އަންނާރަކީ ފޮނި އަދި ވަރަށް މީރު މޭވާއެކެވެ. ރާއްޖޭގައިވެސް ވަރަށް ގިނައިން ހެދޭ ވަރަށް ފަސޭހައިން ލިބެންހުންނަ މޭވާއެކެވެ. އެހެންނަމަވެސް އެންމެބޮޑަށް އަންނާރު ގަސް ހެދެނީ އެމެރިކާގެ ކެލިފޯނިއާގައެވެ. ރާއްޖޭގައި ހައްދާ އަންނާރު ގަހާއި ބޭރު ގައުމުތަކުގައި ހައްދާ އަންނާރުގައި ތަފާތުތަކެއް ހުރެއެވެ. ރާއްޖެއިން ބޭރުގައި ހައްދާ އަންނާރުގައި ރަތްކުލަ ގަދަކަން ފާހަގަވެފައި ފޮނިރަހަ ވަރަށް ގަދަކަންވެސް ފާހަގަކުރެވެއެވެ.
މިމޭވާއަކީ ކެއުމުގައި ވަރަށްގިނަ ގޮތްގޮތަށް ބޭނުންކުރާ މޭވާއެކެވެ. ޖޫސް ހެދުމާއި، ސެލެޑު ހެދުމަށާއި، ހުމުސް ހެދުމަށާއި އަދި ޔޯގަޓް ފަދަ އެއްޗެހި ކާއިރުވެސް އަންނާރުގެ އޮށް އަޅައިގެން ބޭނުންކުރެއެވެ. މިމޭވާއަކީ ސިއްހަތަށް ފައިދާހުރި ކެއުންތަކުގައި ވަރަށްގިނައިން ބޭނުންކުރާ މޭވާއެއްވެސް މެއެވެ.
ސައިންސުގެ އަލީގައި ހޯދިފައިވާ ހޯދުންތަކުން އެނގޭގޮތުގައި މިމޭވާއަކީ ހިތުގެ ގިނަ މައްސަލަތަކަށް ހައްލު ހޯދައިދީ ސިކުނޑީގެ ބަލިތަކާއި ކެންސަރުގެ ތަފާތު ބަލިތަކަށްވެސް ހައްލު ލިބިގެންދާ މޭވާއެކެވެ. އަދި ކުޑަކުދިންގެ ސިކުނޑި ހެދިބޮޑުވުމަށް އެހީވެދޭ މިމޭވާއިން ލިބޭ ފައިދާތައް ގުނާ އަދަދު ނުކުރެވޭހާ ގިނައެވެ.
މާބަނޑު މީހުންނަށާއި ކުދިންގެ ހެދިބޮޑުވުމަށް
އަންނާރު ޖޫހަކީ މާބަނޑު ދުވަސްވަރު މައިމީހާ ބުއިމަށް ވަރަށް ރަނގަޅު ޖޫހެއް ކަމަށް ސިއްހީ މާހިރުން ލަފާދެއްވައެވެ. ސިކުނޑިއަށް ލޭ ފޮނުވައިދިނުމަށް "އެންޓިއޮކްސިޑެންޓް" ގެ މާއްދާ ގިނަ މިމޭވާއިން އެހީވެދެއެވެ. ހޯދުންތަކުން ދައްކާގޮތުގައި ރަހިމުގައި ކުއްޖާ އަށަގަންނައިރު ފޫޅު ދަނޑިއޮޅިގެން ނުވަތަ އެހެން ކޮންމެވެސް މައްސަލައެއް ދިމާވެގެން ހެދިބޮޑުވުމުގެ މައްސަލަ ކުރިމަތިވެއެވެ. މިގޮތަށް ދިމާވެގެން، ކޮންމެ ދިހައަކުން އެއް ކުއްޖަކީ ހެދި ބޮޑުވުމުގެ މައްސަލަ ކުރިމަތިވާ ކުދިންނެވެ. އޮކްސިޖަން ފޯރުކޮށްދީ ނިއުޓްރިޝަން ލިބިދިނުމަށް އެހީވެދޭ މިމޭވާއަކީ މިކަމުން ރައްކާތެރިވުމަށް އެހީވެދޭ މޭވާއެކެވެ.
ހަށިގަނޑުގެ ބަރުދަން ލުއިކުރުމަށް އެހީތެރިވެދޭ
އަންނާރު ޖޫހަކީ ހަށިގަނޑުގައި ވަރުޖައްސަދީ މީހާ ތާޒާކަންމަތީ ބެހެއްޓުމަށް އެހީތެރިވެދޭ ޖޫހެކެވެ. ހަށިގަނޑުން ހަކަތަ އަންދައިދިނުމާއި ގިނައިރު ބަނޑުހައި ނުވެ ހުރުމަށްވެސް އެހީތެރިވެދެއެވެ. މިމޭވާއިން ހަކުރުގެ މިންވަރު އެއްވަރެއްގައި ހިފަހައްޓަދީ ނިއުޓްރިޝަން ވެސް ލިބިދެއެވެ. ކެލޮރީސް އެހާމެމަދު މިޖޫހުން ހަށިގަނޑުގައި ހަކުރު އުފައްދައިދެއެވެ. އެކަމުގެ ސަބަބުން އާޓިފިޝަލް ހަކުރު ބޭނުންކުރަންޖެހޭ މިންވަރު މަދުވެ، ހަށިގަނޑުގެ ބަރުދަން ލުއިވުމަށް އެހީތެރިވެދެއެވެ.
އާތްރައިޓިސްގެ މައްސަލަތަކަށް ހައްލު
އާތްރައިޓިސް ނުވަތަ ރާއްޖެ ބައްޔަކީ ވަރަށް އާއްމު ބައްޔެކެވެ. މިބަލީގެ ވޭނުގައި އުޅެންޖެހޭ ފަހަރުތަކުގައި އަންނާރުގެ ޖޫހުން ލުއި ލިބިގެންދެއެވެ. ތަދުވާ ތަދުވުން ކުޑަކޮށްދީ ބަލި ބޮޑުވިޔަނުދީ އެއްވަރެއްގައި ހިފެހެއްޓުމަށްވެސް އެހީތެރިވެދެއެވެ. އަންނާރަކީ ނިއުޓްރިޝަން އާއި މިނަރަލްސްގެ މާއްދާ ގިނަ މޭވާއަކަށްވެފައި މިމޭވާއިން އެބައިތައް ލިބިދެއެވެ. މިމޭވާއަކީ ފެޓުގެބައި މަދު އަދި ކޮލަސްޓްރޯލްގެ ބައިވެސް މަދު މޭވާއެކެވެ. އަންނާރު ޖޫސް ބޭނުންކުރުމުން ދުޅަތިރިކޮށްދީ ހުޅުހުޅުގައި ހުންނަ ރިހުން ކުޑަކޮށްދެއެވެ. މިމޭވާއަކީ މިކަމުގައި ލުއި ހޯދުމަށް ބޭނުންކުރަން ވަރަށް ރަނގަޅު މޭވާއެކެވެ. އަދި ހަމަ މިއާއެކު ކަށިތަކުގައި ބާރު ޖައްސައިދިނުމަށްވެސް އެހީތެރިވެދެއެވެ.
ހަނދާނުގެ މައްސަލަތައް ހުންނަ މީހުންނަށް އެހީތެރިވެދޭ
ދިރާސާތަކުން ދައްކާގޮތުގައި އަންނާރު ޖޫސް ބުއިމުން ލޮލަށް ފެންނަ އެއްޗެހި ހަނދާނުގައި ހުންނަ މިންވަރު އިތުރުކޮށްދީ، ދައްކާވާހަކަ އިތުރަށް ހަނދާނުގައި ހަރުލާގޮތްވެއެވެ. ސިނކުޑީގެ އެކި ބަލިތަކަށް ހައްލު ހޯދައިދިނުމަށް މިފައިދާހުރި މޭވާ އެހީތެރިވެދެއެވެ. އެކިކަހަލަ ސިއްޙީ މައްސަލަތަކުގެ ސަބަބުން ހަނދާނުގެ ބައި ދަށްވެފައިވާ މީހުންނަށް މިޖޫހުން ފަރުވާ ލިބިގެންދެއެވެ.
ހަމުގެ މައްސަލަތަކަށް އެހީތެރިވެދޭ
އިރުގެ ނުރައްކާތެރި ދޯދިތަކުން ހަންގަނޑު ހަލާކުވިޔަނުދީ ހިފެހެއްޓުމަށް އަންނާރުގެ ތޮށި ބޭނުންކޮށްގެން މާސްކު ތައްޔާރުކުރުމުން އެކަމަށް ހައްލު ލިބިގެންދެއެވެ. ހަންގަނޑުގައި ހުންނަ ބޮޑެތިލައްތައް ފިލައި ހަންގަނޑު އިތުރަށް ރީތިކޮށްދިނުމަށް އެހީތެރިވެދެއެވެ. ހަންގަނޑު ހިކުނަނުދީ ހިފެހެއްޓުމަށް އަންނާރު ބޭނުންކޮށްގެން ތެޔޮ ތައްޔާރުކުރުމާއި، ޓޯނާ އެއްގެ ގޮތުގައިވެސް ބޭނުންކުރެވިދާނެއެވެ. މޫނުގައި އޮށާޅަ ނެގުން ހުއްޓި ހަންގަނޑު އޮމާންކޮށް ބެހެއްޓުމަށްވެސް އެހީތެރިވެދޭ މީގެ ތޮށްޓަކީވެސް ވަރަށްގިނަ ކަންކަމުގެ ފަރުވާއެކެވެ. އޭގެ ސަބަބުން ޒުވާކަން އިތުރުކޮށްދީ ހަންގަނޑަށް އުޖާލާކަންގެނެސްދެއެވެ.
މައުލޫމާތު ނަގާފައިވަނީ: ވެލް އެންޑް ގުޑް، ހިންދުސްތާން ޓައިމްސް
