މާތްﷲގެ ރުހިވޮޑިގަތުން ލިބުންވަނީ މައިންބަފައިންނަށް ހެޔޮކޮށް ހިތުމުގައެވެ. އެހެނީ މައިންބަފައިނަށް ހެޔޮކޮށް ހިތުމަކީ ދީނީ ވާޖިބެކެވެ. ރަނގަޅަށް ޢަމަލުނުކޮށްފިނަމަ އެކަމަށް ޖަޒާ ކަނޑައެޅިފައިވާކުށެވެ. އަދި މައިންބަފައިންނަށް ދެރަގޮތް ހެދުމަކީ ދުނިޔެމަތީގައިވެސް އެކަމުގެ ހިތިކަން އެދަރިއަކަށް ފެނިގެންދާނޭފަދަ ޢަމަލެއްކަމަށް ތާރީޚުގައި ހިނގާފައިވާ ޙާދިޘާތަކަށް ބަލާލުމުން ހާމަވެގެން ދެއެވެ. އެއްދުވަހަކު ޓީޗަރަކު ކިޔައިދިން ވާހަކައެކެވެ. އެވާހަކާގައި އުޅެނީ ދެމަފިރިއަކާއި އެދެމީހުންގެ ދަރިއަކާއި މުސްކުޅި ބައްޕައެކެވެ. އަނބިމީހާ މުސްކުޅި ބައްޕައާމެދު ހިތްހަމަނުޖެހޭތީ މުސްކުޅިބައްޕަ އެމީހުންގެ ޢާއިލާއާ ވަކިކުރަން ފިރިމީހާ ނިންމިއެވެ. އަދި ގޯންޏެއް ހޯދާ މުސްކުޅި ބައްޕަ ގޯންޏަކަށްލައި ދުރުހިސާބަކަށް ގެންގޮސް ދޫކޮށްލުމަށް ނިންމިއެވެ. އަދި އޭނާގެ ބައްޕަ އެގޯންޏަށްލައިގެން ގެއިން ނުކުންނަން ހިނގައިގަތް ވަގުތު އޭނާގެ ދަރިފުޅު އެތަނަށް އައިސް ބުންޏެވެ. ތިގޯނި އަނބުރާ ގެނެސްދެއްޗެވެ. އެވަގުތު ބައްޕަ ސުވާލުކުރިއެވެ. އެއީ ކީއްކުރަންހެއްޔެވެ. ކުއްޖާ ބުންޏެވެ. ބައްޕަ މުސްކުޅިވާ ދުވަހު ތިޔަ ގޯންޏަށްލައި އެއްލާލުމަށެވެ. އެވަގުތު ތަފާތު އިޙުސާސެއް ކުރެވި، އެ ބައްޕައަށް ރޮވުނެވެ. ދަރިފުޅު އޭނާގެ މެރިފައިވާ ލޯ ހުޅުވާލަދިނީތީ ދަރިފުޅު ގަޔާލާ ބޮނޑިކޮށްލެވުނެވެ. އަދި އޭނާގެ ބައްޕައަށް އެގޮތަށް އިހާނެތިގޮތްގޮތް ނުހަދާ ހެޔޮކޮށް ހިތުމަށް ނިންމިއެވެ. މައިންބަފައިން ކަންކުރާގޮތަށް ދަރީންވެސް ކަންކުރުން ކައިރިކަން މިޙާދިޘާއިން އެނގިގެންދެއެވެ. ކަންމިހެން އޮތްއިރު މައިންބަފައިންނަށް ހެޔޮކޮން ހިތުމަށް ޚާއްޞަ ސަމާލުކަމެއް ދޭންޖެހޭނެއެވެ.
މާތް ﷲ ވަޙީ ކުރައްވާފައިވެއެވެ. " وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلَاهُمَا فَلَا تَقُلْ لَهُمَا أُفٍّ وَلَا تَنْهَرْهُمَا وَقُلْ لَهُمَا قَوْلًا كَرِيمًا (*) وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيرًا (24 سورة الاسراء: 23-24) މާނައީ: އެކަލާނގެއަށް މެނުވީ، ތިޔަބައިމީހުން އަޅުކަން ނުކުޅައުމަށާއި، މައިންބަފައިންނަށް ހެޔޮކޮށް ހިތުމަށް، ކަލޭގެފާނުގެ ވެރިރަސްކަލާނގެ ކަނޑައަޅުއްވައި އެންގެވިއެވެ. އެ ދެމީހުންކުރެ އެކަކު، ނުވަތަ އެ ދެމީހުން ތިބާގެގާތުގައި ތިބެ، މުސްކުޅިކަމާ ހަމަޔަށް ފޯރައްޖެނަމަ، އެދެމީހުންނަށް أف ވެސް ނުބުނާށެވެ. (އެބަހީ ނުރުހުމުގެ ކިތަންމެ ކުޑަ ބަހެއްވިޔަސް ނުބުނާށެވެ!) އަދި އެ ދެމީހުންނަށް، އަޑުލައި ނުހަދާށެވެ! އަދި މާތްބަހަކުން އެ ދެމީހުންނަށް ބަސްބުނާށެވެ!
މައިންބަފައިންނަށް ހެޔޮކޮށްހިތުމުގެގޮތުން މައިންބަފައިންނަށްޓަކައި އެބައިމީހުން ދުނިޔޭގައި ތިބޭއިރާއި އަދި މަރުވުމަށްފަހު ސަމާލުކަން ދެވިދާނެ މުހިންމު ބައެއް ކަންކަން ވެއެވެ.
އެންމެ ފުރަތަމަވެސް، މައިންބަފައިންނަށް ހެޔޮކޮށް ހިތުމުގެ ނިޔަތް ދަރީންގެ އޮންނަންޖެހެއެވެ. އަދި ކޮންމެ ދުވަހަކުވެސް މައިންބަފައިންނާއެކު ވަގުތު ހޭދަކުރުމާއި، މައިންބަފައިންނާ އެއް ފަސްގަނޑެއްގައި ނޫޅޭނަމަ ފޯނުންގުޅާލާ މައިންބަފައިން ބޭނުންވާކަންކަން އޮޅުން ފިލުވުން މުހިންމެވެ. އަދި ބޭނުންވާކަންކަން ކޮށްދެވެންއޮތް މިންވަރަކުން ކޮށްދިނުމަށް ޚާއްޞަ އިސްކަމެއްދިނުން މުހިންމެވެ.
މައިންބަފައިންގެ ހެޔޮދުޢާއަކީ ކިޔަމަންތެރި ދަރީންނަށް ދުނިޔެމަތީގައި ލިބިގެންދާނެ އެންމެ އަގުބޮޑު ހަދިޔާއެވެ. މައިންބަފައިން ދުނިޔޭގައި ތިބޭއިރު އެ މައިންބަފައިންނަށް ހެޔޮކޮށް ހިތުމުގެ ގޮތުން ދަރީންގެ ފަރާތުންވެސް ކަންތައްތަކެއް ކުރުން މުހިންމެވެ. އެގޮތުން ކުރެވިދާނެ ކަންކަމުގެ ތެރޭގައި އަންނަނިވި ކަންކަން ފާހަގަ ކުރެވެއެވެ.
- މައިންބަފައިންނާ ވާހަކަ ދައްކާއިރު ކަނުލާ އަޑުއެހުން އަދި އަދަބު އިޙްތިރާމާއެކު ވާހަކަ ދެއްކުން
- އަދި މާތް ﷲ އަށް އުރެދުމެއްނުވާ ކޮންމެ ކަމެއްގައި މައިންބަފައިންނަށް ކިޔަމަންތެރިވެ، މަޝްވަރާހޯދުން.
- މަޑުމައިތިރިކަމާއެކު މައިންބަފައިންނާ މުޢާމަލާތު ކުރުން، އަދި މައިންބަފައިންނަށް އަޑުލާ ނުހެދުން
- އެމީހުންނަށް އެހީތެރިކަން ފޯރުކޮށްދިނުން.
- ވާހަކަ ދައްކާއިރު މައިންބަފައިންނަށް ޝުކުރުވެރިވުން ހިމެނެއެވެ.
މީގެ އިތުރުން؛ މައިންބަފައިން ދުނިޔެދޫކުރުމަށްފަހުވެސް ދަރީންގެފަރާތުން އެމައިންބަފައިންނަށް ކޮށްދިނުން މުހިންމު ކަންކަންވެއެވެ. އެގޮތުން މަރުވެފައިވާ މައިންބަފައިނަށްޓަކައި ކުރެވިދާނެކަންކަމުގެ ތެރޭގައި
- މައިންބަފައިންގެ ފާފަތައް ފުއްސަވައި ރަޙުމަތްލައްވާތޯ ދުޢާކުރުން
- ވަގުތުވީ މިންވަރަކުން އެމީހުންގެ މަހާނައަށް ޒިޔާރަތްކުރުން
- މައިންބަފައިންނަށްޓަކައި ޞަދަޤާތްކުރުން، އެހެނީ ޞަދަޤާތަކީ މައިންބަފައިންނަށް ވާޞިލުވާނޭ ހެޔޮ ޢަމަލެކެވެ.
- މައިންބަފައިން ދަސްކޮށްދީފައިވާ ރިވެތި އަޚްލާޤާއި ސުލޫކުގައި ހިފެހެއްޓުން
- މައިންބަފައިންގެ ގާތްމީހުންނަށް ހެޔޮކޮށްހިތައި އެމީހުންނާ އޮންނަގުޅުން ދެމެހެއްޓުން ހިމެނެއެވެ.
މައިންބަފައިނަށް ހެޔޮކޮށްހިތުމުން ލިބޭފައިދާތައް ގިނަގުނައެވެ. އެގޮތުން ރިޒްޤުގެ ތަނަވަސް ދޮރުތައް ހުޅުވިގެން ދިއުމާއި، ހިތްހަމަޖެހުމާއި އުފާވެރިކަން އިޙުސާސްކުރެވުން ހިމެނެއެވެ. ވީމާ އަބަދުވެސް މައިންބަފައިންނަށް ހެޔޮދުޢާކުރާ ދަރިއެއްކަމުގައިވޭތޯ ގަދައަޅާ މަސައްކަތްކުރާށެވެ.
