ރާއްޖެއިން ބޭރު ގައުމެއްގައި ދިރިއުޅެން ބޭނުންވާ އެތައް އާއިލާއެއް އުޅެއެވެ. އެއީ ކޮން ސަބަބުތަކެއްތޯ ބަލާލާއިރު ބައިވަރު ސަބަބުތައް އެބަހުއްޓެވެ. އެއްވެސް ވަރަކަށް ތިމާގެ އަމިއްލަ ގައުމު ކަމުނުގޮސްގެނެއް ނޫނެވެ. އެކަމަކު ލިބޭ އެއްޗަކުން ދެކޮޅުނުޖެހި ރެއާއި ދުވާލު އަވަދިނެތި މަސައްކަތުގައި އުޅެންޖެހުމާއި އެކުވެސް ހިތްހަމަޖެހޭ ދިރިއުޅުމެއް ނޫޅެވިގެންނެވެ. އަމިއްލަ ގައުމު ދޫކޮށް އެހެން ގައުމަކަށް ދިރިއުޅުން ބަދަލުކުރާއިރު ވިސްނަންޖެހޭ އެތައްކަމެއް އެބަހުއްޓެވެ. ފުރަތަމަކަމަކަށް އަމިއްލަ ގައުމަށް ވުރެ ޚަރަދު ކުޑަކޮށް އުޅެވޭނެ ގައުމެއްތޯ ބަލާށެވެ. ހަގީގަތުގައި ބުނާނަމަ ގިނަ މީހުން އެއްގައުމުން އަނެއް ގައުމަށް ދިރިއުޅުން ބަދަކުރަނީ ޚަރަދު ކުޑަ އުފާވެރި ދިރިއުޅުމެއް އުޅުމުގެ މަގުސަދުގައެވެ. އެހެން ގައުމަކަށްދާނަމަ ވަޒީފާއެއް ހޯދައި އެތަނެއްގައި ވަޒީފާ އަދާކުރަމުން ކުޑަ ޚަރަދަކުން އުޅެވޭ ގައުމުތައް ބައިވަރެވެ. އޭގެ ތެރެއިން ދުނިޔޭގައި ޚަރަދު ކުޑަކޮށް ދިރިއުޅެވިދާނެ ބައެއް ގައުމުތައް ފާހަގަކޮށްލާނަމަވެ.
އިންޑޮނޭޝިއާ
އިންޑޮނޭޝިއާއަކީ ދިރިއުޅުމުގެ ޚަރަދު ވަރަށް ބޮޑުތަންވެސް ކުޑަ ގައުމެއްގެ ގޮތުގައި ހިމެނިފައިވާ ތަނެކެވެ. މިގައުމުގެ އާބާދީއަކީ 273 މިލިއަނެވެ. އަދި ހަމަ އެއާއެކު ދުނިޔޭގެ ނިސްބަތުން އާބާދީ ބޮޑު ގައުމެއް ކަމުގައި ހިމެނިފައިވާ ގައުމެވެ. މިގައުމަށް ހިޖުރަކުރަން ބޭނުންވާ މީހުން ވިސްނަންވީ ކަމަކީ މިތަނުގެ ކުލި ކުޑަކަމެވެ. 1 ކޮޓަރީގެ އެޕާރޓްމެންޓަށް އެވްރެޖުކޮށް ދައްކަންޖެހެނީ 142 ޔޫއެސް ޑޮލަރެވެ.
ޗުއްޓީއަކަށްދާ މީހެއް ނަމަވެސް އެވްރެޖުކޮށް ހޮޓާތަކުގެ އަގަކީ 15 ޑޮލަރެވެ. މިތަނުގައި ޓީޗަރުންނަށް ފުދޭވަރެއްގެ އާމްދަނީ އެއް ލިބިގެން ހަމަޖެހިގެން އުޅެލެވޭނެއެވެ.
ވިއެޓްނާމް
ވިއެޓްނާމަކީ ދިރިއުޅެލަން ހިތްގައިމު އަދި ވަޒީފާއަދާކޮށްގެން ލިބޭ އެއްޗަކުން ދިރިއުޅެލެވޭނެ ރީތި ތަނެކެވެ. ކުޑަ ޚަރަދަކުން ދިރިއުޅުމުގެ ކަންކަން ހަމަޖެއްސޭ ހިތްގައިމު ތަނެއްގެ ގޮތުގައި ހިމެނިފައިވާ ތަނެކެވެ. މިތަނުގެ މައި ސިޓީއަކީ ހޯޗިމިން ސިޓީއެވެ. މިތަނަކީ ހިތްހަމަ ޖައްސާލުމަށް ބަލާލަން ދާންވެސް ގުދުރަތީ ރީތި ތަންތަން އެކުލެވިފައިވާ ގައުމެކެވެ. މިތަނުގަ އާއްމު މީހަކަށްވެސް ވަޒީފާ އަދާކޮށް ކުލި ދައްކައިގެން ފައިސާ ރައްކާކޮށްގެންވެސް ހިތްހަމަޖެހިލައިގެން އުޅެލެވޭނެއެވެ. އާއްމުކޮށް ބޭރުގައުމުތަކުގެ މީހުންނަށް ލިބޭ ރަނގަޅު ވަޒީފާތަކަކީ އިނގިރޭސި ޓީޗަރު ކަމުގެ ވަޒީފާއެވެ. އެވްރެޖް ގޮތެއްގައި ޓީޗަރެއްގެ މުސާރައަކީ 2000 ޑޮލަރެވެ. ކުލީގެ ގޮތުގައި އެއްކޮޓަރީގެ އެޕާރޓްމެންޓަކަށް ޚަރަދުވަނީ 259 ޔޫއެސް ޑޮލަރެވެ. ކެއުމާއި އެހެނިހެން ޚަރަދުތަކަށް ހޭދަވަނީ 100 ޑޮލަރެވެ. ޖުމުލަކޮށް 1000 ޑޮލަރަށްވުރެ ކުޑައެއްޗަކުން ހަމަޖެހިގެން ދިރިއުޅެވެއެވެ.
ސައުތު އެފްރިކާ
ސައުތު އެފްރިކާއަކީ އިނގިރޭސި ބަހުން ވާހަކަ ދައްކާ އެންމެ އުޅެން ފަސޭހަ ގައުމު ކަމުގައި ހިމެނިފައިވެއެވެ. މިގައުމުގައި މީހުން އެކަކު އަނެކަކަށް މުއާމަލާތު ކުރުމުގައި ބޭނުން ކުރާ ބަހެއްގެ ގޮތުގައި އިނގިރޭސި ބަސް އޮތުމުން ސްކޫލަށް ވެއްދުމުގައިވެސް އެތައް ފަސޭހަތަކެއް ލިބިގެން ދެއެވެ. ކޮންމެހެން އިންޓަނޭޝަލް ސްކޫލަކަށް ވެއްދުމުގެ ބަދަލުގައި ޕަބްލިކް ސްކޫލަކަށް ވެއްދުމުންވެސް ފެންވަރު ދަށްނުވެ އިތުރު ބަހެއް ދަސްކުރަން ނުޖެހި ފަސޭހައެވެ. މިގައުމަކީވެސް ޓީޗަރުންނާއި ޓުއަރިޒަމް ދާއިރާގެ މީހުންނަށް ވަޒީފާގެ މަގު ފަހިވެފައިވާ ދިރިއުޅެން އަގުހެޔޮ ގައުމެކެވެ. 1 ކޮޓަރީގެ އެޕާޓްމެންޓެއްގެ އަގު އުޅެނީ 300 އާއި 500 ޑޮލަރާއި ދެމެދުގެ އަދަދަކަށެވެ.
ޗައިނާ
ޗައިނާއަކީ ވިޔަފާރީގެ ދުނިޔޭގައި އެންމެ ކުރިއަރާފައިވާ އެއްގައުމޭ ބުނުމަކުން ދޮގަކަށް ނުވާނެއެވެ. އެއްޗެހީގެ އަގަށް ބެލިކަމުގައިވިޔަސް އެހާމެއަގު ހެވެވެ. ވަޒީފާއެއް ލިބިއްޖެނަމަ ލިބޭ މުސާރަ އޭޝިއާގެ އެހެން ގައުމުތަކާއި އަޅާބަލާއިރު އެތައް ގުނައެއް ބޮޑެވެ. އަދި ދަރިންނަށް ކިޔަވައިދިނުމަށް ރަނގަޅު އިންޓަރނޭޝަނަލް ސްކޫލްތައްވެސް ބައިވަރެވެ. މިތަނުގައި 1 ކޮޓަރީގެ އެޕާޓްމެންޓްގެ އަގަކީ 300 ޑޮލަރެވެ. ކެއުމުގެ އަގުތައްވެސް ނިސްބަތުން ވަރަށް އަގުހެވެވެ.
ތައިލެންޑް
މިއީ ބޭސްފަރުވާގެ އެތައް ވަސީލަތްތަކެއް ލިބޭ ހިތްހެޔޮ މީހުން އުޅޭ ގައުމެކެވެ. "ލޭންޑް އޮފް ސްމައިލް"ގެ ނަމުން މަޝްހޫރުވެފައިވާ އަގުހެޔޮ ގައުމެކެވެ. ނަލަނަލަ ރީތި ގޮނޑުދޮށްތަކުން ޒީނަތްތެރިވެފައިވާ އެތައް ރިސޯޓްތަކެއް ހުރެއެވެ. ދުނިޔޭގެ ގިނަ ގައުމުތަކާއި އަޅާބަލާއިރު މިތަނުގެ ރިސޯޓްތަކުގެ އަގު އެހާމެ ހެވެވެ. ހިތްހަމަ ޖައްސާލުމަށް ދާނެ ފަރުބަދަމަތީ ރީތި ރަށްތައްވެސް ބައިވަރެވެ. ވިޔަވާރިކޮށްލުމާއި ކިޔަވައިދިނުމާއި މިހުރިހާ ކަމަކަށް ބެލިނަމަވެސް ތައިލެންޑަކީ ވަރަށް ރަނގަޅު ތަނެކެވެ. ވައްކަމާއި ފޭރުން މަދު އެންމެ ރައްކާތެރި އެއްގައުމު ކަމުގައިވެސް ހިމެނިފައިވާ ގައުމެކެވެ. އެވްރެޖްގޮތެއްގައި 1 ކޮޓަރީގެ ޒަމާނީ ފެންވަރުގެ އެޕާޓްމެއްޓެއްގެ އަގަކީ 500 ޑޮލަރެވެ. ކާއެއްޗެހީގެ އަގުހޮޔެ އުޅެން ވަރަށް ފަސޭހަ ތަނެކެވެ. ލިބޭ އެއްޗަކުން ހިތްހަމަޖެހިލައިގެން އުޅެލެވިދާނެއެވެ.
ފޮޓޯ: ވޯގް، ވިކީވެންޑް
