ބޮލުން އިސްތަށި ފައިބާ މައްސަލައަކީ ވަރަށް ގިނަ މީހުންނަށް ދިމާވާ ކަންބޮޑުވާ ކަމެކެވެ. އެކި މީހުން ބުނެގެން އެކިކަހަލަ ޝޭމްޕޫ ތަކާއި ވިޓަމިން ބޭނުންކުރާ މީހުން މަދެއް ނޫނެވެ. އެހެންނަމަވެސް މިކަމަކީ ހައްލު ހޯދަން ވަރަށް އުދަގޫ ކަމަކަށް ވަނީ ވެފައެވެ. ބޮލުން އިސްތަށި ފޭބުމުގެ މައްސަލަ ގިނައިން ދިމާވަނީ ދިރިއުޅުމުގެ ކަންކަން ހުންނަ ގޮތުންނާއި ތަފާތު ވައްތަރުގެ ކެމިކަލްތައް ނޭނގި ނަމަވެސް ބޭނުންކުރެވެމުންދާތީ އެވެ. ރޭގަނޑުގެ ހަމަ ނިދި ނުނިދުމާއި މާބޮޑަށް ފިކުރު ބޮޑުވުމުގެ ސަބަބުންވެސް އިސްތަށި ފައިބައެވެ. ދުޅަހެޔޮ ރަނގަޅު ސިއްހަތެއް ހޯދުމަކީ މިހުރިހާ ކަމެއްގެވެސް ހައްލަކަށް ވާނެއެވެ. އެހެންނަމަވެސް އެކަމަކަށް ސަމާލުކަން ދެވޭ މިންވަރުވެސް ކުޑައެވެ. އަގުބޮޑެތި އެއްޗެހި ބޭނުންކޮށްގެން އިސްތަށި ފޭބުމަށް ހައްލު ހޯދަން މަސައްކަތް ކުރުމަށްވުރެ ތިމާ ބޭނުންކުރާ ކާނާ އާއި ދޭތެރޭ ވިސްނާލުން ކިހިނެއްވާނެތޯއެވެ. ކެއުމުގައި ބޭނުންކުރާތަކެތި ބަދަލުކޮށްލައި މި ކާނާތަކަށް ސަމާލުކަން ދީގެން އިސްތަށި ފޭބުމަށް ހައްލު ހޯދަމާ ހިގާށެވެ.
ފިޔާ ޖޫސް
ފިޔާ ޖޫހޭ ބުމުން ހައިރާންވާނެ މީހުން ވަރަށް ގިނަވާނެއެވެ. ފިޔާ ޖޫހަކީ އާއްމުކޮށް މިގިރާ ޖޫސްތަކާއި ވަރަށް ތަފާތު އަދި މީހުން އަޑުއަހައި އުޅޭ ޖޫހެއްވެސް ނޫނެވެ. ފިޔާގައި ހުންނަ "ސަލްފަރ" ގެ ސަބަބުން ބޮލުން އިސްތަށި ފޭބުމަށް ހައްލު ލިބިގެން ދެއެވެ. ބޮލުގެ ހަންގަނޑުގައި އުފެދޭ ކުދި ފަންގަސް އަދި ޖަރާސީމު ކަހަލަ އެއްޗެހި ނައްތާލުމަށް ފިޔާ ޖޫސް އެހީތެރިވެދެއެވެ. ބޮލުގެ ހަންގަނޑު ސާފުކޮށްލަދިނުމުން އިސްތަށީގެ ބުޑު ވަރުގަދަވެގެންދެއެވެ. މިކަމުގެ ސަބަބުން އިސްތަށި ފޭބުން މަދުވެގެންދެއެވެ.
ބީޓްރޫޓް ޖޫސް
ނިއުޓްރިޝަން މަދުވުމުގެ ސަބަބުން އިސްތަށި ފޭބުން ގިނަވެއެވެ. ބީޓްރޫޓް ޖޫސް ބުއިމުން ނިއުޓްރިޝަންގެ މާއްދާ ވަރަށް ބޮޑަށް ލިބިގެންދެއެވެ. ބީޓްރޫޓުގައި ވިޓަމިން ސީ، ދަގަނޑުގެ ބާވަތް، ވިޓަމިން ބީ، މެގްނީސިއަމް އަދި ޕޮޓޭސިއަމް ހިމެނެއެވެ. ބީޓްރޫޓަކީވެސް ބޮލުގެ ހަންގަނޑު ސާފުކޮށްލަދީ ބޮލުން އިސްތަށި ފޭބުމަށް ހައްލު ލިބިގެންދާ ބާވަތެކެވެ.
ގްރީން ޓީ
ކޮންމެ ދުވަހަކު ހެދުނު ހޭލުމަށްފަހު ގްރީން ޓީ އެއް ބޯލުމުން ލިބޭ ތާޒާ ކަމާއި އެއްވަރަށް ގްރީން ޓީ އަކީ ވެސް ބޮލުން އިސްތަށި ފޭބުމަށް ހައްލު ހޯދަދޭ އެއްޗެކެވެ. އަދި ހަމަ އެހެންމެ ސިއްހީ ވަރަށް ގިނަ މައްސަލަތަކަށް ހައްލު ލިބޭޭ މިސަޔަކީ ކޮންމެ ދުވަހަކު ބޭނުންކޮށްލަން މުހިންމު އެއްޗެކެވެ. މެޓަބޮލިޒަމް ރޭޓް އަވަސްކޮށްލަދީ ހަށިގަނޑަށް ވަރަށް ގިނަގުނަ ފައިދާ ހޯދައިދެއެވެ.
އިންޑިއަން ގޫސްބެރީ (އާމްލާ)
ވިޓަމިން ސީ އަކީ ހަށިގަނޑަށް ވަރަށް މުހިންމު އެއްޗެކެވެ. ވިޓަމިން ސީގެ މާއްދާ މަދުވެއްޖެނަމަ ނުވަތަ ބޭނުންވާ މިންވަރަށް ނުލިބޭނަމަ އިސްތަށި ފޭބުން ގިނަވެގެންދެއެވެ. އާމްލާ އަކީ ވިޓަމިން ސީގެ މާއްދާ ވަރަށް ބޮޑަށް އެކުލެވިގެންވާ އެއްޗެކެވެ. ތާޒާކޮށް ހުންނަ އާމްލާ އިން ޖޫސް ތައްޔާރު ކުރުމަށްފަހު ބޭނުންކޮށްލާށެވެ. އަދި މީގެ އިތުރުން އާމްލާއިން ދިޔަ ފެލާލުމަށްފަހު އޭގެ ޖޫސް ތައްޓަކަށް އެޅުމަށްފަހު ލުނބޯއެއްގެ ޖޫހާއި އެއްކޮށްލާށެވެ. އެއަށްފަހު ބޮލުގައި ހޭކުމަށްފަހު 1 ގަޑި އިރުވަންދެން ބެހެއްޓުމަށްފަހު ބޯދޮވެލާށެވެ. މިއީ ބޮލުން އިސްތަށި ފޭބުމުގެ މައްސަލައަށް ވަރަށް ރަނގަޅު އެއްޗެކެވެ.
ހިތިފަތް
ހިތިފަތަކީވެސް އެކިކަހަލަ ބޭސްވެރިކަމުގައި ބޭނުންކުރަމުންދާ އެއްޗެކެވެ. ހިތިފަތުން ދިޔަ ފެލުމަށްފަހު ނުވަތަ ހިތިފަތް ފުނޑައިގެން ބޮލުގައި އަޅާފައި 1 ގަޑި އިރު ނުވަތަ 2 ގަޑި އިރު ބެހެއްޓުމަށްފަހު ދޮވެލާށެވެ.
މީގެ އިތުރުން ކެއުމުގައި ބިހާއި ކިރު އަދި ތަފާތު ވައްތަރުގެ ނަޓްސް އާއި ބަރަބޯ އަދި ކަރާއޮށް ބޭނުންކުރުންވެސް ވަރަށް މުހިންމެވެ. މިގޮތަށް އަމަލުކުރަން ފެށުމުން ބޮލުން އިސްތަށިފައިބާ މިންވަރު ކުރިއަށްވުރެ މަދުވެގެންދާނެއެވެ.
މައުލޫމާތު: ޑރ. ބަޓްރާސް
