ކޮންމެ މީހަކުވެސް ހިނިތުންވެލާއިރު ރީތި ދަތްޕިލައެއް ފެންނަން ހުރުމުން ލިބޭ ހިތްހަމަޖެހުން ވަރަށްބޮޑެވެ. ވާހަކަދައްކާއިރުގައި އަދި ހީލާއިރު ދަތްޕިލަ ވަރަށް ބޮޑަށް ފެންނަން ހުންނާތީ ދަތްޕިލަ ރީތިކުރުމަށް ގިނަ މަސައްކަތްތަކެއް ކުރާ މީހުން އުޅެއެވެ. ބޮޑު ޚަރަދުކޮށްގެން ދަތް ރީތިކުރުމަށް އަދި ދަތް ސާފުކުރަންވެސް ޑޮކްޓަރުން ކައިރިއަށް ދެއެވެ. މިގޮތަށް ދަތް ސާފުކުރުމުން ގުދުރަތީގޮތުން ދަތުގައި ހުންނަ އޮފްކަން ކުޑަވެގެންދެއެވެ. ދަތް ސާފުކުރުމަށް ކުޑަ ޚަރަދަކުން ގޭގައި ދެވިދާނެ ބައެއް ފަރުވާ މިލިޔުމުގައި ހިމަނާލާނަމެވެ.
ލުނބޯ އަދި ލޮނު ބޭނުންކޮށްގެން ދަތް ހުދުކުރުން
1 ސައިސަމުސާ ލޮނުގެ ތެރެއަށް ބައިސަމުސާ ލުނބޯހުތް އެއްކޮށްލުމަށްފަހު ދަތުގައި އުނގުޅާލާށެވެ. މިގޮތަށް އުނގުޅާއިރު ދަތް އުނގުޅާހެން އިނގިލިން ރީއްޗަށް އުނގުޅަމުން ގެންދާށެވެ. ހަފްތާއަކު 2 ފަހަރު މިގޮތަށް މިބާވަތްތައް ބޭނުންކުރުމުން ތަފާތު ފެނިގެންދާނެއެވެ.
ފޭރުފަތުން ދަތް ހުދުކުރުން
ތާޒާ ފޭރުފަތެއް ބިނުމަށްފަހު ރަނގަޅަށް ދޮވެލާށެވެ. އެއަށްފަހު ފޭރުފަތް ދަތްތަކުގައި އުނގުޅާލާށެވެ. ނުވަތަ ފޭރުފަތް އަނގައިގެ ތެރެއަށް ލުމަށްފަހު ހަފާލާށެވެ. މިގޮތަށް ހެދުމުން އަނގައިގެ ތެރޭގައި ހުންނަ ބެކްޓީރިއާ މަރުވުމަށް މަގުފަހިވެއެވެ. އަދި އެހެންމެ ދަތްތައް ހުދުވެއެވެ.
ހިތިފަތުން ދަތް ސާފުކޮށް ހުދުކުރުން
ހިތިފަތުން ދަތްތައް ސާފުކޮށް ހުދުކޮށްދެއެވެ. މިއީ ވަރަށް ކުރީ ޒަމާނުގައި އިންޑިއާގައި ބޭނުންކޮށް އުޅުނު ގޮތެކެވެ. ހިތިފަތުން ދަތްއުނގުޅައި ހިތިފަތް ޗަސްކުރުމަށްފަހުވެސް ބުރުހެއް ބޭނުންކޮށްގެން ދަތްތަކުގައި އުނގުޅިދާނެއެވެ.
މިކަންކަން ގޭގައި ކޮށްގެން އަޖުމަ ބަލާލާށެވެ.
