އިސްތަށިގަނޑު ހަލާކުވެ އަދި ހިކޭތީ ކަންބޮޑުވާ މީހުން ވަރަށް ގިނައެވެ. އިސްތަށިގަނޑު ހިކެނީ ބޮލުގެ ހަންގަނޑުގައި ތެޔޮ އުފައްދައިދޭ މިންވަރު މަދުވުމުންނެވެ. ބައެއްފަހަރު އަވީގައި މާގިނައިން އުޅޭނަމަވެސް އިސްތަށިގަނޑު ހިކި އަދި ހަލާކުވާގޮތް ދިމާވެއެވެ.
މާއަވަސް އަވަހަށް ބޯދޮންނަ ނަމަވެސް އިސްތަށިގަނޑު ހަލާކުވެއެވެ. އަދި އެއާއިއެކު އެކި ބާވަތުގެ ކެމިކަލްސް ބޭނުންކޮށްގެން ބޮލުގައި ކުލަ ޖައްސައި 'ޑައިކޮށް' ހަދާނަމަވެސް މިމައްސަލަ ދިމާވެއެވެ.
ބޯދޮންނައިރު ބާރުގަދަ ޝޭމްޕޫ ބޭނުންކުރުންވެސް އެހާ ބުއްދިވެރިއެއް ނޫނެވެ. މިމައްސަލައަށް ހައްލު ހޯދުމަށް ގޭގައި ދެވިދާނެ ފަރުވާއެއްގެ އަޖުމަ ބަލާލުން ކިހިނެއް ވާނެތޯއެވެ.
ބޭނުންވާ ތަކެތި:
4 މޭޒުމަތީ ސަމުސާ ކަރޑް ނުވަތަ ޔޯގަޓް
1 ބިސް
1 މޭޒުމަތީ ސަމުސާ އޮލިވް އޮއިލް
މިތިން ބާވަތް ރަނގަޅަށް އެއްކުރުމަށްފަހު ޕޭސްޓެއް ހަދާލާށެވެ. އެއަށްފަހު ބޮލުގެ އެތެރޭގައާއި އިސްތަށިގަނޑުގައި އެއްކޮށް ހާކާލާށެވެ. އަދި 5 ވަރަކަށް މިނިޓް މަސާޖު ކުރުމަށްފަހު ބޮލުގައި ޝަވަރ ކެޕެއް ނުވަތަ ޕްލާސްޓިކް ކޮތަޅެއް އެޅުމަށްފަހު އިސްތަށިގަނޑު ބަންދުކޮށްލާށެވެ. ގަޑިއެއްހާއިރު ބެހެއްޓުމަށްފަހު ޝޭމްޕޫ ލައިގެން ދޮވެލާށެވެ. މި 'ހެއާ މާސްކު' އެޅުމުން ވަރަށްބޮޑަށް ތަފާތު ފެނިގެންދާނެއެވެ. މި މާސްކަކީ ބޮލުން ހަންފޮޅުމަށްވެސް އެހީތެރިވެދީ އިސްތަށިގަނޑު މަޑުކޮށް ބެހެއްޓުމަށް ފަރުވާއެކެވެ.
