ޑްރެގަން ފުރުޓަކީ އާދަޔާ ޚިލާފު ބައްޓަމަކަށް ހެދިފައި ހުންނަ މޭވާއެކެވެ. މިމޭވާއަށް ކިޔާއުޅޭ އިތުރު ނަންތަކެއްވެސް ހުރެއެވެ. އެއީ ޕިޓަހަޔަރ އަދި ސްޓްރޯބެރީ ޕެއަރއެވެ. އެހެންނަމަވެސް އާއްމުގޮތެއްގައި ކިޔާ އުޅެނީ ޑްރެގަން ފުރުޓެވެ. މީގެ ބޭރުގައި ގަދަ ފިޔާތޮށި ކުލައިގެ ބޯކޮށް ހުންނަ ތޮއްޓެއް ހުރެއެވެ. ފެހިކުލައިގެ ކަށިތަކެއް ކަހަލަ ފަތްތަކެއްގެ ބޭރުގައި ހުންނައިރު މިމޭވާއަކީ ބަލާބެލުމަށް ރީތިވެސް މޭވާއެކެވެ. އޭގެ އެތެރެ އިންނަނީ ހުދުކުލަ ތެރޭގައި ކަޅު ކުލައިގެ އޮށްތަކެއްހެންނެވެ. ދެވައްތަރެއްގެ ޑްރެގަންފުރުޓެއް ހުރެއެވެ. އަނެއްބައި ވައްތަރުގައި އެތެރެ ހުންނަނީ ރަތް ނުވަތަ ފިޔާތޮށި ކުލައިގައެވެ. މިއީ އާއްމުކޮށް ހުންނަ ދެވައްތަރުވިޔަސް އަނެއް ވައްތަރުގައި ބޭރު ތޮށި ހުންނަނީ ރީނދޫ ކުލައިގައެވެ. އޭގެ އެތެރެ ހުންނަނީ ހުދު ކުލައިގައެވެ. މިމޭވާގެ ރަހަ އަކީ ވަރަށް މަޑު ރަހައަކަށް ވިޔަސް ވަރަށް މީރު މޭވާއެކެވެ. މީގެ ރަހަ އެންމެ އެއޮގޮތްވާނީ ކިވީ އާއެވެ. މިމޭވާ ފަޅާލުމަށްފަހު އެތެރޭގައި ހުންނަ ބައި ސަމުސަލަކުން ކަހާލައިގެންވެސް ކާން ބޭނުންކުރަން ފަސޭހަވާނެއެވެ. މިއީ ހީވެސް ނުކުރާހާ ގިނަގުނަ ފައިދާތަކެއް ލިއްބައިދޭ މޭވާއެކެވެ.
ހަކުރުބަލި ހުންނަ މީހުންނަށް އެހީއެއް:
މިމޭވާއަކީ އާދަޔާ ޚިލާފަށް ފައިބަރު އެކުލެވިގެންވާ މޭވާއަކަށްވާތީ، އެކަމުގެ ސަބަބުން ބްލަޑް ޝުގަރ ގެ ލެވެލް އެއްވަރެއްގައި ބެހެއްޓުމަށް އެހީވެދެއެވެ. ހަކުރު ހުންނަ މީހުން ގަވާއިދުން މިމޭވާ ކާނަމަ ހަކުރު ކޮންޓްރޯލް ކުރަން ފަސޭހަވެދެއެވެ. އޭގެ ސަބަބުން ސިއްޙީ އިތުރު މައްސަލަތައް ކުރިމަތިވުމުގެ ފުރުސަތުވެސް ކުޑަވެގެންދެއެވެ.
ކެންސަރު ޖެހުމުން ދުރުކޮށްދޭ:
މިމޭވާގައި އެންޓި ކެންސަރުގެ މާއްދާ އެކުލެވިގެންވާތީ އެކަމުގެ ސަބަބުން ކްލޯން ކެންސަރަށް މަގުފަހިވުމުގެ ފުރުސަތު ވަރަށް ބޮޑަށް ކުޑަވެގެންދެއެވެ. ވިޓަމިން ސީގެ މާއްދާވެސް އެކުލެވޭ މިމޭވާގެ ސަބަބުން އިމިއުން ސިސްޓަމް ވަރުގަދަކޮށްދީ، ހަކުރުބަލި އަދި ކެންސަރު ކަހަލަ ބަލިތައް ޖެހުމުގެ ފުރުސަތުވެސް މަދުވެގެންދެއެވެ.
ހަށިގަނޑުގެ ބަރުދަން ލުއިކުރުމަށް އެހީއެއް:
މި މޭވާއަކީ ކެލޮރީސް މަދު ހަށިގަނޑުގައި ހަކަތަ އުފައްދައިދޭ މެގްނީސިއަމްގެ މާއްދާވެސް ގިނަ މޭވާއެކެވެ. ހަމަ އެއާއެކު ފެޓީ ލިވަރ ހުންނަ މީހުންނަށް ވެސް މިމޭވާ ބޭނުންކުރުމުން ފެޓީ ލިވަރ ވެސް ދަށްކޮށްދެއެވެ. ޑައިޓްކުރާނަމަ މިމޭވާއަކީ ކެއުމުގައި ހިމަނަން ވަރަށް މުހިންމު މޭވާއެއްވެސް މެއެވެ.
ހިތުގެ މައްސަލަ ހުންނަ މީހުންނަށް އެހީއެއް:
ޑްރެގަން ފުރުޓުގެ އެތެރޭގައި ރަތްކުލަ ހުންނަ ވައްތަރު ބޭނުންކުރުމުން ކޮލެސްޓްރޯލްގެ ގޯސްވައްތަރު ދަށްކުރުމަށް އެހީތެރިވެދެއެ. އެތެރޭގައި ހުންނަ ކަޅުކުލައިގެ ތިކިތަކުން އޮމެގާ 3 އަދި އަދި ފެޓީ ލިވަރ އަށް ރަނގަޅު މާއްދާއެއްކަމަށްވާ އޮމެގަރ 9 ލިބިދެއެވެ. މިއިން ހިތުގެ މައްސަލަތަކަށްވެސް އެހީތެރިވެދެއެވެ.
ޒުވާކަންމަތީ ދެމިހުރުމަށް އެއީއެއް:
މި މޭވާއަކީ އެންޓިއޮކްސިޑެންޓްގެ މާއްދާ ލިބިދޭ އަދި އަވިން ހަންގަނޑު ހަލާކުވިޔަނުދީ ހުރުމަށް އެހީތެރިވެދޭ މޭވާއެކެވެ. މޫނުގައި ހުންނަ ބިހި އަދި ހަންގަނޑު ހިކި ނުވަތަ ކުރަކި ނުވެ ހުރުމަށްވެސް އެހީވެދެއެވެ.
މާބަނޑުމީހުންނަށް އެހީއެއް:
މި މޭވާއަކީ ވިޓަމިން ބީ ގެ މާއްދާ ވަރަށް ބޮޑަށް އެކުލެވިގެންވާ އަދި އަޔަންގެ މާއްދާ ލިބިދޭ ޚާއްސަކޮށް މާބަނޑުމީހުންނަށް ގިނައިން ބޭނުންވާ މާއްދާތައް ހިމެނޭ މޭވާއެކެވެ.
މައުލޫމާތު ނަގާފައިވަނީ: ހެލްތްލައިން
