ދުނިޔޭގައި އުޅޭއިރު އެކި މީހުންގެ ދިރިއުޅުމުގެ ހާލަތު ހުންނާނީ އެކިގޮތަށެވެ. އެއްބަޔަކު ޒަމާނީ ފެންވަރުގެ ދިރިއުޅުމަށް ލޯބި ކުރާއިރު އަނެއްބަޔަކު ލޯބި ކުރަނީ ރަށްފުށުގެ ހަމަހިމޭން ދިރިއުޅުމަށެވެ. އެއްބަޔަކަށް ޒަމާނީ ވަސީލަތްތައް ނުލިބި އުޅެން އުދަގޫ ނަމަވެސް އަނެއްބަޔަކު ދަނީ ޒަމާނީ ވަސީލަތްތައް ނެތި، ދިރިއުޅުން އާރާސްތު ކުރަމުންނެވެ. ދާދިފަހުން މެލޭޝިއާގެ ޝޯޝަލް އެކްޓިވިސްޓެއް ކަމަށްވާ ކުއަން ޗީ ހެންގް ނުވަތަ އަންކަލް ކެންޓަންގެ ނަމުން މަޝްހޫރު ވެފައިވާ މިމީހާގެ ފޭސްބުކުން ފެނިގެންދިޔައީ އާދަޔާޚިލާފު ވާހަކައެކެވެ.

މެލޭޝިއާގެ ޕެރާކްގައި ހުންނަ ޕާމް އޮއިލް ޕްލާންޓޭޝަން އެއްގައި ދިރިއުޅެމުން އަންނަ މަންމައަކާއި ދަރިފުޅެއްގެ ވާހަކައެވެ. މިމީހުން މިތަނުގައި ދިރިއުޅޭތާ އެތައް އަހަރެއްވެފައިވާ ކަމަށް ވަނީ ބުނެފައެވެ. މީނާ ވަނީ ވަރަށް ފަހުން 'ކަންޕުން ގްޖަރ' ކިޔާ ވިލެޖަކަށް ޒިޔާރަތްކޮށްފައެވެ. އެޒިޔާރަތްކުރުމުގައި މީނާއަށް ދިމާވި މިއާދަޔާޚިލާފު ކަންތަކުން ކުއަންޗީ ވަނީ ވަރަށް ބޮޑަށް ހައިރާންވެފައެވެ.

އުމުރުން 90 އަހަރަށްވުރެ މައްޗަށް ގޮސްފައިވާ މަންމަ އާއި އުމުރުން 50 އަހަރުވެފައިވާ ދަރިފުޅުގެ ދިރިއުޅުން ފެނި ކުއަން ވަނީ ވަރަށްބޮޑަށް ހައިރާންވެ އަންތަރީސްވެފައެވެ. އެތަނަކީ ވިނަގަސްތަކުން ފުރިފައިވާ އެއްވެސް އަލިކަމެއްނުވާ ތަނެކެވެ. ކުއަން އެތަނަށް ވަދެ ބެލިއިރު އެތަނުގައި ނިދާނެ އެއްވެސް އެދެއްވެސް ނެތެވެ. އަދި ކައްކާ ކެވޭނެ ގޮތަށް ބަދިގެއެއްވެސް ނެތެވެ. ބޯފެނާއި ކަރަންޓެއްވެސް ނެތެވެ. މިމީހުންގެ ދިރިއުޅުން ކުރިއަށްދާ ގޮތް ބެލުމަށްޓަކައި އެމީހުންނާއި ސުވާލު ކުރެވުނެވެ. އެމީހުން ފެނުގެ ގޮތުގައި ބޭނުންކޮށް އުޅެނީ އެތާ ކައިރީގައި އޮންނަ ކޯރުގެ ފެނެވެ. ކެއުމަށް ބޭނުންކުރަނީ އެކި ވައްތަރުގެ ފަތްޕިލާވެއްޔެވެ. އެތަނުގެ ވަށައިގެން ފެންނަން ހުންނަ ވިނަ، ތަފާތުވައްތަރުގެ ފަތް ކައި އުޅެއެވެ.

Advertisement

ފިރިހެން ދަރިފުޅު ބައެއްފަހަރު ވަރަށް މަދުން އެއްޗެހި ހޯދުމަށް މާކެޓަށް ގޮސް އުޅެއެވެ. ފިރިހެން ދަރިފުގެ ކައިރިން ފައިސާ ބޭނުންތޯ އެހުމުން ޖަވާބުގައި ބުނީ ފައިސާ ބޭނުންނުވާ ކަމަށާއި ބޭނުންވަނީ 2 ގެރި ކަމަށެވެ. އޭރުން އޭގެއިން އެމީހުން ބޭނުންވާ ކަންކަން ކުރެވިދާނެ ކަމުގައިވެސް ބުންޏެވެ. އެވިލެޖު މީހުން ކައިރީގައި ބުނެގެން 2 ގެރި ގަނެ ދިނުމަށްފަހު މި އާދަޔާޚިލާފު ދިރިއުޅުމެއް އުޅޭ މަންމައާއި ދަރިފުޅަށް ހަވާލު ކުރުމަށް ކުއަން އެދުނެވެ.

ކަން މިހެން ހުރިކަމުގައި ވިޔަސް ކުއަން ބޭނުންވަނީ މި ދެމައިންނަށް ދިރިއުޅެވޭނެ ގެއެއް އަޅާދިނުމަށެވެ. އެންމެ ބޮޑު އެއްސަބަބެއް ކަމުގައި ކުއަން ބުނަނީ މިހާރުގެ ހާލަތަށް ބަލާފައި ފެންބޮޑުވުމުގެ ހާލަތެއް ކުރިމަތިވެއްޖެނަމަ އެމީހުނަށް ދިރިއުޅުން ވާނީ ވަރަށް ދަތި އުދަގޫ ކަމަކަށެވެ. މިސަބަބަށްޓަކައި ކުއަން މިހާރު ދަނީ އާންމުންގެ އެހީތެރިކަމަށް އެދިގެން 25000 މެލޭޝިއަން ރިންގިޓް ހޯދުމުގެ މަސައްކަތް ކުރަމުންނެވެ. 

ކުއަންގެ ފޭސްބުކުގެ މިޕޯސްޓަށް ވަރަށް ގިނަ މީހުންގެ ލައިކްސް ލިބި ވަނީ ޕޯސްޓް އާންމުވެފައެވެ. މިމަސައްކަތުން މިދެމައިންނަށް ރަނގަޅު ދިރިއުޅުމެއް ލިބުމަކީ ކުއަން ވަރަށް ދެކެން ބޭނުންވާ ދުވަހެކެވެ.