އުމުރުން 23 އަހަރުގެ ބެލް ހަޓް އަކީ "ނާކޮލެޕްސީ" ކިޔާ ވަރަށް މަދުން ފެންނަ ބައްޔެއް ހުންނަ މީހެކެވެ. މީނާގެ މިބަލީގެ ސަބަބުން ދުވާލަކު 15 ފަހަރަށް ނިދޭ ކަމަށް ވެއެވެ. އޭގެ ސަބަބުން އޭނާގެ ހިތް ނުތަނަވަސްވުމާއި ބޭކާރު ޚިޔާލުތައް އަންނަން ފަށައެވެ. ރައްޓެހިންނާއެކު ބޭރަށް ދާން ބޭނުންވިޔަސް ނުދެވޭތީ އެކަމާވެސް ވަރަށް ފިކުރުބޮޑުވެ ވިސްނޭ ކަމަށް ބެލް ބުނެއެވެ. އޭނާވެސް އެހެން އިންސާނުން އުޅޭހެން އުޅެން ބޭނުންވާ ކަމަށާއި ތަންތަނަށް ގޮސް މަޖާކޮށް އުޅޭހިތްވާ ވާހަކަ ބުނެއެވެ. އެހެންނަމަވެސް އެކަންކަން ނުކުރެވެނީ "ނާކޮލެޕްސީ"ގެ ސަބަބުން އޭނާގެ ހަޔާތަށް އައި ބޮޑު އިންގިލާބުގެ ސަބަބުން ކަމުގައި ފާހަގަކުރެއެވެ. ނިދިއައިސްދާނެ ކަމަށް ނުވަތަ ނިދިދާނެ ކަމުގެ ބިރު އޮންނަލެއް ބޮޑުކަމުން ތަނަކަށް ދާން އަބަދުވެސް ބެލް ޖެހިލުންވެއެވެ.
ބެލް، އެހެން މީހުންނެކޭ އެއްފަދައިން ދިރިއުޅުމާމެދު އުއްމީދުތަކެއް ކުރިއެވެ. މަތީ ތައުލީމު ހާސިލްކޮށް ރަނގަޅު ވަޒީފާއަކަށް ދިއުމުގެ ފޮނި ހުވަފެންތަކެއް ދެކުނެވެ. އިންޓީރިއާ ޑިޒައިން ދާއިރާއިން ކުރިއަށް ދިއުމަށްޓަކައި ވިސްނި ވިސްނުންވެސް ބަދަލުކުރަން ޖެހުނީ މިބަލީގެ ސަބަބުން ކަމުގައި ބެލް ބުނެއެވެ. ސްކޫލުގެ ކިޔެވުންވެސް ނިންމާ ނުލެވި އެތައް އުދަގޫތަކެއް ތަހައްމަލު ކުރާ ކަމުގައި ބުނެއެވެ. އެއްޗެއް ކާލުމަށްޓަކައި ތަނެއްގައި އިނުމަކީވެސް އޭނާއަށް ވަރަށް އުދަގޫ ކަމަކަށްވެއެވެ.
ބެލް ލޯބީގެ ގޮތުން ގުޅިގެން އުޅޭ މައިކަލް ވެސް ބުނާނެ "އަބަދު ނިދޭތީ ކިހިނެއްވެފަހޭ ތިއިންނަނީ" އޭނާ ލޯބީގެ ގޮތުން ގުޅިގެން އުޅެނީ 2014 ވަނަ އަހަރު ދިމާވި މީހަކާއެވެ.
ބެލްގެ މިބަލީގެ ކަންތައް އުމުރުން 17 އަހަރުގައި އޭނާގެ މަންމައަށް ފާހަގަވުމުން ޑޮކްޓަރަށް ގެންދިޔައެވެ. އޭރު ކުދިންވެސް ވަރަށް މަލާމާތްކުރާނެ ކްލާހުގައިވެސް ނިދާތީ، ފާޑުފާޑުގެ ކާޓޫނު ގޮތަށް ހުންނަ މޫނުމަތިވެސް ކުރަހާނެ މިހެންނޭ ބެލް ހުންނަނީ ކިޔާފަ،" އަބަދު ނިދޭތީ ބުލީވެސް ކުރޭ، ވަރަށް ދެރަވެލާފައި ބުންޏެވެ. އެއްދުވަހަކު ސްކޫލުގައި ނިދޭތީ ޓީޗަރަކު އޭނާއާއި ދިމާލަށް ބުންޏެވެ "ރޭގަނޑު ދަންވަންދެން މާގިނައިން ބޭރުގައި އުޅެނީ ދޯ، ރޭގަނޑު އަވަހަށް ނިދަން އާދަކޮށްބަލަ، މިކަހަލަ އެތައް ބަސްތަކެއް ޓީޗަރުންގެ ފަރާތުންވެސް އިވެއެވެ. އެއްދުވަހަކު ޓީޗަރެއް އޭނާއާއި ދިމާލަށް ގަލަމެއް އެއްލާފައި ބުންޏެވެ. "ތިމަންނަގެ ކްލާހުގައި ނުނިދާތި އިނގޭ" އެޖުމްލައާއި އެއަމަލުން ބެލްގެ ހިތަށް ލިބުނު ފުން އަސަރުގެ ވާހަކަ ބުނެދޭންވެސް ނޭގުނެވެ. އެއަށްފަހު ބެލް ސްކޫލަށް ދިއުން ހުއްޓާލިއެވެ.
ބެލްގެ މަންމަ އަބަދުވެސް އޭނާއާއި ވަކިން ބެލް ދޫކޮށްލަން ޖެހިލުންވެއެވެ. ސަބަބަކަށް ވަނީ ނިދިގެން ނުރައްކާތެރި ކަމެއް ދިމާވެދާނެތީ އެކަމާ ޖެހިލުން ވާތީއެވެ. ބެލްގެ މި ނިދުމުގެ ކަންތަކަށް ހައްލެއް ހޯދުމަށް ޖިމަށްގޮސް ކަސްރަތު ކުރަން ފެށުމުން ކުރިއެރުން ލިބެން ފެށިއެވެ. ދުވެގެން ލިބޭ ހިތްވަރާއި ހަކަތައިން ބެލްއަށް އެތައް ހިތްހަމަޖެހުމެއް ލިބެން ފެށިއެވެ. އޭނާގެ އުއްމީދަކަށްވީ "ޕާސަނަލް ޓްރެއިނާ" އަކަށް ވުމެވެ. އަބަދުވެސް އެއަޒުމް އޮވެއެވެ. ޖިމަށް ގޮސްވެސް ޔޯގާ ރޫމަށް ވަދެ ނިދާލައެވެ. އެތަނުގައި އުޅޭ އެއްމެންވެސް އެކަން ދަނެ އޭނާއަށް ނިދަން ވަގުތު ދެއެވެ.
ބެލް ބުނާގޮތުގައި އެންމެބޮޑު އެހީތެރިކަމެއް ލިބެނީ މަންމައާއި ލޯބިވެރިޔާގެ ފަރާތުންނެވެ.
ފޮޓޯ އަދި މައުލޫމާތު: ޔޫޓިއުބް، ޓްރޫލީ
