އެވަކާޑޯއަކީ ކެއުމުގައި ބޭނުންކުރާ ވަރަށް މުހިއްމު އަދި އެހާމެ ގިނަގުނަ ފައިދާތަކެއް ލިބިދޭ މޭވާއެކެވެ. މިމޭވާ ގިނައިން ބޭނުންކޮށް އުޅެނީ ޖޫސް ތައްޔާރުކުރުމަށެވެ. ސްމޫތީ ނުވަތަ މިލްކްޝޭކް ތައްޔާރުކުރުމަށްވެސް ބޭނުންކުރެއެވެ. މިބޭނުންކޮށްގެން ހަދާ ސޭންޑްވިޗަކީވެސް ވަރަށް ފައިދާހުރި މީރު ސޭންޑްވިޗެކެވެ. އެވަކާޑޯއިން ހަންގަނޑު ރީތި ކުރުމަށް އެކިކަހަލަ ފޭސްމާސްކްވެސް ތައްޔާރުކޮށް އުޅެއެވެ.
އެވަކާޑޯއިން ލިބިދޭ ފައިދާތަކާ އެއްވަރަށް އޭގެ އޮށުންވެސް އެތައް ފައިދާތަކެއް ލިބިދެއެވެ. އެވަކާޑޯ އޮށުން ތައްޔާރުކުރެވޭ އެވަކާޑޯ ސަޔަކީ ވަރަށް ފައިދާހުރި ގިނަކަންކަމަށް ހައްލު ހޯދައިދޭ އެއްޗެކެވެ.
އެވަކާޑޯ އޮށުން ތައްޔާރު ކުރެވޭ ސައިން ލިބިދޭ ފައިދާތަކަކީ:
ކޮލެސްޓްރޯލް ދަށްކޮށްދީ ބަރުދަން ލުއިކުރުމަށް އެހީއެއް
އެވަކާޑޯ އޮށުން ތައްޔާރުކުރެވޭ ސައި ބޭނުންކުރާނަމަ ކޮލެސްޓްރޯލް ދަށްކޮށްދެއެވެ. މިކަމުގެ ސަބަބުން ސްޓްރޯކް ޖެހުމުގެ ފުރުސަތު ކުޑަވެގެންދެއެވެ. އަދި ހަމަ މިއާއެކު ހިތުގެ ބަލިތައް ޖެހުމުން ދުރުކޮށްދެއެވެ. ހަށިގަނޑުގައި ހުންނަ ސަރުބީތައް ވިރުވާލަދީ ބަރުދަން ލުއިކޮށްދިނުމަށްވެސް އެހީތެރިވެއެވެ.
ބަނޑުގެ މައްސަލަތަކަށް ހައްލު ހޯދައިދޭ
އެވަކާޑޯ ސައި ބޭނުންކުރުމުން ބަނޑު ހަރުވުމުން ދިމާވާ ހަޖަމުކުރުމުގެ މައްސަލަތަކަށް ލުއި ލިބިގެންދެއެވެ.
ޒުވާންކަން މަތީ ދެމިހުރުމަށް އެހީއެއް
މިސައި ބޭނުންކުރާނަމަ ގިނަ ދުވަހު ޒުވާންކަންމަތީ ދެމިހުރުމަށް އެހީވެދީ ހަންގަނޑު ރީތިކޮށް ބަހައްޓައިދެއެވެ.
އެވަކާޑޯ ސައި ތައްޔާރުކުރާނެގޮތް:
ފުރަތަމަ އެވަކާޑޯ ފަޅާލުމަށްފަހު އޭގެ އޮށް ނަގާނީއެވެ. އެއަށްފަހު ފެންއެއްޗަކަށް އަޅައިގެން އޮށް ކައްކާނީއެވެ. ކެކެން ފެށުމުން އޭގެއިން ނިކުންނާނީ ރީތި ރަތްކުލައެކެވެ. 10 މިނިޓްވަންދެން ކެއްކުމަށްފަހު އޮށް ނެގުމަށްފަހު އޮށް ފަޅާލާށެވެ. އެއަށްފަހު އަނެއްކާވެސް ފަޅާލާފައިވާ އޮށް އަޅައިގެން 05 ވަރަކަށް މިނިޓް ކެއްކުމުން ވަރަށް ރީތި ރަތްކުލައެއް އަރާނެއެވެ. ދެން ފުރާނާލުމަށްފަހު ބޭނުންނަމަ މާމުއިކޮޅެއް އަޅައިގެން ބޯލަން ވަރަށް މީރުވާނެއެވެ. މިސަޔަކީ ފައިދާހުރި މީރު ސައެކެވެ.
މައުލޫމާތު ނަގާފައިވަނީ: ޓައިމްސް އޮފް އިންޑިއާ
