ޒީޓައިމްސް ކިޔުންތެރިންނަށް ހޫނު މަރުހަބާއެއް ދަންނަވަމެވެ. ޒީޓައިމްސް ވެބްސައިޓް 2021 ޖަނަވަރީ 10ވަނަ ދުވަހު މިފެށީ ކިޔުންތެރިންނަށް ބޭނުންވާނެ ތަފާތު މަޢުލޫމާތުތައް ގެނެސްދިނުމަށެވެ. ޒީޓައިމްސް ނަމުގައިި އަމިއްލަ ވެބްސައިޓެއް ފެށުމުގެ އެންމެބޮޑު ބޭނުމަކީ ހަމަހަމަކަމާއި ތެދުވެރިކަމާއިއެކު ޢާންމުންނަށް ބޭނުންތެރި މަޢުލޫމާތު ގެނެސްދިނުމެވެ.
ތިރީގައިމިވަނީ މިވެބްސައިޓްގައި މިވަގުތު ހިމެނޭ މުހިއްމު ބައިތަކާއި އެބައިތަކުގެ ދަށުން މަޢުލޫމާތު ގެނެސްދެވޭނެ ގޮތެވެ.
- ފަރުދުން
މިބައިގައި ގެނެސްދެވޭނީ ތަފާތު ދާއިރާތަކުން ފާހަގަކުރެވޭ މީހުންގެ މައުލޫމާތެވެ. މީގެ ތެރޭގައި މުޖުތަމައަށް އެކި ގޮތްގޮތުން ޚިދުމަތް ކޮށްދޭ އަދި ކުރިން ކޮށްފައިވާ ފަރާތްތައް ހިމެނޭނެއެވެ.
- ރިޕޯޓް
މުޖުތަމަޢުގައި ފާހަގަކުރެވޭ އެކިއެކި މައްސަލަތަކާއި، އެވަގުތަކު ހިނގާ މުހިއްމު ކަންތައްތަކުގެ އިތުރުން ޢާންމުންނަށް މަޢުލޫމާތު ބޭނުންވާނެ ކަމަށް ޤަބޫލުކުރެވޭ ދާއިރާތަކުގެ ތަފްސީލީ މަޢުލޫމާތު ހިމެނޭ ރިޕޯޓް ގެނެސްދެވޭނެއެވެ. ބޮޑެތި ބަލިތައް ތަހައްމަލްކުރާ ނުވަތަ އެނޫން އެހެނިހެން ސަބަބަކާއިހުރެ ޢާންމުންގެ އެހީތެރިކަމަށް އެދި ލިޔާ ރިޕޯޓްވެސް ގެނެސްދިނުމަށް ހަމަޖެހިފައިވެއެވެ. މިގޮތަށް ރިޕޯޓް ގެނެސްދެވޭނީ ޑޮކްޓަރުގެ ލިޔުންތަކުގެ ތަފްސީލަށް ބެލުމާއި، އެހީތެރިކަމަށް ބޭނުންވާ ފަރާތްތަކުގެ ފުރިހަމަ މަޢުލޫމާތު ހޯދުމަށްފަހު ބަލަންޖެހޭ ހުރިހާ ކަމަކަށް ބެލުމަށްފަހުގަ އެވެ.
- ވިޔަފާރި
ވިޔަފާރި ބައި ޚާއްސަކޮށްފައިވަނީ ދިވެހިރާއްޖޭގެ އިތުރުން އެކި ޤައުމުތަކުގައި ހިންގާ ވިޔަފާރީގެ މަޢުލޫމާތު ހިމެނޭ ރިޕޯޓް ގެނެސްދިނުމަށެވެ. މީގެއިތުރުން ވިޔަފާރިވެރިންގެ މަޢުލޫމާތު ހިމެނޭ ރިޕޯޓްތަކާއި، ސޯޝަލް މީޑިއާ މެދުވެރިކޮށް އަލަށް ވިޔަފާރިއަށް ނުކުންނަ ފަރާތްތަކުގެ މަޢުލޫމާތުވެސް މިބައިގައި ގެނެސްދެވޭނެ އެވެ.
- ދީން
ޒީޓައިމްސް އިން ދީނީ ސެގްމެންޓް ގެނެސްދޭ އެންމެބޮޑު ބޭނުމަކީ އިސްލާމްދީނާއި ގުޅޭ ގޮތުން ޢާންމުން ހޭލުންތެރި ކުރުވުމެވެ. ތަފާތު ދީނީ ޢިލްމްވެރިންގެ މަޢުލޫމާތު ގެނެސްދީ އެފަދަ ފަރާތްތަކުގެ ދަރުސްތަކުން މުހިއްމުބައިތައް ގެނެސްދިނުމެވެ. އަދި މިބައިގައި ޚުތުބާގައި ހިމެނޭ މުހިއްމު މަޢުލޫމާތުވެސް ގެނެސްދެވޭނެ އެވެ.
- ސިއްޙަތު
ސިއްޙީ މަޢުލޫމާތު ތަފްސީލުކޮށް ގެނެސްދިނުމަކީ މުހިއްމުކަމެއްކަމުގައި ދެކެމެވެ. އެގޮތުން މިބައިގައި ޑޮކްޓަރުންގެ މަޢުލޫމާތު ހިމެނޭނެއެވެ. އަދި ޢާންމުކޮށް ފާހަގަކުރެވޭ އެކި ބަލިތަކާއި ގުޅޭ ގޮތުން ހޭލުންތެރިކުރުވުމަށް ތަފްސީލީ މަޢުލޫމާތު ހިމެނުމަށް ހަމަޖެހިފައި ވެއެވެ.
- ހުނަރު
މުޖުތަމަޢުގައި ތަފާތު ހުނަރުތައް ހުރި ފަރާތްތައް ދެނެގަނެ، އެހުނަރު އިތުރަށް ކުރިއަރުވަން ބޭނުންވާ އެކި އުމުރުފުރައިގެ މީހުން ތިބިއިރު ޒީޓައިމްސްގެ އެންމެބޮޑު މަޤްސަދަކީ މިފަދަ ފަރާތްތަކުގެ މަޢުލޫމާތު ޢާންމުންނާއި ހަމައަށް ގެނެސްދީ މިފަދަ ފަރާތްތަކުން ކުރަމުންދާ މަސައްކަތަށް ހިތްވަރު ދިނުމެވެ.
- ބަދިގެ
ބަދިގެ ހިމެނުމުގެ އެންމެބޮޑު ބޭނުމަކީ ތަފާތު ރަހަތައް ހިމެނޭ ކާނާގެ ބާވަތްތައް ކިޔުންތެރިންނާއި ހަމައަށް ގެނެސްދިނުމެވެ. މިބައިގައި ދިވެހިރާއްޖޭގެ އެކި ރަށްރަށުގެ އިތުރުން ރާއްޖޭއިން ބޭރުގެ ފާހަގަކުރެވޭ ކާއެއްޗެހީގެ މަޢުލޫމާތު ގެނެސްދެވޭނެ އެވެ.
- ތާރީޚް
ދިވެހިރާއްޖޭގެ އެކި ރަށްރަށުގައި ފާހަގަކުރެވޭ ތަފާތު ތާރީޚީ ތަންތަން ހުރިއިރު މިތަންތަނުގެ މަޢުލޫމާތު ގެނެސްދެވޭނެ އެވެ.
- ހާދިސާ
ކުރީ ޒަމާނުގައި ހިގާފައިހުރި ކަމަށް ބުނެ ކުރީގެ ލިޔުންތެރިން ލިޔެފައިވާ ބައެއް ހާދިސާތައް އެލިޔުންތަކާއި ހަވާލާދީ ގެނެސްދެވޭނެ އެވެ. އަދި އެކި މީހުންނަށް ދިމާވެފައިހުރި ކަމަށް ބުނާ އެކިއެކި ހާދިސާތަކުގެ މަޢުލޫމާތު ގެނެސްދެވޭނެ އެވެ.
- ފޮޓޯ
ފޮޓޯ ގެލަރީގައި ހިމެނުމަށް ހަމަޖެހިފައިވަނީ ދިވެހިރާއްޖޭގައި ކުރިން ހިނގާފައިވާ އަދި ހިނގަމުންދާ ކަންތައްތަކުގެ ފޮޓޯގެ އިތުރަށް މަޢުލޫމާތެވެ. މީގެއިތުރުން ފާހަގަކުރެވޭ ތަފާތު މަސައްކަތްކުރާ ފަރާތްތަކުގެ ފޮޓޯއާއި ޚާއްސަ ތަންތަނުގެ ފޮޓޯވެސް މިބައިގައި ހިމެނޭނެއެވެ.
- ވީޑިއޯ
ހޭލުންތެރިކުރުމުގެ ތަފާތު މެސެޖުތައް ވީޑިއޯ މެދުވެރިކޮށް ގެނެސްދެވޭނެ އެވެ. އަދި ފާހަގަކުރެވޭ ތަފާތު ކަންތައްތަކާއި ޤުދުރަތީ ރީތި މަންޒަރުތަކާއި ގުޅޭ ވީޑިއޯ ގެނެސްދެވޭނެ އެވެ.
ދިވެހިރާއްޖޭގައި ޢާންމުކޮށް ނުކުންނަ އޮންލައިން ނޫސްތަކާއި އަޅާބަލާއިރު ޒީޓައިމްސްގެ ތަފާތަކީ ޒީޓައިމްސް އިން ގެނެސްދޭނީ ކޮންމެކަމެއްގެ ވެސް ތަފްސީލީ ރިޕޯޓެވެ. ބޭނުމަކީ ކިޔުންތެރިންނަށް އެންމެ ފުރިހަމަ މަޢުލޫމާތު ގެނެސްދިނުމެވެ. ނޫސްވެރިކަމުގެ ދާއިރާގައި އެކިގޮތްގޮތުން ވޭތުވެދިޔަ 15އަހަރު އަޅުގަނޑަށް ލިބުނު ތަޖުރިބާއާއި ރާއްޖެއިންނާއި ރާއްޖެއިން ބޭރުން ލިބުނު ތަޢުލީމާއި ތަމްރީންގެ އަލީގައި، ކިޔުންތެރިންނާއި ހަމައަށް އެއްވެސް ނުފޫޒެއްނެތި ހަމަހަމަކަމާއިއެކު ޒީޓައިމްސް މެދުވެރިކޮށް މަޢުލޫމާތު ގެނެސްދިނުމުގައި ދެމިހުރުމަކީ އަޅުގަނޑުގެ އެންމެބޮޑު މަޤްސަދެވެ. މިފުރުސަތުގައި ޢާންމުންނަށް އެންމެ ބޭނުންތެރި މަޢުލޫމާތު ފުރިހަމައަށް ގެނެސްދިނުމަށް އަޅުގަނޑަށް އެހީތެރިކަން ފޯރުކޮށްދޭ ޑެޕިއުޓީ އެޑިޓަރ މަރްޔަމް ޝަނީޒާ (ޝާނީ)ގެ އިތުރުން އެކިގޮތްގޮތުން އަޅުގަނޑަށް ހިތްވަރުދޭ ހުރިހާ ފަރާތްތަކަށް ޝުކުރު ދަންނަވަމެވެ.
ޝުކުރިއްޔާ!
ޒީނާ ޒާހިރު
ޒީޓައިމްސްގެ ޗީފް އެޑިޓަރ
ކިޔުންތެރިންގެ ހިޔާލު
ޒީ ޓައިމްސް އަކީ ރަނގަޅު އޮންލައިން އަކަށް ވާނެ ކަމަށް އުންމީދު ކުރަން
ކޮމެންޓްސް ބަންދުކުރެވިފައި