އަހަރެމެންގެ ތެރެއިން ބައެއް މީހުންނަކީ މައިންބަފައިންގެ ލޯބިން މަޙްރޫމުވާންޖެހުނު ކަމުގައިވިޔަސް ހިތްވަރާއެކު ދިރިއުޅުން ކުރިއަށް ގެންދަން ދަސްވެފައިވާ ބައެކެވެ. ވަރަށް ކުޑައިރުއްސުރެ އެލޯބިން މަހްރޫމުވެ އަޅާލާނެ މީހެއް ނެތިފައި ތިބި އެތައް ކުދިންނެއް ކުޑަކުދިންގެ ހިޔާގައިވެސް ދިރިއުޅެމުންދެއެވެ. މިގޮތުން ތައިލެންޑުގެ "ޕަކްޗޯ" ޕްރޮވިންސަށް އުފަން އުމުރުން 28 އަހަރުގެ ކަންޔާ ސެސާ އަކީ މައިންބަފައިންގެ ލޯބިން މަޙްރޫމުވެފައިވާ މީހެކެވެ. އުފެދުމުގައި ނުކުޅެދުންތެރިކަން ހުރި ކަންޔާއަކީ އުފަންވިއިރުވެސް ދެފައިނެތް މީހެކެވެ. އެހެންނަމަވެސް އޭނާއަކީ ދިރިއުޅުމުގައި ކަންކަން ކުރަން މީހެއްގެ އެހީއާއި ނުލައި ދަސްވެފައިވާމީހެކެވެ.
ކަންޔާއަކީ ތައިލެންޑުގެ ބުޑިސްޓް ޓެމްޕަލްއެއް ކައިރިއަށް އެއްލާލާފައި އޮއްވާ ހޮވައިގެން ގެނެސްފައިވާ ކުއްޖެކެވެ. އޭރު އޭނާގެ އުމުރަކީ އެންމެ 3 މަހެވެ. "މަގުމަތިން ހިނގާފައިދަނިކޮށް ކުއްޖެއްގެ ރުއިމުގެއަޑު އިވިގެން ކައިރިއަށް ޖެހިލުމަށްފަހު ޔަގީންކޮށްލީމެވެ. އަނެއްކާވެސް އަޑުއަންނަ ދިމާލަށް ހިނގައިގަތީމެވެ. ޓޯޗް ބައްތިއަކުން އަލިކޮށްލުމަށްފަހު ބަލާލިއިރު އެއީ ތުއްތު ކުއްޖެކެވެ. އަވަސް އަވަހަށް ނެގުމަށްފަހު ފޮތިކޮޅަކުން އޮޅާލީމެވެ. އެވަގުތު ހިތަށް ކުރިއަސަރު ބުނެދެންވެސް ނޭނގުނެވެ." މިއީ މަގުމަތީގައި އެއްލާލާފައި އޮއްވާ ނެގި މީހާ ކިޔާދިން ވާހަކައެވެ. ދެން އެމީހުން ޕޮލިހަށް ގުޅައިގެން އެތަނުގެ އެންމެ ކައިރި ހޮސްޕިޓަލަކަށް އެކުއްޖާ ގެންދެވުނެވެ. ގެންދިޔައިރު އޮތީ ވަރަށްބޮޑަށް މަދިރި ހަފައިފައެވެ. ހޮސްޕިޓަލުގެ ނަރުހުން ކަންޔާ ބެލެހެއްޓީ ވަރަށް ލޯބިންނެވެ. ކަންޔާ ކިޔައިދިން ގޮތުގައި އެމީހުން އެންމެންވެސް ކަންޔާއަށް ބެހެއްޓި އޯގާތެރިކަމާއި އަޅާލުން ހަނދާން ހުންނާނެއެވެ. އޭރުގެ ފޮޓޯތައް ބަލަމުން އެހަނދާންތައް އާކުރަމުން ކަންޔާ ކިޔައިދިނެވެ.
ހޮސްޕިޓަލުން ބޭނުންވީ ކަންޔާއަށް މަންމައަކާއި ބައްޕައެއް ހޯދަދޭށެވެ. "އެޑޮޕްޓް" ކޮށްގެން ގެންގުޅޭނެ ރަނގަޅު ބަޔަކާއި ހަވާލުކުރާށެވެ. ދަރިންނަކީ މާތްﷲ ދެއްވާ އަމާނާތެކެވެ. ދަރިންނަށް ލޯތްބާއި އަޅާލުން ދީގެން ބޮޑުކުރާނެ ބަޔަކު ހޯދުންވީ ވަރަށްބޮޑު ގޮންޖެހުމަކަށެވެ. ކަންޔާގެ ނަސީބު އަތުގައި ހިފީ އެމެރިކާގެ ދެމަފިރިއަކު ކަންޔާއަކީ ދަރިއެއްގެގޮތުގައި ބަލައިގެން އުމުރަށް ގެންގުޅެން ބޭނުންވެގެން އެމީހުން ހަވާލުވި ހިސާބުންނެވެ. ކަންޔާ ބުނާގޮތުގައި ނުކުޅެދުންތެރިކަން ހުންނަ ކުއްޖަކު ބޮޑުކުރުމަށްފަހު މުޖުތަމަޢަށް ނެރުމަކީ ފަސޭހަ ކަމަކަށް ނުވާއިރު، އެޑޮޕްޓްކޮށްގެން ކަންޔާ ބެލެހެއްޓި އޭނާގެ މިހާރުގެ މަންމައާއި ބައްޕަ އެކަން ކުރީ އެމީހުންނަށް މާބޮޑު ބުރައެއް ކަމުގައި ނުދެކިއެވެ.
އުމުރުން އެންމެ 9 އަހަރުގައި އެމެރިކާގެ ދެމަފިރިން ކަންޔާ ގޮވައިގެން އެމެރިކާއަށް ދިއުމަށްފަހު ހުރިހާ ކަމެއްގައި ހިތްވަރުދީ ކިޔަވައިދީ ލޯބިދީގެން ގެންގުޅުނެވެ. ކަންކަމުގައި ފަސްނުޖެހި ކުރިއަށް ދިއުމަށް ހިތްވަރުދިނެވެ. އަމިއްލައަށް ކަންކަން ކުރަން ދަސްކޮށްދީ މަގު ދައްކައިދީ ހެދިއެވެ. ދުވަސްކޮޅަކުން އިގިރޭސިބަހަށް ވަރަށް ފަރިތަވުމުން ރައްޓެހިން ލިބެން ފެށިއެވެ.
އުމުރުން 9 އަހަރުގައި އަމިއްލައަށް ސްކޭޓްކުރަން ދަސްކޮށް ފުރޮޅުލީގޮނޑީގެ ބޭނުންކުރަން ނުޖެހޭވަރަށް ސްކޭޓް ބޯޑުގެ އެހީގައި ތަންތަނަށް ގޮސް އުޅެންފެށިއެވެ. އުމުރުން އެހާ ކުޑައިރު ސަރފްކުރަން ދަސްކޮށް މޮނޮސްކީ ކުރަން ދަސްކޮށް، ވީލް ޗެއަރ ބާސްކެޓް، ވީލްޗެއަރ ރޭސިން، ފެތުން، ބްރޭކް ޑާންސިން، ހައިކިން މިހެންގޮސް ވަރަށްގިނަ ކަންކަން ދަސްކޮށް އެކަމުގެ ތަޖުރިބާ ހޯދިއެވެ. 2018 ވަނަ އަހަރު އެމެރިކާގައި ބޭއްވި ޕެރެލިންޕިކް ގޭމުގައި މޮނޮސްކީކުރަން ކަންޔާ ކޮލިފައިވިއެވެ. އެއަށްފަހު އުމުރުން އެންމެ 15 އަހަރުގައި "ސްޕޯޓްސްވެއަރ"ގެ މޮޑެލްކަން ލިބުނެވެ. ދުނިޔޭގެ މަޝްހޫރު ބްރޭންޑްތައް ކަމަށްވާ ނައިކް، ބިލަބޮންގ ކަހަލަ ބްރޭޑްގެ މޮޑެލްކަން ކުރަންލިބި ދުނިޔޭގެ ސަމާލުކަމަށް ކަންޔާ ގެނައެވެ. މުޅި ދުނިޔޭގެ ބޮޑެތި މީޑިއާ ތަކެއްގައި ކަންޔާގެ ނަން ބޮޑުއަކުރުން ލިޔެވިގެންދިޔައެވެ. 2021 ވަނަ އަހަރު ނިއުޔޯކް ފެޝަން ރަންވޭގައި ބައިވެރިވުމުގެ ޝަރަފު ލިބި އެފަޚުރުވެސް ހޯދިއެވެ. މޮޑެލް ކުރުމުން ފެށިން އެކްޓިންގެ ދާއިރާއަށް ނުކުތުމަށް ޗާންސް ލިބުނެވެ. މިގޮތުން މަޝްހޫރު ފިލްމް "ވާކިން ޑެޑް"ގައި އެކްޓްކުރަން ލިބުނެވެ. މިގޮތަށްގޮސް ވަރަށްގިނަ ފުރުސަތުތައް ލިބެންފެށިއެވެ. މިގޮތުން މޮޑެލްކޮށްގެން ކަންޔާއަށް ދުވާލެއްގެ މައްޗަށް 1000 އެމެރިކާ ޑޮލަރު ލިބެއެވެ.
ކަންޔާ ދެކޭގޮތުގައި، އޭނާއަކީ ނުކުޅެދުންތެރިކަން ހުންނަ މީހެއްކަމުގައި ނުދެކި، ނުވަތަ އޭނާއަކީވެސް އެހެންމީހުންނާ އެއްފަދަ މީހެއްކަމުގައި ދެކިގެން އުޅެން ފަށައިފިނަމަ މީހުންގެ ވިސްނުމުގައި ހުންނަ ވަރަށްގިނަ ކަންކަން ރަނގަޅުވެގެންދާނެއެވެ. އޭނާއަކީ "މޯޓިވޭޝަނަލް ސްޕީކާ" އަކަށް ވެފައި މީހުން ހޭލުންތެރިކުރުވަން އެކި ވާހަކަތައް ކިޔާދީ އޭނާގެ ދިރިއުޅުމުގެ ވާހަކަތައް މީހުންނަށް ކިޔާދީހަދައެވެ. އެކި މީހުންގެ ނުކުޅެދުންތެރިކަން ހުންނާނީ އެކި ކަންކަމުގައެވެ. ހިތުގައި އުފެދޭ ސުވާލުތައް ހިތުތެރޭގައި ބެހެއްޓުމުގެ ބަދަލުގައި އެސުވާލުތައް އޭނާއާއި ކުރުން އެއީ އެންމެ ރަނގަޅުގޮތްކަމަށާއި، އޭރުން އަދި އެމީހުންގެ ހޭލުންތެރިކަންވެސް އިތުރުވެގެންދާނެއެވެ.
ކަންޔާ ބުނާގޮތުގައި، ކޮންމެ މީހަކީވެސް ކޮންމެވެސް މައްސަލައެއް ހުންނަ މީހެއް ކަމުގައި ފާހަގަކުރެވޭނެ މީހެކެވެ. އެއްވެސް އިންސާނަކީ ހުރިހާކަމެއް ފުރިހަމަވެފައިވާ އިންސާނެއް ނޫނެވެ. އެހެންނަމަވެސް އަހަރެމެން އެންމެންނަކީ އެއްބައެއްކަމާއި ކޮންމެ އިންސާނަކުވެސް ހައްދަވާފައިވަނީ އެންމެ ރީތި ސިފައިގައެވެ. ނުކުޅެދުންތެރިކަން ހުރި ކަމުގައިވިޔަސް އެމީހަކު ހާސިލުކުރަން ބޭނުންވާ ލަނޑުދަނޑި އާއި ހަމައަށް ދިއުމަށް މަސައްކަތް ކުރުމަކީ ހިތްވަރު ހުރިކަމުގެ މިސާލެކެވެ. ކާމިޔާބާއި ނާކާމިޔާބަކީވެސް އޮންނައެއްޗެއް ކަމާއި، ހިތްވަރާއެކު މަސައްކަތްކޮށްފިނަމަ ކާމިޔާބުވާނެކަން މިވަނީ ސާބިތުކޮށްދީފައެވެ.
ކަންޔާ ދެކޭގޮތުގައި އެމެރިކާގައި ދިރިއުޅެން ލިބުން އެއީ އޭނާއަށް ލެއްވި ނަސީބެކެވެ. ތަފާތު ކަންކަން ދަސްވެ ދުނިޔެއަށް ލޯހުޅުވި ކަންކަމުގައި ގިނަ ފުރުސަތުތަކެއް ލިބިގެންދިޔައެވެ. އޭނާ ބުނާގޮތުގައި އޭނާއަކީ "ހާފް ވުމަން" އެކެވެ. އޭނާއަކީ "ހާފް ވޮންޑަރ ވުމަން" އެކެވެ. އެއީ އޭނާ އަމިއްލައަށް އޭނާއާއި މެދު ދެކޭގޮތެވެ. ކަންޔާގެ ލޯބިވެރިޔާ ބުނާގޮތުގައި ކަންޔާއަކީ އެހެންމީހުންނާ ތަފާތު ވަރަށް ހިތްވަރުގަދަ ކެރޭ ކުޅަދާނަ އަންހެނެކެވެ. އޭނާގެ ލޯބިވެރިޔާ ކަންޔާ ދެކެނީ ހިތްވަރުގަދަ އަޒުމުވަރުގަދަ އަންހެނެއްގެ ގޮތުގައެވެ.
މައުލޫމާތު: ޔޫތް ޓު ދަ ޕީޕަލް
