އަހަރެމެންގެ ތެރެއިން ބައެއް އިންސާނުންނަކީ ނުކުޅެދުންތެރިކަން ހުރެ ބުރަ މަސައްކަތާއި ހިތްވަރުން ދިރިއުޅުން ކުރިއަށް ގެންދިއުމަށް މަސައްކަތްކުރާ މީހުންނެވެ. މީހުންގެ މަލާމާތާއި ފުރައްސާރަ އާއި ކުރިމަތިލާން ޖެހުނު ކަމުގައިވިޔަސް ހިތްވަރާއެކު މަސައްކަތްކޮށްގެން ދިރިއުޅުމުގަ އާމްދަނީ ހޯދައިގެން ކުރިއަށްދިއުމުގެ މަގު ފަހިވާނެ ކަމީ ޝައްކެތްއޮތް ކަމެއް ނޫނެވެ. މިގޮތުން އިންޑިއާގެ ހާކަންޑަށް އުފަން އުމުރުން 42 އަހަރުވެފައިވާ ކިރޯދަރު ނަމަކަށް ކިޔާ އިސްކޮޅުގައި އެންމެ 28 އިންޗި ހުރި މިމީހާއަކީ ނަމޫނާއެކެވެ.
އިސްކޮޅުން ކުރުވުމުގެ ސަބަބުން ހިނގާ އުޅެން އުދަގޫވި ކަމުގައިވިޔަސް މީނާގެ މިހިތްވަރަކީ ވަރަށް ތަފާތު ހިތްވަރެކެވެ. މީނާއަކީ ވިހޭއިރުވެސް އެތައް މައްސަލަތަކެއްހުރެ ޑޮކްޓަރުން އުންމީދު ކަނޑާލާފައިވާ މީހެކެވެ. މާގިނަ ދުވަހު ދުނިޔޭގައި ދިރިހުންނާނެ ކަމުގެ އުންމީދެއް ޑޮކްޓަރުން ނުދެއެވެ. އެހެންނަމަވެސް ﷲ ގެ ކުޅަދުންވަންތަކަމުން މިމީހާ މިވަނީ އެހެން މީހުންނަށް ނަމޫނާ މަސައްކަތްތެރިއަކަށް ވެފައެވެ.
ކިރޯދަރުގެ އުމުރުން 3 އަހަރުގައި އޭނާ ގޮވައިގެން ޑޮކްޓަރަށް ދިއުމުން ޑޮކްޓަރުގެ މޫނުމަތިން ފެނުނީ ހައިރާން ކަމެވެ. ނުކުޅެދުންތެރިކަމެއް ހުރިކަމުގައިވިޔަސް އެމީހަކަށް ހުރި ރިޒުގެއްވެސް ނޭނގެއެވެ. އޭނާއަކީ އުމުރުން ދޮށީ މީހެއްކަމުގައި ވީނަމަވެސް އޭނާގެ މަންމަ އޭނާ ގެންގުޅެނީ ކުޑަކުއްޖެއްހެންނެވެ. އުރައިގެން ނޫނީ އެއްވެސް ތަނަކަށް ނުދެވޭއިރު އޭނާގެ މަންމަ އަބަދުވެސް ހުންނަނީ އޭނާގެ ޚިދުމަތުގައެވެ. ފެންވަރުވާ ދަތްއުނގުޅަދެނީ އޭނާގެ މަންމައެވެ.
ކިރޯދަރު ކިޔާދިން ގޮތުގައި އޭނާ ކުޑައިރު ކިޔަވަނީ ގޭގައެވެ. ސްކޫލަށް ދިޔައީ ވަރަށް މަދު ދުވަސްކޮޅެއްގައެވެ. ހަމައެކަނި ޓެސްޓެއް ހަދާލާފައި ދެން ކިޔަވަންފެށީ ގޭގައެވެ. އެއަށްފަހު އޭނާގެ ބައްޕަ އޭނާއަށް ކިޔަވައިދިނުމުގައި ވަގުތު ހޭދަކުރެއެވެ. މައިންބަފައިންގެ ލޯތްބާއި އަޅާލުން ލިބެއެވެ. އެކަމުން އޭނާ މަހުރޫމެއް ނުވެއެވެ. އެއީވެސް އޭނާއަށް ލެއްވި ވަރަށްބޮޑު ނަސީބެއް ކަމުގައި އޭނާދެކެއެވެ. އޭނާގެ ބައްޕަ އޭނާއަށް ކިޔަވައިދެމުން ދިޔައިރު ކިޔެވުމަށް އުފެދުނު ޝައުގުވެރިކަން ބޮޑުވެގެންދިޔައެވެ. އަދި އޭނާގެ ހިތުގައި ޓީޗަރަކަށް ވުމުގެ ޚިޔާލު އުފެދިގެންދިޔައެވެ. މިގޮތުން ކިރޯދަރު ގޭގައި ކުދިން ގެނެސްގެން ކިޔަވައިދޭން ފެށީ ވަރަށް ހިތްހަމަޖެހިގެންނެވެ.
ކުދިންނަށް އުނގަންނައިދިނުމުގައި ގެންގުޅެންފެށި ލޯތްބާއި ޝައުގުގެ ސަބަބުން ކުދިންގެ ހިތުގައި އޭނާއަށް ވަރަށްބޮޑު ލޯތްބެއް ދެވުނެވެ. ދުވަސްކޮޅަކުން ވަރަށް ގިނަ ކުދިން އޭނާގެ ގާތަށް ކިޔަވަން އަންނަންފެށިއެވެ. އެހެންގޮސް ގޭގައި ކިޔަވައިދޭން ތަން ނެތުމުން ސްކޫލަކުން އޭނާއަށް ވަޒީފާ ލިބުނެވެ. 2006 ވަނަ އަހަރު ލޯކަލް ސްކޫލަކުން ކިޔަވައިދިނުމަށް ފުރުސަތު ލިބުމުން އެހާހިސާބުން ކިރޯދަރުގެ ޓީޗިން ފެށުނެވެ. އޭނާގެ ގާތަށް ކިޔަވަންދާ ކުދިން ބުނާގޮތުގައި އޭނާއަކީ އާދަޔާ ޚިލާފަށް މޮޅު ޓީޗަރެކެވެ. އަދި އޭނާ ކިޔަވައިދޭ ގޮތާއިމެދު ވަރަށް ބޮޑަށް ހިތްހަމަޖެހޭ ކަމަށްވެސް އެކުދިން ބުނެއެވެ. ކިރޯދަރު ބުނާގޮތުގައި ކުދިންނަށް ކިޔަވައިދިނުމުގައި ޕްރެޝަރުކޮށްގެން ކިޔަވައިދޭކަށް އެއްވެސް އިރެއްގައި ކިރޯދަރު ބޭނުމެއް ނުވެއެވެ.
ކިޔަވައިދިނުމުގައި 6 އަހަރު ހޭދަކުރުމަށްފަހު ކިރޯދަރު އެކްސިޑެންޓެއްގައި ފައި ހަލާކުވުމުން ކިޔަވައިދިނުމަށް ހުރަސްއެޅިގެން ދިޔައެވެ. ޑޮކްޓަރު ލަފާދިނީ ގޭގައި މަޑުކުރުމަށެވެ. ހަރަކާތް މަދުކުރުމާއި އެއްތަނެއްގައި އިނުމަށެވެ. 6 މަސްވަންދެން ގޭގައި މަޑުކުރުމަށް ޑޮކްޓަރު ލަފާދިނުމުން ކިރޯދަރަށް އާމްދަނީ ލިބޭނެ މަގު ބަންދުވެގެން ދިޔަ ކަމުގައިވިޔަސް އުއްމީދުގެއްލުވައި ނުލައި އާދައިގެ ފިހާރައެއް ގޭގައި ހުޅުވިއެވެ. ފިހާރަތެރޭގައި އިންނަ ކުޑަކުޑަ މޭޒެއް މަތީގައި އެއްޗެހި ވިއްކަން އޭނާ އިންނަނީއެވެ. މަންމަވެސް ބައެއްފަހަރު އޭނާއަށް އެހީވުމުގައި ފިހާރައިގައި ހުރެއެވެ.
ކިރޯދަރު ބައްޕަ ބުނާގޮތުގައި ކިރޯދަރަކީ ވަރަށް އަޒުމްވަރުގަދަ ކުއްޖެކެވެ. އޭނާގެ ބައްޕަ އޭނާއާއިމެދު ވަރަށް ފަޚުރުވެރިވެއެވެ. އެހާލުގައިވެސް މަސައްކަތްކޮށްގެން އާމްދަނީ ހޯދައިގެން ދިރިއުޅުމުގައި ކުރިއަށްދިއުމަށް ހިތްވަރު ހޯދާތީއެވެ. ކިރޯދަރު ބުނާގޮތުގައި ފިހާރައެއް ހިންގުމަކީ ކިޔަވައިދިނުމަށްވުރެ ރަނގަޅު އާމްދަނީއެއް ލިބޭކަމެއް ކަމުގައިވިއެވެ. އޭނާގެ ނަސޭހަތަކީ އެއްވެސް ދަރިއަކާމެދު ތަފާތުކުރުން ނުގެންގުޅެ ކޮންމެ ދަރިއަކީވެސް އަގުހުރި ދަރިއެއްކަމުގައި ދެކޭނަމަ ތަފާތު ފެނިގެންދާނެއެވެ. ކިރޯދަރުގެ ފަރާތުން މުޖުތަމައަށް ދޭން ބޭނުންވާ މެސެޖަކީ ދަރިންގެ މެދުގައި ތަފާތުކުރުން ނުގެންގުޅެ ހުރިހާ ކުދިންނަށްވެސް ހަމަހަމަ ކަމާއި ލޯތްބާއި އަޅާލުންދިނުމަށެވެ. އޭރުން ހުރިހާ ކަމެއްވެސް ރަނގަޅުވެގެންދާނެއެވެ.
