ކަސްރަތުކުރުމާއި ދުވަންދިއުމަކީ ބައެއް މީހުން އެހާ ކުރާހިތްވާ ކަންކަމެއް ނޫނެވެ. އެހެންނަމަވެސް ހިކެން ބޭނުންވެއެވެ. ކަސްރަތެއް ނުކޮށް ހިކޭނެނަމަ ހާދަ ފަސޭހައޭ ބުނާ މީހުންވެސް އުޅެއެވެ.
ހިކޭކަމަށް ބުނާ ފާޑުފާޑުގެ ސައިފަތާއި ކޮފީ އަދި ކެޕްސޫލް ކަހަލަ އެއްޗެހި ބާޒާރަށް ނެރެ އޭގެ އަވައިގައި ޖެހޭ މީހުންވެސް މަދެއްނޫނެވެ. އެއެއްޗެހި ބޭނުންކޮށްގެން ނުހިކުނީމަ އެކަމާ ކަންބޮޑުވާމިންވަރު ވަރަށް އަވަހެވެ. ބޭކާރު ޚަރަދެއް ކުރެވުނީ ކަމުގެ އިހްސާސްކުރެވި ދެރަވެއެވެ.
އެއްވެސް ބޭހެއް ނުވަތަ ޖޫހެއް ބޮއެގެން ހިކޭނެ ކަމުގައި ގަބޫލު ކުރުމަކީ ކުށްހީއެކެވެ. ކަސްރަތު ކުރަން ބޭނުން ނުވާނަމަ ނުވަތަ ޖިމްއަށް ގޮސްގެން އެހާ ބޮޑު ޚަރަދު ކުރަން ބޭނުންނުވާ މީހުންނަށް ވަރަށް ފަސޭހަ ކަންކަން ހުރެއެވެ. ވަކި ގަޑިތަކެއްގައި ޖިމަށް ދާންވީމަ އުދަގޫވާ މީހުންވެސް ތިބެއެވެ. އޭގެ ބަދަލުގައި ރައްޓެހިންކޮޅަކާއެކު ނުވަތަ އޮފީސް ކުދިންނާއެކު ކުޅިވަރެއް ކުޅުން އެއީ ވަރަށް ގިނަ ގޮތްގޮތުން ފައިދާކުރާނެ ކަމެކެވެ.
ހިކެން ބޭނުންވާ މީހުން ކަސްރަތުގެ ބަދަލުގައި ކުޅެވިދާނެ ބައެއް ކުޅިވަރުތަކުގެ ތަފްސީލް ކިޔާލަދޭނަމަވެ.
ބެޑްމިންޓަން
މިއީ ކޮންމެ ތަނެއްގައިވެސް ކުޅެވިދާނެ ކުޅިވަރެކެވެ. އިންޑޯ އަދި އައުޓްޑޯ ކުޅިވަރެއްގެ ގޮތުގައިވެސް ކުޅެވިދާނެއެވެ. އަތިރިމަތީގައި ނުވަތަ ގޭގެ ޓެރަހުގައި ނުވަތަ ގޯތިތެރޭގައި އޮންނަ ހުސްތާގައިވެސް ކުޅެން ފަސޭހަ ކުޅިވަރެކެވެ. ކޮންމެ އުމުރެއްގެ މީހަކާއެކުވެސް މިކުޅިވަރު ކުޅެވިދާނެއެވެ. އާއިލާއެއްގެ ތެރޭގައިވެސް އެންމެން އެކުގައި މިކުޅިވަރު ކުޅެ އެކުވެރިކަން ބަދަހިކޮށްލަންވެސް ފަސޭހަވާނެއެވެ. މިއީ މުޅި ހަށިގަނޑަށް ކަސްރަތު ލިބިދޭނެ ކުޅިވަރެކެވެ. ވަރަށް ގިނައިން ދުވެ އަދި ފުއްމަންވެސް ޖެހެއެވެ. ހަށިގަނޑުން އެތައް ބައިވަރު ކެލޮރީސްއެއް އަންދާލައެވެ. މިއީ ކުޅެން ވަރަށް ފަސޭހަ އަދި ވަރަށް ކުޅޭހިތުން ކުޅެވޭނެ ކުޅިވަރެކެވެ.
ފެތުން
ފެތުމަކީ ވަރަށް އަވަހަށް އަދި ވަރަށް ފަސޭހައިން ހަށިގަނޑަށް އެގުންވާ ކަސްރަތެކެވެ. ފެތުމަކީވެސް ވަކި ގަޑިއެއް ކަނޑައަޅައިގެން ކުރަންޖެހޭ ކަސްރަތަކަށް ނުވާތީ އެމީހަކަށް ފަސޭހަ ގަޑިއެއްގައި ކުރެވިދާނެ ކަމެކެވެ. ފަތަން ދަސްކުރުމަކީ ވަރަށް މުހިއްމުވެސް ކަމެކެވެ. ކަނޑުމަތީގެ ހާދިސާއެއް ދިމާވިނަމަވެސް ރައްކާތެރިކަމަށް ބަލާއިރު މިއީ ވަރަށް މުހިއްމު ކަމެކެވެ. ސްޕޯޓްސް އަދި ފިޓްނަސްގެ މާހިރުން ބުނާގޮތުގައި ހަފްތާއަކު 3 ފަހަރު 45 މިނިޓް ފަތާނަމަ ފަލަ މީހުން ހިކުމަށް ވަރަށް އަވަސްވެގެންދެއެވެ. އަދި މީހާގެ ހަށިގަނޑު ރީތިވެގެންދެއެވެ.
ބައިސްކަލް ދުއްވުން
ބައިސްކަލް ދުއްވުމަކީ ވަރަށް މަޖާ ކަމެކެވެ. ހަވީރު ފިންޏަށް ބައިސްކަލް ދުއްވާލާފައި ތަންތަނަށް ގޮސްލުމުން އެކުރެވުނީވެސް ކަސްރަތެކެވެ. ގްރޫޕް ހަދާލާފައި ބައިސްކަލް ރޭސް ޖަހާލައި މަޖާކޮށްލުމުން ހިތްހަމަޖެހުން ލިބި ހަށިގަނޑަށް ފައިދާކުރުވަނިވި ކަސްރަތެއް ކުރެވުނީއެވެ. ބައިސްކަލް ދުއްވުމުން ހަށިގަނޑުގެ ހުރިހާ މަސްތަކަށް ވާންވެއެވެ. ހަމަ މީގެ އިތުރުން ވަރަށް ގިނަ ކެލޮރީސް އަންދާލައެވެ. ސިއްހީ މައްސަލަތަކަށް ހައްލު ލިބިގެންދާ މިކަސްރަތު ކުރުމަށް ސިއްހީ މާހިރުންވެސް ލަފާދެއެވެ. މީހާ ގައިގައި ހަކަތަ އިތުރުކޮށްދީ ހަށިގަނޑުގައި ޖަހާފައި ހުންނަ މަސްތައް ރީތި ބައްޓަމަކަށް ހުރުމަށް އެހީތެރިވެދެއެވެ.
ފުޓްބޯޅަ
ފުޓްބޯޅަ އަކީ ވަރަށް ގިނައިން ދުވަންޖެހޭ ކުޅިވަރެކެވެ. މި ކުޅިވަރަކީ ފައިގެ މަސްތައް 'ޓޯން' ކޮށްލަދީ މީހާގެ ބުންވަރުވެސް އިތުރުކޮށްލަދޭ ކުޅިވަރެކެވެ. އަދި 'މެޓަބޮލިޒަމް ރޭޓް' އަވަސްކޮށްލަދެއެވެ. ކަށިތައް ވަރުގަދަކޮށްލަދީ ކަށިތަކުގައި ރިއްސުން ރަނގަޅުވެގެންދެއެވެ. މި ކުޅިވަރަކީ ފައިދާކުރުވަނިވި ހިކެން ބޭނުންވާ މީހުންނަށް ކުޅެން ވަރަށް ރަނގަޅު ކުޅިވަރެކެވެ.
ބާސްކެޓް
މަސްގުޅަކެއުމުގެ ބަދަލުގައި މިކުޅިވަރުން ހަށިގަނޑުގެ އެކިތަންތަނަށް ވާންވެއެވެ. މިއީ ވަރަށް ބޮޑަށް ސިކުނޑި ބޭނުންކޮށްގެން ވަރަށް ސަމާލުކަންދީގެން ކުޅެންޖެހޭ ކުޅިވަރެކެވެ. ފުމެލާ ދުވެލާ ވަރަށް ހުޝިޔާރުކަމާއެކު މިކުޅިވަރު ކުޅެލާއިރު ހުރިހާ ސްޓްރެސްއަކުން ދުރުވެގެންދާހެން ހީވެއެވެ. ސިކުނޑިއަށް ލިބޭ ތާޒާކަން އިތުރުވެގެންދެއެވެ. މިއީ އާއިލާ އެންމެން އެކުގައި ކުޅެލަން ރަނގަޅު ކުޅިވަރެކެވެ. މިކުޅިވަރުންވެސް ހިކުމަށް މަގުފަހިކޮށްދެއެވެ.
މައުލޫމާތު: ހެލްތްޝޮޓްސް.ކޮމް
