ގޭސްޓްރައިޓިސް ނުވަތަ ވައިގެ މައްސަލައަކީ ގިނަ ބައަކަށް ދިމާވާ އާންމު ކަމެކެވެ. މިއީ އަޅައިނުލާ ދޫކޮށްލެވޭވަރަށްވުރެ ސީރިއަސް މައްސަލައެކެވެ. މިމައްސަލަ ހުންނަ މީހުން ކެއުން ބައްޓަންކުރަންވީ ގޮތުގެ ތާވަލެއް ތައްޔާރުކޮށް އެކަމަށް ފަރުވާތެރިވެ ކެއުމުގައި ވަކި އާދަތަކެއް ބެހެއްޓުން ވަރަށް މުހިއްމެވެ. ވައިގެ މައްސަލަ ހުންނަނަމަ ރެސްޓޯރެންޓަކަށް ދިޔަ ނަމަވެސް ކާން ބޭނުންވާތަކެތި ނުކައި އުޅެންޖެހެއެވެ.
ކެއުމުގައި މާގިނައިން ތެޔޮ ބޭނުންކުރުމާއި ކުޅިކޮށް ކެއުމަކީ ސިއްހީގޮތުން އެހާ ރަނގަޅު ކަމެއްނޫނެވެ. ކެއުމުގެ އާދަތައް ރަނގަޅަށް ގެންގުޅޭނަމަ ވައިގެ މައްސަލަ ދިމާވުން ދުރުކޮށްދެއެވެ.
އާއްމުގޮތެއްގައި ހެނދުނު ހުސްބަނޑާހުރެ ބޭނުންކުރަން ނުވާ ކާނާތަކަކީ ކޮބައިކަންވެސް އެނގެންޖެހެއެވެ. ކެއުމުގައި ފަރުވާ ބަހައްޓައިގެން ގަޑިންގަޑިއަށް ކެއުމަކީ ސިއްހީ މައްސަލަތަކުން ދުރުކޮށްދޭ އަދި ހަށިގަނޑުގެ ބަރުދަންވެސް އެއްވަރެއްގައި ހުރުމަށް އެހީތެރިވެދޭ ކަމެކެވެ.
ކެއުމުގެ އާދަތަކުގެ ތެރޭގައި ވިސްނަންވީ ކަންކަމާއި ގޭހުގެ މައްސަލަ ހުންނަ މީހުން ކެއުން ބަހައްޓަންވީ ގޮތާއި، ކެއުމުގައި ހިމެނުން ރަނގަޅު ނޫން ބާވަތްތައް ތިރީގައި މިވަނީއެވެ.
މޭވާ އާއި ތަރުކާރީ
ހުތްކަން ގަދަ މޭވާތައް އޮރެންޖް، ޓޮމާޓޯ ލުނބޯ ކަހަލަ އެއްޗެހި މަދުކޮށްގެން ކެއުމުގެ އާދަތައް ބަހައްޓާށެވެ. 'އެސިޑް' މަދުން ހުންނަ މޭވާގެތެރޭގައި އާފަލު، ބެރީސް އަދި ތަރުކާރީގެ ތެރޭގައި ބަރަބޯ އާއި ކެރެޓް ހިމެނެއެވެ. ދޮންކޭލަކީވެސް ކެއުމުގައި ބޭނުންކުރަން ރަނގަޅު މޭވާއެކެވެ. ދޮންކޭލުން ގައިގައި ވަރުޖައްސަދީ ހަކަތަ އިތުރުކޮށްދެއެވެ. ކެއުމުގައި މާގިނައިން ބަނޑުފުރާ ނުކެއުމަށް ޑޮކްޓަރުން ލަފާދެއްވައެވެ. މާބޮޑަށް ބަނޑުފުރާ ކެއުމުން ހޮޑުލަވާގޮތްވެއެވެ.
ހޯލް ގްރެއިން
ބްރައުން ބްރެޑް ނުވަތަ ހޯލް ގްރެއިން ބްރެޑް އަދި އާޓާ ރޮށި ކަހަލަ އެއްޗެހި ކެއުމުންވެސް ގޭހުގެ މައްސަލަތަކަށް ހައްލު ލިބެއެވެ. ބްރައުންރައިސް، ޕާސްތަރ، އޯޓްސް، ބާރުލީ ކަހަލަ އެއްޗެހި ކެއުމުން ގޭހުގެ މައްސަލަ ކުޑަވެ ބޮޑުކަމު ދިއުމަށްވެސް ފަސޭހަވެގެންދެއެވެ. ހަކުރު ހިމެނޭ ބާވަތްތައް ވީހާވެސް މަދުކޮށް ކެވޭތޯ ބަލަންޖެހެއެވެ. ހަކުރަކީވެސް ހަށިގަނޑަށް އެކިގޮތްގޮތުން ގެއްލުންދޭ އެއްޗެކެވެ.
ކިރުގެ ބާވަތްތައް
ކިރުގެ ބާވަތްތަކުގެ ތެރޭގައި ލޯފެޓް މިލްކް ނުވަތަ އާމަންޑް މިލްކް ސޯޔާ މިލްކް ވަރަށް ރަނގަޅެވެ. ކިރު ހިމެނޭ ތަކެތީގެ ތެރޭގައި ބަޓަރ ހެވީކްރީމް ހުންނަ އެއްޗެހިންވެސް ގޭސް މައްސަލަ ބޮޑުވެއެވެ. ޔޯގަޓް ބޭނުންކުރާނަމަވެސް ލޯފެޓް ޔޯގަޓް ބޭނުންކުރުން މުހިއްމެވެ.
ޕްރޮޓީން
ބިހުގެ ހުދުބައި ތަވާގައި ފިހެގެން ކާލެވިދާނެއެވެ. ބިސްގަނޑު ފިހާއިރު ބަޓަރު އަދި ކްރީމެއް ބޭނުންކުރުން ރަނގަޅެއް ނޫނެވެ. ގެރިމަހަކީވެސް ކެއުމުގައި އެހާ ގިނައިން ބޭނުންކުރުން ރަނގަޅު އެއްޗެއް ނޫނެވެ. ކާން އެންމެ ރަނގަޅީ ސެލްމަން ނޫނީ އެކިކަހަލަ ކަނޑު މަހެވެ. އަދި ކުދިމަސް ނުވަތަ މުށިމަސްވެސް ރަނގަޅެވެ.
ޖޫސް ނުވަތަ ކޮފީ ކަހަލަ އެއްޗެހި ބޭނުންކުރުން އެހާ ރަނގަޅެއް ނޫނެވެ. ކެފެއިން ހުންނަ މާއްދާ ބޭނުންކުރުން މަދުކޮށް ފިޒީ ޑްރިންކްސް ބޭނުން ނުކުރުމަށް ސިއްހީ މާހިރުން ލަފާދެއްވައެވެ. ފްރުޓް ޖޫހުގެ ތެރޭގައި އޮރެންޖް، ޓޮމާޓޯ ޖޫސްވެސް އެހާ ރަނގަޅެއް ނޫނެވެ. ކަރާޖޫސް، ބެރީ ޖޫސް ކަހަލަ ޖޫސް ހަކުރު ނާޅާ ބުއިން ރަނގަޅެވެ.
ގޭހުގެ މައްސަލަ އެއްވެސް ވަރަކަށް ހުންނަނަމަ ކެއުމުގައި ޚާއްސަ ސަމާލުކަމެއް ބަހައްޓާށެވެ.
