އަހަރެމެންނަކީ ހަށިގަނޑުގެ ހުރިހާ ގުނަވަނެއްވެސް ސާފުތާހިރުކަމާއި ރީތިކޮށް ބަހައްޓަން ބޭނުންވާ ބައެކެވެ. މޫނުގެ ހަންގަނޑަށް ސަމާލުކަންދޭ މިންވަރަށް އަތްތިލައާއި ފައިތިލައަށްވެސް ހަމަ އެހާމެ ބޮޑު ސަމާލުކަމެއް ދެއެވެ. މަހަކު އެއްފަހަރު ފައިތިލަ ސާފުކޮށް ނިޔަފަތިތައް ރީތިކުރުމަށް ގަވާއިދުން ސެލޫންތަކަށް ދިއުމަކީ ބައެއް މީހުންގެ މެދުގައި އާދަވެފައިވާ ކަމެކެވެ. ނަމަވެސް ފައިތިލަ ފަޅައިގެން ދިއުމަކީ ގިނަބަޔަކު ކަންބޮޑުވާކަމެކެވެ. ފައިތިލަ ފަޅައިގެން ދިއުމުގެ ސަބަބުން ފައިތިލައިން ލޭއައިސް ހިނގާއިރު ފައިގައި ރިއްސާގޮތްވެސް މެދުވެރިވެއެވެ.
ފައިތިލަ ފަޅައިގެން ދިއުމަށް ދިމާވާ ސަބަބު
މާބޮޑަށް ބަރުދަން އިތުރުވެ ފަޔަށް ހުރިހާ ބާރެއް ކުރެއެވެ. މިކަމުގެ ސަބަބުން ފައިތިލައިގެ ހަންގަނޑު ހިކިގެންގޮސް ކުރަކިވާން މެދުވެރިވެއެވެ. ފައިތިލައިގެ ހަންގަނޑު ހިކުމުގެ ސަބަބުން ހަންގަނޑު ދޫވެ ފައިތިލަ ފެޅޭގޮތްވެއެވެ. ހުރިހާ ކަމެއްވެސް ގުޅިފައި އޮންނަނީ ސިއްހަތާއެވެ. ސިއްހަތަށް ބަލައިގެން ނުއުޅޭނަމަ ބަލިތައް ޖެހުމުގެ ފުރުސަތު ބޮޑުވެއެވެ.
ހަކުރުބަލި ހުންނަ މީހުންނާއި "އެކްޒިމާ" ހުންނަ މީހުންނަށްވެސް މިމައްސަލަ ދިމާވެއެވެ. ހުސްފައިގައި ހިނގާފައި އުޅޭނަމަވެސް މިކަން ދިމާވެއެވެ. ހަރުތަންތާގައި ހިނގާފައި އުޅޭނަމަ އަދި ގިނައިރު ކޮޅަށް ހުންނަ ނަމަވެސް ފައިތިލައިގެ ހަންގަނޑު ހިކި ފަޅައިގެންދެއެވެ. އަދި ހަމަ މިއާއެކު ފަޔަށް ހެޔޮވަރުނޫން ބޫޓަށް އަރައިގެން އުޅޭނަމަވެސް ފައިތިލަ ހަލާކުވެ ފަޅައިގެންދެއެވެ.
ގޭގައި ދެވިދާނެ ފަރުވާ:
ފައިތިލަ ފަޅައިގެންދާނަމަ މިކަމާ ކަންބޮޑުނުވެ މިފަރުވާ ގޭގައި ދޭން ފެށުމުން ވަރަށް އަވަހަށް ނަތީޖާ ފެނިގެންދެއެވެ.
ބޭނުންވާތަކެތި:
2 ސައިސަމުސާ އެލޯވެރާ ޖެލް ނުވަތަ 4 ސައިސަމުސާ ގްލޫސެރިން
2 ސައިސަމުސާ ރޯސް ވޯޓަރ
2 ސައިސަމުސާ ލުނބޯ ޖޫސް
ތައްޔާރުކުރާނެ ގޮތް
މިތިންބާވަތް ރަނގަޅަށް އެއްކޮށްލުމަށްފަހު ފައިތިލައިގައި ރަނގަޅަށް މަސާޖްކޮށްލާށެވެ. އެއަށްފަހު އިސްޓާކީނެއް ލައްވައިގެން ނިދާލާށެވެ. މިގޮތަށް ކޮންމެ ރެއަކު ތަކުރާރު ކުރުމުން 4 ދުވަސް ތެރޭގައި ތަފާތު ފެނިގެންދާނެއެވެ.
