ކިއުކަންބާ އަކީ ކެއުމުގައިވެސް ބޭނުންކުރަން ވަރަށް މުހިއްމު އެއްޗެކެވެ. ގިނަ ފައިދާތަކެއް ލިބޭ މި ތަރުކާރީއަކީ ހަންގަނޑު ރީތި ކުރުމަށްވެސް ބޭނުންކުރާ އެއްޗެކެވެ.
ބައެއް މީހުން ލޯކައިރި ކަޅުވުމުންވެސް ކިއުކަންބާ ބޭނުންކުރެއެވެ. އަނެއްބައި މީހުން ބަރުދަން ލުއިކުރުމަށް ކިއުކަންބާ ފެން ބޭނުންކުރެއެވެ. މިހެންގޮސް ކިއުކަންބާ ބޭނުންކުރެވޭ ބައިވަރު ގޮތްތައް ހުރެއެވެ.
މިފަހަރުގެ ލިއުމުގައި މިހިމަނާލަނީ ކިއުކަންބާ ބޭނުންކޮށްގެން ތައްޔާރުކުރެވިދާނެ ކްރީމެކެވެ. ޚާއްސަކޮށް މި ކްރީމަކީ ރޭގަނޑު ނިދާގަޑީގައި ބޭނުންކުރުމަށް ވަރަށް ރަނގަޅު ކްރީމެކެވެ.
ތައްޔާރުކުރާނެ ގޮތް:
ފުރަތަމަ 1 ކިއުކަންބާގެ ތޮށި ނުމަށާ، ރީތިކޮށް ގާނާލާށެވެ. އެއަށްފަހު ފުރޭންޏަކުން ރީއްޗަށް އޭގެ ދިޔަ ފައިބާގޮތަށް ކުޑަ ފުޅިއަކަށް އަޅާލާށެވެ. ދެން އެއަށްފަހު ބޭނުންވާނީ އެލޯވެރާ ޖެލް އެވެ. ފުޅީގައި ބަންދުކޮށްފައި ހުންނަ އެލޯވެރާ ޖެލްވެސް ބޭނުންކުރެވިދާނެއެވެ. 2 މޭޒުމަތީ ސަމުސަލުގެ އެލޯވެރާ ޖެލް ތައްޓަކަށް އެޅުމަށްފަހު ފުރާނާފައި ހުރި ކިއުކަންބާ ފެން ނުވަތަ ދިޔަކޮޅު ސަމުސަލަކުން އަޅަމުން ގެންދާށެވެ. މިހެން އެއްކުރަމުންދާއިރު މަޑުމަޑުން އެއްކުރާށެވެ. އޭރުން ދެބައި ވަރަށް ރީއްޗަށް އެކުވާނެއެވެ.
އެއަށްފަހު ކާށިތެޔޮ ސަމުސަލެއް ނުވަތަ ވެސްލިން ސަމުސަލެއް އެޅުމަށްފަހު މަޑުމަޑުން އެއްކޮށްލާށެވެ. ބޮޑަށް ރަނގަޅީ ކާށި ތެލެވެ. ހުރިހާއެއްޗެއް އެކުވުމުން ނިންމާލުމަށްފަހު ވިޓަމިން އީ ކެޕްސޫލް ގުޅައެއް އަޅާލުމުން މިކްރީމް ވަރަށް ފުރިހަމަވެގެންދާނެއެވެ. ކުޑަފުޅިއެއް ނުވަތަ ކްރީމް އަޅާ ކަހަލަ އެއްޗަކަށް އެޅުމަށްފަހު އައިސްއަލަމާރީގައި ބަހައްޓައިގެން ބޭނުންކުރާށެވެ. މި ކްރީމަކީ 7 ދުވަހާއި 10 ދުވަހުގެ މުއްދަތަށް ބޭނުންކުރުމަށް އެކަށީގެންވާ މިންވަރެކެވެ.
ކޮންމެ ރެއަކުވެސް ނިދުމުގެ ކުރިން މޫނު ރަނގަޅަށް ދޮވެލުމަށްފަހު މިކްރީމް ބޭނުންކޮށްލައިގެން ނިދާލާށެވެ. ހެދުނު ހޭލާއިރު މޫނުގެ ތާޒާކަން އިތުރުވެ މޫނު އުޖާލާކަމަށް ދައްކާނެއެވެ. މިއީ އާދަކޮށް ބޭނުންކޮށްލަން ވަރަށް ރަނގަޅު ކްރީމެކެވެ.
