މާތް ﷲ ޒަކާތް ފަރުޟު ކުރައްވާފައި ވަނީ ވަރަށް މަތިވެރި ހިކުމަތަކަށްޓަކައެވެ. ޒަކާތުގެ ސަބަބުން ދަހިވެތިކަމުގެ ނުބައި ސިފައިން ސަލާމަތްވެ، އެބައިމީހުންގެ މުދަލުގައި، މާތް ﷲ ބަރަކާތް ލައްވައި އިތުރު ކުރައްވައެވެ.
އިންސާނުންގެ ތެރެއިން ބައެއް މީހުންނަށް ރިޒްޤު ތަނަވަސްކޮށްދެއްވައި، ތަފާތު ބާވަތް ބާވަތުން މުއްސަނދިކަން ދެއްވަނީ، އިމްތިހާނު ކުރެއްވުމަށްޓަކައެވެ. ޒަކާތް ދިނުމަކީ، މުދާ ތާހިރު ކުރައްވައި ރައްކާތެރިކޮށްދެއްވާނެ ކަމެކެވެ.
" މުސްލިމް އަޚުންނޭވެ! ޒަކާތަކީ އޭގެ ސަބަބުން މުއްސަނދިންގެ މުދަލާމެދު ފަގީރުންގެ ހިތްތައް ސާފުވެ، މުދަލުގެ އަހުލުވެރިންނަށް އެބައިމީހުންގެ ހެޔޮ ދުޢާ ލިބިގެން ދިއުމުގެ ސަބަބެއް. އަދި މުޖުތަމަޢުން ފަޤީރުކަން ފިލައި، ނިކަމެތީންގެ މޫނުމަތިން އުފާވެރިކަމާއި ހިނިތުންވުމުގެ އަސަރުތައް ފާޅުކޮށްދޭ ކަމެއް. އިސްލާމީ މުޖުތަމަޢުގައި، އޮންނަންޖެހޭ އެކުވެރިކަމާއި ހަމްދަރުދީގެ މަތިވެރި ސިފަ ރަމްޒު ކޮށްދޭ ކަމެއް.
އަދި މިއީ އިސްލާމީ ދައުލަތުގެ ބައިތުލްމާލަށް އިޤްތިސާދީގޮތުން ލިބޭ ވަރުގަދަ ބާރެކެވެ. މުދަލުގެ ޒަކާތް ނެރުން ވާޖިބުވަނީ، މައިގަނޑު ތިން ޝަރުތެއް ހަމަވުމުންނެވެ. އެއީ މުދަލުގެ ނިސާބު ހަމަވުމާއި، ނިސާބު ހަމަވެ، އެއަށް ހިޖުރީ އަހަރުން އެއްއަހަރު ފުރުމާއި، ތިމާގެ ފުރިހަމަ މިލްކުވެރިކަމުގައި އެ މުދާ ހުރުމެވެ.
" މުދަލުގެ ޒަކާތުގެ ނިސާބަކީ ރަނުންނަމަ 85 ގުރާމް. ރިހިންނަމަ 595 ގުރާމް. ދިވެހިރާއްޖޭގައި ނިސާބު ބަލަނީ ރިހިން. ބާޒާރުގައި ރިހީގެ އަގަށް އަންނަ ބަދަލާ ގުޅިގެން ދިވެހި ފައިސާއިން ޒަކާތުގެ ނިސާބަށް ޖެހޭ އަދަދަށް ބަދަލު އަންނާނެ. މީހެއްގެ އަތުގައި ހުރި މުދަލުގެ ނިސާބު ހަމަވެ، ނިސާބަށްވުރެ މަދުނުވެ ހިޖުރީ ސަނަތުން އެއްއަހަރު ވެއްޖެނަމަ، އެ މުދަލުގެ ސާޅީސްބައިކުޅަ އެއްބައި ޒަކާތަށް ނެރުން ވާޖިބުވާނެ."
ޒަކާތް ނެރުން ވާޖިބުވެފައިވާ މީހާ، ޒަކާތް ނެރުން ފަސްކުޅައުން ހުއްދަވެގެނެއް ނުވެއެވެ. ވިޔަފާރިވެރިޔަކު ނަމަ ނިސާބު ހަމަވިތޯ ބަލާނީ އަތުގައި ހުރި ފައިސާގެ ތެރެއަށް ވިޔަފާރި މުދާ ގަތް އަގު އެއްކޮށް ޖުމްލަ އަގުންނެވެ.
" ކުންފުނި ހިންގާ ފަރާތުން ޒަކާތް ނުނެރޭނަމަ، ކުންފުނީގެ ހިއްސާދާރުން އަމިއްލައަށް އެމީހެއްގެ ހިއްސާއާއި ފައިދާގެ ޒަކާތް ނެރުން ވާޖިބުވާނެ. ހިއްސާގެ އަގުން ޒަކާތް ނެރޭނީ އެއީ ގަނެވިއްކާ ހިއްސާ ކަމުގައިވާނަމަ. އެ ނޫން ހިއްސާތަކުން ޒަކާތް ވާޖިބުވާނީ އެއިން ލިބޭ ފައިދާއިން. އަމިއްލަ ބޭނުމަށް ދުއްވާ އޮޑިދޯނިފަހަރާއި، ކާރާއި، ސައިކަލް އަދި ގެދޮރުން ޒަކާތް ދިނުން ވާޖިބެއް ނޫން. އެފަދަތަކެތި ކުއްޔަށްދޭނަމަ ލިބޭ ކުލިން ޒަކާތް ނެރެންޖެހޭނެ."
ދަނޑުގޮވާމާއި މޭވާއިން ޒަކާތް ދޭން ޖެހޭނީ ފަހަށް ރައްކާކޮށްފައި ބެހެއްޓޭ ފަދަ އޮށްޓަރު ހުންނަ ގޮވާމުން ކަމަށާއި، ޒަކާތް ދޭންޖެހޭ މޭވާގެ ބާވަތްތަކަކަކީ ކަދުރާއި މޭބިސްކަދުރެވެ. ތަރުކާރީއާއި، އެހެނިހެން މޭވާގެ ބަވަތްތަކުން ޒަކާތް ދޭކަށް ނުޖެހޭނެއެވެ. އެފަދަ ބާވަތްތަކުން ޒަކާތް ދޭން ޖެހޭނީ އެ ތަކެތި ވިޔަފާރި މުދަލެއްގެ ގޮތުގައި ބޭނުންކުރާނަމަ އެ ވިއްކައިގެން ލިބޭ އަގުންނެވެ.
ޒަކާތް ދިނުމުން މަނާވެގަތުމަކީ ބޮޑުވެގެންވާ ފާފައެކެވެ. އަދި ވޭންދެނިވި އަޒާބު ހުރި ކަމެކެވެ. ނަމާދު ފަދައިން ޒަކާތަކީ ވެސް އިސްލާމްދީނުގެ ރުކުނެއްކަމުގައި ވުމުން، ނަމާދު އަދާކުރާނެ ގޮތުގެ ހުކުމްތައް ދަސްކުރާފަދައިން ޒަކާތުގެ ހުކުމްތައް ދަސްކުރުމަކީ ކޮންމެހެން ކުރަންޖެހޭ ކަމެކެވެ.
މައުލޫމާތު: ހުކުރު ޚުތުބާ/ މިނިސްޓްރީ އޮފް އިސްލާމިކް އެފެއާޒް
