ވޭތުވެދިޔަ 16 އަހަރު ދުވަހު ނޫސްވެރިކަމުގެ ދާއިރާގައި ވަރަށް ގިނަ ރިޕޯޓް ތަކެއް ވާނީ ލިޔެފައެވެ. އެކަމަކު މިއީ ލިޔެވުނު ވަރަށް ޚާއްސަ ރިޕޯޓެކެވެ. މިފަހަރު 'ޒީޓައިމްސް' ކިޔުންތެރިންނަށް މިގެނެސްދެނީ ގދ.ގައްދޫގައި އަތްތެރިމަސައްކަތުގައި ފާހަގަކުރެވޭ ކަނބަލެއް ކަމުގައިވާ (އަޅުގަނޑުގެ މަންމަ) ފާތިމަތުދީދީ ގެ ކަސަބު ބޯވަޅު އެޅި ލިބާހުގެ މަސައްކަތަށް ބަލާލާ ތައްޔާރުކޮށްފައިވާ ރިޕޯޓެކެވެ.
ތުނޑުކުނާ ވިޔުމަށް މަޝްހޫރު ގައްދޫގައި ފާތިމަތުދީދީ އަކީ ކުރިން ކުނާވިޔުމުގެ މަސައްކަތް ވެސް ކުރި މީހެކެވެ. އަދި ދިގު ހެދުންފަދަ ތަފާތު ހެދުންތައް ފަހާ އުޅުނު ފާތިމަތުދީދީ މިއަދާހަމައަށްވެސް ދެމިހުރި އެއް މަސައްކަތަކީ ކަސަބު ގެތުމުގެ މަސައްކަތެވެ. ސަގާފަތާއި ކާބަފައިންގެ ހުނަރުވެރިކަން އެންމެ ފުރިހަމައަށް ފެންނަ ދިވެހި ލިބާސް ތައްޔާރުކުރުމުގައި ވޭތުވެދިޔަ 30 އަހަރު ދެމިހުރީ އެކަމަށް އޮންނަ ޚާއްސަ ލޯތްބެއްގެ ސަބަބުންނެވެ.
އުމުރުން 71 އަހަރުގެ ފާތިމަތުދީދީ ދިވެހި ލިބާސް ތައްޔާރުކުރުމުގައި ދެމިހުރީ، އެއީ އާއިލީ މަސައްކަތަކަށް ވާތީ އެ މަސައްކަތް ދެމެހެއްޓުމުގެ ބޭނުމުގައެވެ.
" އަޅުގަނޑުގެ މަންމަ ވަރަށް ރީތިކޮށް ކަސަބުގަތައިގެން ލިބާސް ތައްޔާރުކުރާނެ. މަންމަ ނެތް ދުނިޔޭގައިވެސް މިމަސައްކަތް މިކުރަނީ އާއިލީ ކަމެއްގެ ގޮތުގައި ދެކިގެން. ލިބޭ ހުސްވަގުތުތަކުގަ ކަސަބުގަތައިގެން ލިބާސް ފަހައިދެން. އަޅުގަނޑު ބަލަނީ ރީތިކޮށް ލިބާސް ތައްޔާރުކޮށްދިނުމަށް. ވަރަށް އުފާވޭ މިމަސައްކަތާމެދު މީހުންގެ ހިތްހަމަޖެހުން ލިބޭތީ". ފާތިމަތުދީދީ ފާހަގަކުރިއެވެ.
ކަސަބު ގެތުމަކީ ވަރަށް ކަވި މަސައްކަތެކެވެ. އެމަސައްކަތުގައި ގިނަ ވަގުތު ހޭދަވެއެވެ. މިކަމަށް ބޭނުންވާ ހުރިހާ އާލާތެއް ގެންގުޅޭ ފާތިމަތުދީދީ ބުނިގޮތުގައި އެންމެ ގިނަ ވަގުތު ހޭދަވަނީ ހިރު ގެތުމަށެވެ.
" ކޮންމެ ހިރެއް ގެތުމަށް މަދުވެގެން ދެދުވަސް ހޭދަވޭ. މެދުގައި ހުންނަ ރޯދުގަނޑު ގަތަން 5 ދުވަސް ހޭދަވޭ. އަދި ލިބާހުގައި ހިރު ހަރުކުރުމަށް ވެސް ވަރަށް ގިނަ ވަގުތު ހޭދަވޭ. އެއީ ތިނޯސް ބޭނުންކޮށްގެން އަތުން ވަރަށް ބަލައިގެން އެމަސައްކަތް ކުރާތީ".
އެންމެ ކުރީ ޒަމާނުގެ އާލާތްތައް ބޭނުންކޮށްގެން މިމަސައްކަތް ކުރާ ފާތިމަތުދީދީ ފާހަގަކުރިގޮތުގައި ބޭނުންވާ ފޮތި ކަސަބުފަދަ ތަކެތި ގަންނަނީ މާލެއާއި ރާއްޖެއިން ބޭރުންނެވެ. ލިބާހުގެ އަގު އުޅެނީ 1500 ރުފިޔާ އާއި 3500 ރުފިޔާއާއި ދެމެދުގައެވެ.
އަމިއްލަ ރަށުގައި އަމިއްލަ ގޭގައި އިދެގެން ހިތްހަމަޖެހުމަށް ކުރާ މި މަސައްކަތުގައި އޮތް އެންމެ ބޮޑު އުފަލަކީ، އޭނާގެ ލިބާސްތަކުގެ ޖާދޫގައި ގިނަ ބަޔަކު ޖެހިފައިވުމެވެ. ހިރުތަކުގެ ތަރުތީބާއި އޮމާންކަން ފެނި މާލެއިން ވެސް ފާތިމަތުދީދީ އަށް ދަނީ ލިބާސް ތައްޔާރުކުރުމަށް ފުރުސަތު ލިބެމުންނެވެ. މިއުމުރުގައި ބުރަކޮށް މަސައްކަތްކުރަން ބޭނުންނުވާތީ ވަގުތުވާމިންވަރަކުން ބޭނުންވަނީ ދިވެހި ލިބާސް ތައްޔާރުކުރުމުގައި ދެމިހުންނާށެވެ. އަދި މިމަސައްކަތް ދަސްކުރަން ބޭނުންވާ މީހުންނަށް ދަނީ ކިޔައިދެމުންނެވެ.
ވީޑިއޯ:
