައިގެން ދުނިޔޭގެ ބާޒާރުގައި ވިއްކަމުންދާ މީހެކެވެ. ނުރައިޝާ ބޭނުންވީ ކިޔަވައިގެން ހުރެ ވަޒީފާއަކަށް ނުގޮސް ދިރިއުޅުމުގައި އަމިއްލަ މަސައްކަތުން ކާމިޔާބީއަށް ވާސިލް ވުމަށެވެ.

މިއަދު ނުރައިޝާ ދައްކުވައިދިނީ ސާދާ ރީތި މިސާލެކެވެ. އޭނާއަކީ އެއްވެސް ދަރަންޏެއް ނެތި، ޕެރެޑުއަރ ކާރެއް ދުއްވާ، މީހެއްގެ މަސައްކަތުގައި މީހެއްގެ އަޅުވެތި ކަމުގައި ނޫޅެ، މީހުން ހިތްރުއްސަން ކަންކަން ކުރަން ނުޖެހި، އަމިއްލައަށް ހިތްހަމަޖެހިގެން ދިރިއުޅޭ މީހެކެވެ. ނުރައިޝާ ދިރިއުޅުން ސިފަކުރަނީ ހިތްހަމަޖެހޭ އުފާވެރި ދިރިއުޅުމެއްގެ ގޮތުގައެވެ. ދިރިއުޅުމަށް ތަރުކާރީ ވިއްކައިގެން،  ހުރިހާ ބޭނުންތަކެއް ފުދިގެން، މިނިވަންކަމާއި އެކު ހިތްހަމަޖެހިގެން، އޭނާގެ ހަޔާތް ވޭތުކުރަނީ، ވަރަށް އުފަލުންނެވެ.

މައުލޫމާތާއި ފޮޓޯ: ސޭސް އަދި ޓްވިޓަރ