ދަތުގައި ނަރުގަނޑު އެޅުވުމަކީ ފަހަކަށްއައިސް ވަރަށް އާއްމު ކަމެކެވެ. މިއީ ބައެއް ހާލަތްތަކުގައި ޑޮކްޓަރުންވެސް އިރުޝާދުދޭ ކަމެކެވެ. ގިނަ ފަހަރަށް ނަރުގަނޑު އަޅުވަނީ ދަތްތައް އެއްވަރު ކުރުމާއި، ތެދަށް ބެހެއްޓުމާއި، ދަތްތަކުގައި ހުންނަ ހުސްޖާގަ ފުރާލުމަށާއި، ދަތްތައް މާބޮޑަށް ބޭރަށް ނުކުމެ ދަތްތަކުގެ ބައްޓަން ގެއްލޭތީއެވެ. މިގޮތަށް ނަރުގަނޑު އަޅުވާލުމުން ދަތްތަކުގައި ހުންނަ އައިބުކަން ފޮރުވިގެންދެއެވެ.
ނަރުގަނޑު އަޅުވައިގެން ދަތްތައް ރަނގަޅު ކުރުމަށް 1 އަހަރު ނުވަތަ 2 އަހަރުވެސް ނަގައެވެ. ބައެއްކަހަލަ ކަންކަމުގައި އެއަށްވުރެ އަވަސްވެއެވެ. މިކަން ފަށައިގަންނަ ދުވަސްކޮޅު ދިމާވާ ދަތިތައް ހުއްޓަސް މިކަމަށް ހޭނެން ދުވަސްކޮޅެއް ނަގައެވެ. ބައެއް މީހުންނަށް އުދަގޫވެ އަދި ތަދުވާ ކަމަށްވެސް ބުނެއެވެ. އެންމެ އުދަގޫ ކަމަކަށް ދިމާވާނީ ދަތްތައް ސާފު ކުރުމާއި ކެއުމެވެ. ފުރަތަމަ ދުވަސްވަރު ކެއުމަށް ވަރަށް ބޮޑެތި ބަދަލުތަކެއް ގެންނަންޖެހެއެވެ. ނަރުގަނޑު އަޅައިގެން އުޅޭއިރު ބައެއްކަހަލަ ކާނާ ކެއުމުން ދުރުވާންޖެހެއެވެ. އެއީ ބައެއްކަހަލަ ކާނާގެ ސަބަބުން ނަރުގަނޑު ހަލާކުވެދާނެތީއެވެ.
ނަރުގަނޑު އަޅުވައިގެން އުޅޭ ފުރަތަމަ ދުވަސްކޮޅު ކެއުމުގައި ބޭނުންކުރެވިދާނެ ކާނާތައް ޑޮކްޓަރުން ފާހަގަކޮށްފައިވެއެވެ. މިއީ ސަމާލުކަންދޭންޖެހޭ ވަރަށް މުހިއްމު ކަމެކެވެ.
ސޫޕް
ސޫޕް މިއީ ބޭނުން ގޮތަކަށް ތައްޔާރުކޮށްލެވޭ ހަށިގަނޑަށް ހަކަތަވެސް ލިއްބައިދޭ އެއްޗެކެވެ. ކޮންމެވެސް ވައްތަރެއްގެ މަހަކުން އޭގެ ރަހަ ނިކުންނަންވަރަށް ކައްކާލުމަށްފަހު މަސްކޮޅު ނުކެވުނު ކަމުގައިވިޔަސް ސޫޕް ކޮޅު ބޯލެވިދާނެއެވެ. ނަރުގަނޑު އަޅުވާ ފުރަތަމަ ދުވަސްކޮޅު ހަފައިގެން ހަރުއެއްޗެހި ކެއުން ރައްކާތެރި ނުވެދާނެއެވެ. މަސްކޮޅެއް ކާން ބޭނުންނަމަ މަސްކޮޅު މިކްސްޗަރުން މުގުރާލުމަށްފަހު ސޫޕް ހަދާލާށެވެ. ތަރުކާރީގެ ތެރެއިންވެސް ބަރަބޮލަކީ ސޫޕް ހަދާލައިގެން ބޭނުންކުރަން ވަރަށް ރަނގަޅު އަދި ހަށިގަނޑުގައި ވަރު ޖައްސާލަދޭ އެއްޗެކެވެ.
މޭޝްޑް ޕޮޓޭޓޯ
މޭޝްޑް ޕޮޓޭޓޯ ނުވަތަ ރަތްއަލަ ތައްޔާރު ކުރެވިދާނެއެވެ. މިގޮތަށް މިޑިޝް ތައްޔާރުކޮށްލުމުން ސޫޕާއި އެކީގައިވެސް ކާލެވިދާނެއެވެ. އަލުވި އަކީ ބަނޑުހައިނުވެ ގިނައިރު ހިފަހައްޓާ ތަރުކާރީއެކެވެ.
ޔޯގަޓް
ޔޯގަޓަކީ ދަތްތަކުގައި ރިއްސާނަމަ ކާން އެންމެ ރަނގަޅު އަދި އެންމެފަސޭހަ އެއްޗެވެ. ފިނިކޮށް ޔޯގަޓް ތައްޓެއް ކާލުމުން ދަތްތަކުގައި ހުންނަ ރިހުން ކުޑަކޮށްދެއެވެ. އަދި އެއްޗެހި ހަފައިގެން ނުކެވޭނަމަ ޔޯގަޓް ކަހަލަ އެއްޗެއް ކާލުން ރަނގަޅެވެ. މިގޮތަށް ކާއިރުވެސް "ޝުގަރ ފްރީ" ޔޯގަޓް ޚިޔާރު ކުރެއްވުން މުހިއްމެވެ.
ސްމޫތީ
ސްމޫތީ އަކީ ދަތްތަކަށް އަރާމުކަމާއި ފިނިކަން ގެނެސްދޭ އެއްޗެކެވެ. އެކިކަހަލަ މޭވާއާއި ފައިދާހުރި ކިރެއް ބޭނުންކޮށްލައިގެން ސްމޫތީއެއް ތައްޔާރުކޮށްލުމުން ލިބިގެންދާ ފައިދާއާއި ފަސޭހަވެސް ބޮޑުވެގެންދެއެވެ. ފިނިކޮށް ސްމޫތީ ތައްޓެއް ގިރާލުމުން ނަރުގަނޑު އަޅުވާފައި ހުންނައިރު ދަތްތަކުގައި ހުންނަ ރިހުން ކުޑަކޮށްދެއެވެ.
ފެނުކެއްކި ބިސް ނުވަތަ ސްކްރެމްބްލްޑް އެގް
ޕްރޮޓީންގެ ބައި މަދުވާނަމަ ބިހުގެ ބޭނުންކޮށްލާށެވެ. ސްކްރެމްބްލް ކޮށްލައިގެން ނުވަތަ މަޑުކޮށް ބިސް ފެނު ކައްކާލައިގެން ޕެޕަރ އަޅާލައިގެން ކާލުމުން މީރުވެފައި ލިބޭ ފައިދާވެސް ބޮޑެވެ. ހަށިގަނޑުން މަދުވާ މާއްދާތައް ހަމަހަމަކޮށްލުމަށް އެހީތެރިވެދެއެވެ.
