އުރަމަތީގެ ކެންސަރަކީ މުޅިދުނިޔޭގެ ހުރިހާ ހިސާބެއްގައިވެސް އާންމު އެއްބައްޔެކެވެ. ބުނެވޭގޮތުގައި ކޮންމެ އަށް އަންހެނުންގެ ތެރެއިން އެކަކަށް އުރަމަތީގެ ކެންސަރު އުމުރުގެ ކޮންމެވެސް ހިސާބެއްގައި ތަހައްމަލް ކުރަންޖެހެއެވެ. މައިގަނޑު ގޮތެއްގައި މިބަލި ޖެހުމަށް މެދުވެރިވާ އެންމެ މުހިއްމު އެއް ސަބަބަކީ "އަންހެން ހޯމޯން" (އިސްޓްރޯޖަން) އަށް އުމުރުގެ ދުވަސްތަކުގައި ހުށައެޅޭ މުއްދަތުގެ ދިގުމިނެވެ.
ތިރީގައި ބަޔާންކުރެވިފައި މިވަނީ މިފަދަ ކަމަކުން ދުރުހެލި ވުމަށް ދެވޭނެ އެންމެ ރަނގަޅު އިރުޝާދެވެ.
ގާތުން ބުއްދިނުމަކީ މުހިއްމު ރައްކާތެރި ފިޔަވަޅެކެވެ!
ގާތުން ބުއްދިނުމަކީ ކިރުއުފައްދައިދޭ ސެލްތައް ބޮޑުވެ ފައްކާވާ ސަބަބެކެވެ. އެހެންކަމުން އުރަމަތީގެ ކެންސަރަށް ބަދަލުވުމުގެ ޗާންސް ބޮޑުތަނުން ކުޑަވެއެވެ. މިހެޔޮބަދަލަކީ ގާތުން ބުއްދޭ މިންވަރަކުން ލިބޭ ހެޔޮބަދަލެކެވެ. މިސާލަކަށް، ގާތުން ތިންކުދިންނަށް ތިންމަހު ބުއްދިނުމުން ލިބޭފައިދާ އެންމެކުއްޖަކަށް ނުވަމަހު ގާތުން ބުއްދިނީމަ ލިބޭ ފައިދާއާއި އެއްވަރެވެ. ކުރުކޮށް ބުނަނީނަމަ ގިނައިން ގާތުން ބުއްދިން ވަރަކަށް އުރަމަތީގެ ކެންސަރާ ދުރުކުރުވައެވެ.
އިއްދައިން ކެނޑުމަށްފަހު ހަށިގަނޑަށް އަންނަ ބަދަލުތަކަށް ބޭނުންކުރެވޭ "ހޯމޯން" ބޭހުގެ މިންވަރު މަދުކުރުން!
އިއްދައިން ކެނޑުމަށް ގާތްވަމުންދާވަރަކަށް އިހްސާސް ކުރަންޖެހިދާނެ އަލާމަތްތަކަށް ލުޔެއް ހޯދައިދިނުމުގެ ގޮތުން ބައެއްފަހަރު "ހޯމޯން" ބޭސް ލިޔެދެއެވެ. މިފަދައިން ބޭސް ބޭނުން ކުރުމުން، ނިދި މޫޑް އަދި ހަށިގަނޑުގެ އެތެރެ ހޫނުވެފަ ހުންނަ އިހްސާސްތަކަށް ލުޔެއް ލިބެއެވެ. އެހެންކަމުން އެންމެ ބުއްދިވެރި ގޮތަކީ މިފަދަ ބޭސް ވީހާވެސް ކުރު މުއްދަތަކަށް ބޭނުން ކުރުމެވެ. ގިނަ އަންހެނުންނަށް މިފަދަ ބޭސް ދިރި އުޅުމަށް އުނދަގޫ ނުވެ، އިތުރު މައްސަލައެއް މެދުވެރި ނުވެ، (އިއްދައިން ކެނޑުމަށްފަހު) ބޭސް މަދުކުރަމުން ގޮސް އެއްކޮށް ހުއްޓާލެވެއެވެ.
ރަނގަޅު ބަރުދަނެއްގައި ހަށިގަނޑު ބެހެއްޓުން!
މި ނުކުތާ ވަކިން ޚާއްސަކޮށް މުހިއްމުވަނީ އިއްދައިން ކެނޑުމަށްފަހުއެވެ. ސަރުބީ ބަދަލުވެގެންދަނީ "އިސްޓްރޯޖެން" ހޯމޯން އަށެވެ. މިސަބަބަށްޓަކާ ހޯމޯން އާންމުކޮށް ދައްކޮށް ހުންނަ އެއްޗެއް، ހަށިގަނޑުގައި ސަރުބީ އިތުރު މީހުންގެ އެތައް ގުނައެއް އިތުރުވެދެއެވެ.
ބަނގުރާ ބޭނުން ނުކުރުން!
ބަނގުރާ އަދި އިސްޓްރޯޖެން އަކީވެސް ފުރަމޭގައި މުހިއްމު (މެޓާބޮލިކް) ރިއެކްޝަންތަކެއް ހިންގައިދޭ މާއްދާތަކެކެވެ. ބުނެވޭގޮތުގައި ދުވާލަކު ގަވާއިދުން އެއްތަށި ބަނގުރާ ބޯމީހަކަށް އުރަމަތީގެ ކެންސަރ ޖެހުމުގެ ޗާންސް %30 އިތުރުވެދެއެވެ. (ބޭނުން ކުރާ އަދަދާ ސީދާ ބަލި ޖެހުމުގެ ޗާންސް ގުޅިފައިވާ އެއްޗެކެވެ.)
ކަސްރަތަކީ ހަށިގަނޑު ޒުވާންކަންމަތީ ބެހެއްޓުމުގެ ސިއްރު އެކަންޏެއްނޫންމެއެވެ!
ގިނައިން ހެލިފެލިވެ އުޅޭ އަންހެނުންގެ (ކޮންމެ ބަރުދަނެއްގައި ކަމުގާވިޔަސް) އިސްޓްރޯޖަން ހޯމޯން ހުންނަ މިންވަރު މަދުވާނެއެވެ. ހުރިހާ އުމުރު ފުރާއަކަށް ވެސް ހަފްތާއަކު ތިނެއް ނުވަތަ ހަތަރު ދުވަހު މަދުވެގެން ބައިގަޑިއިރުގެ ކަސްރަތު ލިބުމަކީ އުރަމަތީގެ ކެންސަރާ ދުރުކޮށްދޭ މުހިއްމު ފިޔަވަޅެކެވެ.
މިންހެޔޮ ކެއުމެއް ހިޔާރުކުރުން!
ކަސްރަތާއެކު ހަށިގަނޑަށް އެތެރެ ކުރެވޭ ކާނާއަކީ، އުރަމަތީގެ ކެންސަރ ދުރުކުރުމަށް އެޅޭނެ އެއް މުހިހްމު ފިޔަވަޅެވެ. ދުޅަހެޔޮ ސިހްހަތެއްގައި ހުރުމަށް ރަނގަޅު ބަރުދަނެއްގައި ހުރުމަކީ އެންމެ މުހިއްމު އެއްފިޔަވަޅެވެ. އަދި މިފަދަ ކަމަކަށް މިންހެޔޮ ތަރުކާރީ އާއި މޭވާ އަސްލުކަމުގައިވާ މިންހެޔޮކެއުމަކަށް ވާންޖެހެއެވެ. އެހެންކަމުން ތަރުކާރީ، މޭވާ ފަލަމަޑީގެ ބާވަތް ތަކާ ގޮވާމުގެ ތަފާތު ވައްތަރު ތަކެވެ. ނޯޓް ކޮށްލަން މުހިންމު ކަމަކީ ތަރުކާރީ އާއި މޭވާ އަށް ކުލަ، ވަސް އަދި ރަހަ ގެނެސްދޭ މާއްދާތައް "ފައިޓޯކެމިކަލްސް" އަކީ ކެންސަރ އިން ރައްކާތެރިކޮށްދޭ އެއްޗެކެވެ. މީގެއިތުރުން ތަފާތު މުހިއްމު މިނަރަލް އަދި ވިޓަމިންގެ މާއްދާތައް ރަނގަޅު މިންވަރަކަށް އެކުލެވިގެން ވެއެވެ. މިއާއެކު ދުވާލަކު މަދުވެގެން އަށެއް ނޫނީ ދިހަ ތަށި ފެން ބުއިމަކީ ވެސް މުހިއްމު ކަމެކެވެ.
"ބްރެސްޓް އެވެއަރ" ވުން:
މިއީ މިފަހަކަށް އައިސް އުރަމަތީގެ ކެންސަރ ގެ ވާހަކަ ދެކެވޭހިނދު ކުރީކޮޅުގައި އުރަމައްޗައް އަންނަ ބަދަލުތައް ދެނެގަތުމުގެ މުހިއްމުކަން ބަޔާން ކުރުމަށް ބޭނުންކުރެވޭ ލަފުޒެކެވެ. އަމިއްލަ އުރަމައްޗައް އަންނަ ބަދަލުތައް އަމިއްލައަށް ދެނެގަނެވޭނެ ނިޒާމެއްގެ ވާހަކައެވެ. މިގޮތުން އުމުރުން 40-20 އަހަރާ ދެމެދުގެ ކޮންމެ އަންހެނެއްވެސް، ޕީރިއަޑް ވުމަށްފަހު ކޮންމެ އެއްދުވަހަކު އަމިއްލައަށް ބަލާ ފާސް ކުރަން ވާނެއެވެ. މިސާލަކަށް ޕީރިއަޑްގެ ދިހަވަނަ ދުވަސް ހިޔާރުކުރުން ރަނގަޅުވާނެއެވެ. މިގޮތަށް ބަލާފާސް ކުރާއިރު ދެފަރާތް އަޅާކިޔަން، ހަންގަނޑަށް އަންނަ ބަދަލު، ވައްގަނޑު އަދި ކިހިލިފަތް ބަލަން ވާނެއެވެ.
ސްކްރީން ކުރުން:
ސްކްރީން ކުރުމުގެ މާނައަކީ ބައްޔެއްގެ އަލާމާތްތައް ފެށުމުގެކުރިން ބަލީގެ އެންމެ ކުރީކޮޅު (އަންނަ ބަދަލުތައް) އެބައްޔެއް، ހާއްސަ ވަސީލަތްތަކެއް/އާލާތެއް ބޭނުންކޮށްގެން ދެނެގަތުމެވެ. މިފަދައިން ދެނެ ގަނެވުމުން ވަރަށް "ލުއި" ގޮތަކަށް ފަރުވާ ކުރެވި ފުރިހަމަ ޝިފާ ލިބިދެއެވެ.
މައިގަނޑު ގޮތެއްގައި އުރަމަތީގެ ކެންސަރ ސްކްރީން ކުރުމަށް ބޭނުން ކުރާ ވަސީލަތަކީ "މެމޯގްރާމް" އެވެ. މިއީ މިކަމަށް ޚާއްސަ ކުރެވިފައިވާ އެކްސްރޭ މެޝިނެއްގެ އެހީގައި ނެގޭ އުރަމަތީގެ އެކްސްރޭ އެކެވެ. ދެވައްތަރެއްގެ މެމޯގްރާމްގެ ޚިދުމަތް މިހާރު ދިވެހިރާއްޖޭގައި ލިބެން ހުރެއެވެ. އެއީ 2ޑީ އަދި 3ޑީ (ޑިޖިޓަލް ޓޯމޯސިންތެސިސް) އެވެ. މީގެ އިތުރުން އެމް.އާރް.އައި އަދި އަލްޓްރާސައުންޑް ގެ އެހީ ބައެއް ހާލަތްތަކުގައި އިތުރު މައުލޫމާތު ދެނެގަތުމުގެ ގޮތުން ބޭނުންކުރެވެއެވެ.
ރައްކާވެތިބިއްޔާ ދަތުރު!
މަތީގައިވެސް ބަޔާން ކުރެވުނު ފަދައިން ސްކްރީން ކުރުމުގެ މާނައަކީ ބައްޔެއްގެ އަލާމާތްތައް ފެށުމުގެކުރިން ބަލީގެ އެންމެ ކުރީކޮޅު (އަންނަ ބަދަލުތައް) އެބައްޔެއް، ހާއްސަ ވަސީލަތްތަކެއް/އާލާތެއް ބޭނުންކޮށްގެން ދެނެގަތުމެވެ. މިފަދައިން ދެނެ ގަނެވުމުން ވަރަށް “ލުއި” ގޮތަކަށް ފަރުވާ ކުރެވި ފުރިހަމަ ޝިފާ ލިބިދެއެވެ.
އިނގިރޭސިވިލާތުގެ (އެން.އެޗް.އެސް)ގެ 2021-2022 ވަނަ އަހަރުގެ ތަފާސްހިސާބުތަކުން ދައްކައިދޭ ގޮތުގައި، އުރަމަތި ސްކްރީން ކުރުމުރުގެ ޕްރޮގްރާމްގެ ތެރެއިން ވިހިހާސް އެއްސަތޭކަ ފަންސާސް ދެ އަންހެނުން (20152)، ބަލީގެ އަލާމާތެއް ނެތި ބަލީގެ އެނމެ ކުރީކޮޅުގައި ވަނީ ދެނެގަނެވިފައެވެ.
އުމުރުން 40-20 އަހަރާދެމެދުގެ ކޮންމެ އަންހެނެއްވެސް، ޕީރިއަޑް ވުމަށްފަހު ކޮންމެ އެއްދުވަހަކު އަމިއްލައަށް ބަލާ ފާސް ކުރަން ވާނެއެވެ. މިސާލަކަށް ޕީރިއަޑް ގެ ދިހަވަނަ ދުވަސް ހިޔާރުކުރުން ރަނގަޅުވާނެއެވެ. މިގޮތަށް ބަލާފާސް ކުރާއިރު ދެފަރާތް އަޅާކިޔަން ހަންގަނޑަށް އަންނަ ބަދަލު ވައްގަނޑު އަދި ކިހިލިފަތް ބަލަން ވާނެއެވެ.
އުރަމަތީގެ ކެންސަރ އަކީ އެބަލީގެ ކުރީކޮޅުގައި ފެނިއްޖެނަމަ އެއްކޮށް ޝިފާލިބޭ ބައްޔެކެވެ. އަދިބަލި ފެތުރުމަށްފަހުވެސް، ފަރުވާއަށް އައިސްފައިވާ ބަދަލާއެކު، ބަލި އިތުރުވިޔަނުދީ، އެހެނިހެން ދާއިމީ ބައްޔެކޭ އެއްފަދައިން ފަރުވާކުރެވޭ ބައްޔެކެވެ.
ނޯޓް: މިއީ ޑރ.މުހައްމަދު ޝިފާން ލިޔުއްވުމަށްފަހު 'ޒީޓައިމްސް' އަށް ހަދިޔާކޮށްދެއްވި ރިޕޯޓެކެވެ. ޑރ.ޝިފާންގެ ވެބްސައިޓްގައި ޝާއިއުކޮށްފައިވާ މިލިޔުން 'ޒީޓައިމްސް' ގައި ހިއްސާ ކުރުމުގެ ބޭނުމަކީ ކިޔުންތެރިންނަށް މުހިންމު މައުލޫމާތުތަކެއް ގެނެސްދިނުމެވެ.
ކިޔުންތެރިންގެ ހިޔާލު
ވަރަށް ރަނގޅު މައުލޫމާތު ކޮޅެއް މުހިއްމުލިޔުމެއް. ވަރަށް ހިތްހެޔޮ މޮޅު ތައުރީފް ހައްގު ބޭފުޅެއް. އަޅުގަނޑު މަންމަ މިހާރުވެސް މިޑޮކްޓަރުގެ ހެޔޮކަމާ މޮޅުކަމުގެ ވާހަކަ ދައްކާ މާތް الله ބަރަކާތް ލައްވާށި – އާމީން
ކޮމެންޓްސް ބަންދުކުރެވިފައި