މިހާރަކަށް އައިސް ވަރަށް ގިނަ މީހުން ފުރަންދާއިރު ފުލައިޓަށް އަރަމުން ދާން އުޅޭ ގައުމު އަންގާލަދީ ބޯޑިން ޕާސްގެ ފޮޓޯ ނަގައެވެ. މިކަމަކީ ފަހުގެ 'ޓްރެންޑެއް' ކަމަށް ބަލައިގެން ވަރަށް ގިނައިން ކުރަމުން އަންނަ ކަމެކެވެ. ގިނަ މީހުންގެ އިންސްޓަގްރާމް ސްޓޯރީއިން މިމަންޒަރު ފެނެއެވެ. މިކަން ކުރަނީ ސްޓޯރީ އަޕްޑޭޓްކޮށް ޓްރެވެލިންގެ ފޮޓޯ ހިއްސާކޮށް ފޭނުން ނުވަތަ ރައްޓެހިންނަށް ދައްކާލުމަށެވެ. މިކަން މިގޮތަށް ކުރާއިރު މީގައި ހުރި ނުރައްކާތެރިކަން އިހްސާސް ނުކުރެވެއެވެ.
މިއީ އެހާ އާދައިގެ ކަމެއްކަމަށް ދެކިގެން ނުވާންވީ ސަބަބުތައް ވަރަށް ގިނައެވެ. މިކަމުގެ ސަބަބުން ތިމާއަށް ކޮށްފާނެ ނޭދެވޭ އަސަރުތަކެއް އެބަހުރިކަން އެނގެންޖެހެއެވެ. މިގޮތަށް ފުލައިޓްގެ ބޯޑިން ޕާސްގެ ފޮޓޯ ލުމުން ދާން އުޅޭ މަންޒިލަށް ވާސިލުވުމުގެ ކުރިން އެދަތުރަކީ އެންމެ ރައްކާތެރި ދަތުރަށް ނުވެ ހިނގައިދާނެ ކަމުގެ ކަންތައްތައް ބައެއް މީހުންނަށް ދިމާވެފައި ވެއެވެ.
ސަމާލުވާންވީ ސަބަބުތަކަކީ ކޮބައިކަން މިލިޔުމުގައި ހިމަނާލާނަމެވެ.
ބޯޑިން ޕާސްގެ ފޮޓޯ ނުލާންވީ ސަބަބު:
ބޯޑިން ޕާސްގައި އެއިންނަ "ކިއު އާރ" ކޯޑަކީ މީހާގެ އަމިއްލަ މައުލޫމާތުތައް އެނގެން ހުންނަ އެއްޗެކެވެ. އޭގެއިން ކްރެޑިޓް ކާޑް ނުވަތަ ޑެބިޓް ކާޑަކުން ޓިކެޓް ގަނެފައިވާނަމަ އެކާޑުގެ މައުލޫމާތުވެސް ބައެއްފަހަރު ބަލާލެވެއެވެ. މީގެ ސަބަބުން ކާޑު ބޭނުންކޮށްގެން ވަގު ވިޔަފާރީގެ މުއާމަލާތް ހިންގުމަށް މަގުފަހިވެގެންދެއެވެ. އަދި ހަމަ މިއާއެކު އީމެއިލް އެޑްރެސް އާއި ގޭގެ އެޑްރެސްވެސް އެނގިގެންދެއެވެ. މިކަމުގެ ސަބަބުން ދިމާވެދާނެ ނުރައްކަލަކަށް ވިސްނަން އެބަޖެހެއެވެ.
މައުލޫމާތު ބޭނުންކޮށްގެން ތިމާ ދަތުރުކުރާ މަންޒިލު ބަދަލުކޮށް، ފުރަން އޮންނަ ތާރީޚް ބަދަލުކޮށް، ފުލައިޓް ކެންސަލް ކުރުން ފަދަ ކަންކަން ކުރެވިދާނެއެވެ. ހޮޓަލެއްގެ ބުކިން ހަދާފައިވާނަމަ ހޮޓާ ބަދަލުކޮށްލުން ފަދަ ކަންކަންވެސް ކުރެވިދާނެއެވެ.
ބޯޑިން ޕާސް ޝެއާކުރުމުން ޕާސްޕޯޓް ނަމްބަރ އެނގުމުން ޕާސްޕޯޓް ނަމްބަރ ލީކް ކުރުން ކަހަލަ ކަންކަންވެސް ދިމާވެއެވެ. ތިމާގެ އަމިއްލަ މައުލޫމާތަކީ ކިހާ ސިއްރު މައުލޫމާތެއްކަން ދަންނަން އެބަޖެހެއެވެ.
ބޯޑިން ޕާސް ޕްރިންޓްކުރުން އެހާ ރައްކާތެރިތޯ؟
މިޒަމާނުގައި ދަތުރުފަތުރު ކުރުމުގައި ވަރަށް ގިނަ ފަސޭހަތަކެއް ހުރެއެވެ. އޮންލައިންކޮށް ޗެކްއިން ވުމުން އިލެކްޓްރޯނިކް ބޯޑިން ޕާސް ލިބެއެވެ. ސީޓް ނަމްބަރވެސް ބުކްކޮށްލެވެއެވެ. މިގޮތަށް ކަންތައްކުރުން ރައްކާތެރިކަން ބޮޑެވެ. އަދި ހަމަ އެހެންމެ ޕްރިންޓް ނެގުމުން ތިމާވެއްޓަށް ދެވޭ ގެއްލުންވެސް އެކުލެވިގެންވެއެވެ.
ސޯޝަލް މީޑިއާގައި ހާމަކޮށްލެވޭ ބޯޑިން ޕާސްއަކުން ތިމާގެ ދިރިއުޅުމަށް ނޭދެވޭ އެތައް ގެއްލުންތައް މެދުވެރިކުރުވަފާނެކަން ވިސްނާ ފިކުރުކޮށްލާށެވެ. ކޮންމެ ކަމަކީ އާދައިގެ ކުޑަކުޑަ ކަމެއްކަމަށް ނުދެކި މިކަހަލަ ކަންކަމުން އިބްރަތް ހާސިލު ކުރަން ދަސްކުރަން އެބަޖެހެއެވެ. ދުނިޔޭގެ އެކި ގައުމުތަކުގައި މިކަހަލަ ކަންކަން ދިމާވެފައިވާ މީހުން ހިއްސާކޮށްފައިވާ ބައެއް ވާހަކަތަކުން އެނގިގެންދަނީ މިކަމަކީ ވަރަށް ބޮޑަށް ސަމާލުކަންދީ ރައްކާތެރިކަމުގެ ފިޔަވަޅު އަޅަންޖެހޭ ކަމެއްކަމެވެ. ކުރެވޭ ކުޑަކުޑަ އެންމެ ކަމަކުން މުޅި ދިރިއުޅުން ހަލާކުވުމުގެ ކުރިން ވިސްނާލައިފިނަމަ އެސަލާމަތް ވެގެންދަނީ ތިމާގެ ރައްކާތެރިކަމެވެ.
