ގޭތެރޭގައި ބޭނުންކުރާ ބޮއްކަކީ ލޮލަށް އެންމެ ރަނގަޅު ބޮކިތޯ ބަލާނީ ކިހިނެއްކަން އެނގޭތަ؟ އަދި އެބޮކިތަކުގެ ތަފާތުން ލޮލަށްވާ ފަސޭހަވެސް ދެނެގަތުން އެއީވެސް ވަރަށް މުހިއްމުކަމެކެވެ.
ރީނދޫއަލި އަދި ހުދުއަލި އަކީ ވަރަށް ތަފާތު ދެއައްޔެކެވެ. ބައެއް މީހުން ފޮތްކިޔުމަށް ހުދުއަލި ބޭނުންކުރާއިރު އަނެއްބައި މީހުން ފޮތް ކިޔުމަށް ބޭނުންކުރަނީ ރީނދޫއައްޔެވެ. އެއީ އެމީހެއްގެ އަމިއްލަ އަދި އެމީހަކު ޚިޔާރުކުރާ ގޮތެވެ. ދެވައްތަރު އަލި ހުންނަ ބޮކި އެއްކޮށްލައިގެންވެސް ބައެއް މީހުން ބޭނުންކުރެއެވެ.
ރީނދޫއަލި
ރީނދޫއައްޔަކީ ވަރަށްމަޑު އަދި ލޮލަށް ފަސޭހަކަމެއް ގެނެސްދޭ އައްޔެކެވެ. ހަމުގެ ކުލަ އަލިވެފައި މަޑުކަމަށް ފާހަގަވާނެއެވެ. މިއަލީގައި އަހަރުމެން ފެންނާނީވެސް ރީތިކޮށެވެ.
ސިޓިންގރޫމް، ޑައިނިންރޫމް އަދި ކޮޓަރީގައި އާއްމުކޮށް ބޭނުންކުރަނީ ރީނދޫއައްޔެވެ. ރީނދޫއަލިން ގެނެސްދޭ ތަފާތުކަމަކީ އަލްޓްރާ ވައިލެޓް ނުވަތަ ޔޫވީގެ އަސަރު ކުޑަވެފައި ރީނދޫއަލީގެ ލެޑްލައިޓުން ކަރަންޓް ޚަރަދުވެސް ކުޑަވެގެންދެއެވެ.
ހުދުއަލި
ހުދުއަލީގެ ސަބަބުން ލޮލަށް އުދަގޫވާގޮތެއް ހުރެއެވެ. ނަމަވެސް އާއްމުކޮށް ހުދުއަލީގައި އުޅެން އާދަވެފައިވާނަމަ ހުދުއަލީގައި އުޅުމަކީ މާއުދަގޫ ކަމަކަށް ނުވާނެއެވެ. އާއްމުގޮތެއްގައި ވަރަށް ސާފުކޮށް އެއްޗެހި ވަކިކުރުމަށް ބޭނުންކުރާ ތަންތަނުގައި ހުދުއަލި ބޭނުންކުރުމަކީ ވަރަށް މުހިއްމު ކަމެކެވެ. ހުދުއަލީގެ ސަބަބުން ބަދިގޭގައި ކައްކާއިރު ފަސޭހަކަމަށްވެސް ފާހަގަކުރެވެއެވެ. ގަރާޖު، ސެލޫން، އެއްޗެހި ޑިސްޕްލޭކޮށްފައި ހުންނަ ތަންތަނުގައި އާއްމުގޮތެއްގައި ބޭނުންކޮށް އުޅެނީ ހުދުއައްޔެވެ. ހުދުއަލިން ގެނެސްދޭ ތަފާތުކަމަކީ ހުދުއަލި ބޭނުންކުރަނީ ފަހުގެ ޒަމާނީ ތަންތަނުގައެވެ.
ގުދުރަތީ އަލި
ގުދުރަތީ އައްޔަކީ އާޓިފިޝަލް އައްޔާ އަޅާކިޔާއިރު ސިއްހީގޮތުން އެތައްގުނައެއް ރަނގަޅު އައްޔެކެވެ. ވިޓަމިންޑީގެ މާއްދާ ލިބިދީ ދުޅަހެޔޮ ސިއްހަތެއްގައި ހުރުމަށްވެސް ގުދުރަތީ އައްޔަކީ ވަރަށް މުހިއްމު އެއްޗެކެވެ. މީހާގެ މިޒާޖު ރަނގަޅުވުމަށް އެހީވެދީ ހަކަތަ އިތުރުކޮށްދެއެވެ.
