އަޅުގަނޑުމެންގެ ތެރޭގައި ތަފާތު ވިސްނުން ގެންގުޅޭ މީހުން އުޅެއެވެ. ދުނިޔޭގައި އުޅޭއިރު ދިމާވާނީ ތަފާތު ކަންކަމެވެ. އެކަންކަމާއި ކުރިމަތިލާއިރު އެކަމެއްގެ ރީތި އަހްލާގާއި ސުލޫކީ މިންގަޑުން ކަންކަން ބައްޓަން ކުރުން މުހިންމެވެ.
މިދެންނެވި ގޮތުން ބަލާއިރު ކުރަން ބޭނުންވާ ކޮންމެ ކަމަކާއިވެސް ކުރިމަތިލައިފިނަމަ ކާމިޔާބުވުމުގެ ފުރުސަތު ބޮޑެވެ. ނަމަވެސް ކަންކަމުގައި ބޭކާރު ވިސްނުން ވިސްނާނަމަ އެކަމެއް ކާމިޔާބު ކުރުމަކީ އެހާ ފަސޭހަ ކަމަކަށް ނުވެ ހިގައިދާނެއެވެ. މިސާލަކަށް މިކަމަކީ، "ތިމާ ކުރިމަތިލައިފިނަމަ ނުވާނެ ކަމެއް. ނުވަތަ އެކަން ކުރުމުގެ ކުޅަދާނަ ކަމެއް އަހަންނަކަށް ނެތް. ނުވަތަ އެފެންވަރެއް ނެތް." އަމިއްލަ ނަފްސަށް ޔަގީންކަމެއް ނެތް، މިބާވަތުގެ ތަފާތު ހިޔާލުތަކާއި، ޝައްކުތަކުގައި ހުރެ ކަންކަމާއި ކުރިމަތިލާއިރު އެކަންކަން ކާމިޔާބު ނުވެ ހިގައިދާނެއެވެ.
ވީމާ، ކަމަކާއި ކުރިމަތިލާންވާނީ އެކަން ކުރެވޭނެ ކަމުގެ ފުރިހަމަ ޔަގީން ކަމާއި އެކުގައެވެ. ޝައްކުތައް ފިލުވާލައިގެންނެވެ. ކަމަކާ ކުރިމަތިލާނަމަ އެކަމުގެ މަގްސަދު ހާސިލު ކުރުމަށް ވިސްނައިގެން އެކަމެއްގެ ރަނގަޅު ގޮތާއި ނުބައިގޮތް ވިސްނައިގެން ކުރިމަތިލައިފިނަމަ ގިނަ ފަހަރަށް އެކަމެއް ކާމިޔާބު ވުމަކީ ވަރަށް އެކަށީގެންވާ ކަމެކެވެ.
ކަންކަމާއި ކުރިމަތިލާއިރު ވިސްނުން ބަހައްޓަންޖެހޭ މުހިންމު ކަންތައްތައް:
ކަންކަމުގައި އަވަހަށް ގޮތް ނިންމުން:
މިސާލަކަށް ކަމެއް ކުރުމުގެ ކުރިން ތިމާ ކުރަން މިއުޅޭކަމަކީ ކޮބައިތޯއާއި އެކަމެއް ކުރުމަށް އެންމެ ރަނގަޅު ގޮތާއިމެދު ވިސްނަން ޖެހޭނެއެވެ. ދެންވެދާނެ ގޮތަކާއި މެދު އަދި ވާނެ ގޮތަކާއިމެދު ޝައްކުގެ މަތީގައި ހުރެގެން ނުވާނެއެވެ.
ހިތްވަރާއި އެކު ކަންކަން ކުރުން:
ކަމަކާ ކުރިމަތިލާއިރު ތިމާއަކީ ފިސާރި ކެރޭ މީހަކަށް ވާންޖެހޭނެއެވެ. އެކަމަކު އެކަމާއިމެދު އެހެން މީހުން ވިސްނަފާނެ ގޮތަކާއި މެދު ކަންކަން ކުރަން ވެއްޖެނަމަ އެކަމެއް ރަނގަޅަށް ނުވެދާނެއެވެ.
މާޒީގައި ކަންހިގައިފައިވާ ގޮތަށް ވިސްނައިގެން ކަންކަން ނިންމުން:
މިސާލަކަށް މާޒީގައި ކަމެއް ދިމާވެފައިވަނީ ވަރަށް ދެރަގޮތަކަށް ކަމަށް ވާނަމަ އެކަމެއް ތަކުރާރު ކުރުމުގައި ޖެހިލުންވާ ބަޔަކުވެސް މިމުޖުތަމައުގައި އުޅެއެވެ. އެއީ މުޅިން ގޯސް ވިސްނުމެކެވެ. ދުނިޔެ ހިގަނީ ތޮށަލި ދުޅައަށޭ ބުނާ އުސޫލުން އަބަދު އެއްގޮތަކަށް ކަންކަން ނުވެ ހިގައިދާނެ ކަމަށް ވިސްނާލަން ޖެހެއެވެ.
އެހެންވިނަމައޭ ނުވަތަ އެހެން ކަންތައް ކުރެވުނު ނަމައޭ ހިތަށް އެރުމުގެ ޚިޔާލު ދޫކޮށްލުން:
ކަމެއްވެ ނިމުމުން އެކަމެއް ވީގޮތާއި މެދު ދެރަނުވާށެވެ. ކޮންމެ ކަމަކުންވެސް އިބްރަތް ހާސިލުކުރާ ބަޔަކަށް އަޅުގަނޑުމެން ވާންޖެހޭނެއެވެ. އެކަމެއް ހިގައިފައިވާނީ އެންމެ ރަނގަޅަށް ކަމުގައި ވިސްނާ އެއީ މިންވަރު ކުރެއްވި ގޮތް ކަމަށް ޤަބޫލުކޮށް ކުރިއަށް އޮތްތަނުގައި ރަނގަޅުވާނެ ކަމަށް ވިސްނާ ހިޔާލު ކުރުމަކީ އެންމެ ރަނގަޅު ގޮތްކަމަށް ގަބޫލުކުރާށެވެ.
ތިމާގެ އިހްސާސްތަކާއި މެދު ވިސްނައިގެން ކަންކަން ކުރަން ޖެހިލުންވުން:
ކަމަކާ ކުރިމަތިލާނަމަ ބައެއް މީހުން ވަރަށް ބޮޑަށް ބަލިކަށިވެ އެކަމުގައި ފިކުރު ބޮޑުވެއެވެ. މިކަމުގެ ސަބަބުން ނަފްސާނީ ބަލިމަޑުކަމެއްގެ ތެރެއަށް ގެބިގެން ދެއެވެ. މިއީ ކަންކުރުމުގެ ކުރިން ވަރަށް ބޮޑަށް ވިސްނާ ގޮތެއް ނިންމަންޖެހޭ ކަމެކެވެ.
އަމިއްލަ ނަފްސު ކުށްވެރި ނުކުރުން:
ކަމެއް ގޯސްކޮށް ހިގައިފިނަމަ އެކަމެއް ދިމާވީ ތިމާގެ އިހްމާލުން ކަމަށް ބުނެ އަމިއްލަ ނަފްސު ކުށްވެރި ކުރުމަކީ ގިނައިން ފެންނަ މަންޒަރެކެވެ. އެކަމުގެ ސަބަބުން ތިމާގެ ކުރިއެރުމަށް އެތައް ހުރަސް ތަކެއް ކުރިމަތިވެދާނެއެވެ. ކޮންމެ ކަމެއްގައިވެސް ވިސްނަން ވާނީ އެކަމެއްގެ އެންމެ ރަނގަޅު ގޮތަށެވެ.
މައުލޫމާތު: ޑރ. ހަންސާޖީ ޔޮގެންޑްރާ އަދި ވެރީވެލް މައިންޑް ޑޮޓްކޮމް
